କୋଲକାତା,୧୭।୧୦(ପି.ଟି.)- ସୌରଭ ଗାଙ୍ଗୁଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ନୂଆ ଅଧ୍ୟକ୍ଷ। ତାଙ୍କୁ ଦେଶର ଫୁଟ୍ବଲ ଲିଗ୍ ଆଇଏସ୍ଏଲ୍ର ଆମ୍ବାସାଡର କରାଯାଇଛି। ଆଗାମୀ ଆଇଏସ୍ଏଲ ରବିବାରଠାରୁ କୋଚିଠାରେ ଅନୁଷ୍ଠିତ ହେବ। ଉଦ୍ଘାଟନୀ ମ୍ୟାଚ୍ କେରଳ ବ୍ଲାଷ୍ଟର୍ସ ଓ ଦୁଇ ଥର ଚାମ୍ପିୟନ ଏଟିକେ ମଧ୍ୟରେ ଖେଳାଯିବ। ଏହି ଅବସରରେ ଗାଙ୍ଗୁଲି ଷ୍ଟାଡିୟମରେ ଉପସ୍ଥିତ ରହିବେ। ମୁଁ ଏଥର ଆଏସ୍ଏଲ ଚେହେରା। ଏଣୁ କେରଳ ଓ ଏଟିକେ ମଧ୍ୟରେ ଖେଳାଯିବାକୁ ଥିବା ଉଦ୍ଘାଟନୀ ମ୍ୟାଚ୍ରେ ମୋତେ ଉପସ୍ଥିତ ରହିବାକୁ ପଡ଼ିବ। ଏଥିଯୋଗୁ ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ରାଞ୍ଚିଠାରେ ଖେଳାଯିବାକୁ ଥିବା ୩ୟ ଟେଷ୍ଟରେ ଯୋଗଦେଇ ପାରିବିନାହିଁ ବୋଲି ଗାଙ୍ଗୁଲି ଇଡେନ ଗାର୍ଡେନ୍ସଠାରେ କହିଛନ୍ତି। ଆଇଏସ୍ଏଲ ଉଦ୍ଘାଟନୀ ଉତ୍ସବର ପର ଦିନ ୨୩ ତାରିଖ ଥିବାରୁ ଗାଙ୍ଗୁଲିଙ୍କୁ ମୁମ୍ବାଇରେ ପହଞ୍ଚତ୍ବାକୁ ପଡ଼ିବ। ସେଠାରେ ସେ ବିସିସିଆଇ ଅଧ୍ୟକ୍ଷ ଭାବେ ବାର୍ଷୀକ ସାଧାରଣ ବୈଠକ (ଏଜିଏମ୍)ରେ ଯୋଗଦେବେ। ଉଲ୍ଲେଖଥାଉ କି, ତୃତୀୟ ଟେଷ୍ଟ ୧୯ରୁ ୨୩ ତାରିଖ ପର୍ଯ୍ୟନ୍ତ ରାଞ୍ଚିଠାରେ ଖେଳାଯିବାର ଅଛି। କୌତୁହଳର କଥା ହେଉଛି, ଆଇଏସ୍ଏଲ ଫ୍ରାଞ୍ଚାଇଜ ଆଟ୍ଲେଟିକୋ ଡେ କୋଲକତା (ଏଟିକେ)ର ସହ ମାଲିକ ଗାଙ୍ଗୁଲି। ମୁଁ ଏବେ ମଧ୍ୟ ଏଟିକେ ସହ ଅଛି। ସେମାନଙ୍କ ସହ ଶୀଘ୍ର କଥା ହେବି। ମୋ ନୂଆ ଦାୟିତ୍ୱ ଯୋଗୁ ଆଇପିଏଲ ଫ୍ରାଞ୍ଚାଇଜ ଦିଲ୍ଲୀ କ୍ୟାପିଟାଲ୍ସର ମେଣ୍ଟର ପଦରୁ ତ୍ୟାଗ କରିବାକୁ ପଡ଼ିବ। ମୁଁ କେବଳ ବେଙ୍ଗଲୀ ଟିଭି ଶୋ ‘ଦାଦାଗିରି’ ଓ ବିଜ୍ଞାପନ କରିବି। ଏହାବାଦ୍ ଅନ୍ୟ ସମସ୍ତ କାର୍ଯ୍ୟ ଓ ଚୁକ୍ତିରୁ ମୋତେ ଓହରିବାକୁ ପଡ଼ିବ ବୋଲି ଗାଙ୍ଗୁଲି କହିଛନ୍ତି।
