ଅନୁଗୋଳ ଅଫିସ, ୧୫।୫ – ସଙ୍ଗରୋଧ କେନ୍ଦ୍ରରେ କିପରି ଖାଦ୍ୟ ଦିଆଯିବ ସେ ନେଇ ସରକାରଙ୍କ ଗାଇଡ୍ଲାଇନ୍ ରହିଛି। ହେଲେ ଅନୁଗୋଳ ସହରର ଦୁଇଟି କ୍ବାରାଣ୍ଟାଇନ୍ ସେଣ୍ଟରରେ ଥିବା ୨୭ ପ୍ରବାସୀ ରାତିରେ ଭାତ ବଦଳରେ ରୁଟି ଦେବାକୁ ଦାବିକରି ପୌର ପ୍ରଶାସନକୁ ନାଲି ଆଖି ଦେଖାଇଥିବା ସୂଚନା ମିଳିଛି। ଏପରି କି ରୁଟି ନ ମିଳିଲେ ରାତିରେ ଖାଇବୁ ନାହିଁ ବୋଲି ପ୍ରବାସୀମାନେ ରୋକ୍ଠୋକ୍ କହିବା ପରେ ବାଧ୍ୟହୋଇ ପ୍ରଶାସନ ଦୁଇଦିନ ହେଲା ସେମାନଙ୍କୁ ରାତିରେ ରୁଟି ପରଷୁଥିବା ଜଣାପଡ଼ିଛି।
ପ୍ରକାଶ ଯେ, ଅନୁଗୋଳ ଟାଉନ ହାଇସ୍କୁଲ କ୍ବାରାଣ୍ଟାଇନ୍ ସେଣ୍ଟରରେ ୮ ଜଣ ଓ ବାଳିକା ଉଚ୍ଚ ବିଦ୍ୟାଳୟରେ ୧୯ ଜଣ ପ୍ରବାସୀ ଅଛନ୍ତି। ସରକାରଙ୍କ ନିୟମାବଳୀ ଅନୁଯାୟୀ ସେମାନଙ୍କୁ ଦିନକୁ ୪ଥର ଖାଦ୍ୟ ଦିଆଯାଉଛି। କିନ୍ତୁ ଗତ ଦୁଇ ଦିନ ହେଲା ରାତି ଖାଦ୍ୟକୁ ନେଇ ସେମାନେ ସଙ୍ଗରୋଧ କେନ୍ଦ୍ରରେ ହୋହଲ୍ଲା କରିଥିଲେ। ରାତିରେ ଭାତ ଦିଆ ନ ଯାଇ ରୁଟି ଦେବାକୁ ସେମାନେ ଅଡି ବସିଥିଲେ। ଏ ସର୍ମ୍ପକରେ ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ସରକାରଙ୍କ ନିୟମାବଳୀ ଅନୁଯାୟୀ ପ୍ରବାସୀଙ୍କୁ ସକାଳେ ଚୁଡ଼ା, ଉପମା, ସିମେଇ, ମଧ୍ୟାହ୍ନରେ ଭାତ, ଡାଲମା ସହ ନିରାମିଷ ଓ ସପ୍ତାହକୁ ଦୁଇ ଦିନ ଆମିଷ, ସନ୍ଧ୍ୟାରେ ଚା ସାଙ୍ଗକୁ ମୁଢ଼ି, ମିକ୍ସଚର ଆଦି ଦିଆଯାଉଛି। ରାତିରେ ଭାତ, ଡାଲି ସହ ବିଭିନ୍ନ ପନିପରିବା ତାରକାରି, ଭଜା, ଖଟା ଦେବାକୁ ସରକାରଙ୍କ ପକ୍ଷରୁ ନିର୍ଦ୍ଦେଶ ଅଛି। ଏହାକୁ ଠିକ୍ ଭାବେ ପାଳନ କରାଯାଉଛି। କିନ୍ତୁ ଦୁଇ ସଙ୍ଗରୋଧ କେନ୍ଦ୍ରରେ ଥିବା ପ୍ରବାସୀମାନେ ରାତିରେ ଭାତ ଖାଇବାକୁ ଅନିଚ୍ଛା ପ୍ରକାଶ କରୁଛନ୍ତି। ସେଥିପାଇଁ ଦୁଇ ଦିନ ହେଲା ରାତ୍ରି ସମୟରେ ରୁଟି ଦିଆଯାଉଛି ବୋଲି ପୌର ନିର୍ବାହୀ ଅଧିକାରୀ ପଣ୍ଡା ପ୍ରକାଶ କରିଛନ୍ତି।