ମୁମ୍ବାଇ: ରେଳଷ୍ଟେଶନରେ ଗୀତ ଗାଇ ଗୁଜୁରାଣ ମେଣ୍ଟାଉଥିବା ରାନୁ ମଣ୍ଡଳରୁ ସୋସିଆଲ ମିଡିଆ ସେନ୍ସେଶନ। ରାତାରାତି ବଦଳିଯାଇଥିଲା ରାନୁ ଭାଗ୍ୟ। ଲତା ମଙ୍ଗେସକରଙ୍କ ଗୀତ ‘ଏକ ପ୍ୟାର୍ କା ନଗମା ହୈ’ ଗାଇବା ବେଳର ଏକ ଭିଡିଓ ଭାଇରାଲ ହେବା ପରେ ରାନୁଙ୍କ ଜୀବନର ନୂଆ ଅଧ୍ୟାୟ ଆରମ୍ଭ ହୋଇଛି। ନିକଟରେ ସେ ହିମେଶ ରେଶମିୟାଙ୍କ ସହ ତାଙ୍କର ଏକ ଫିଲ୍ମରେ ଗୀତ ଗାଇଛନ୍ତି। ଉକ୍ତ ଗୀତଟି ମଧ୍ୟ ସମସ୍ତଙ୍କୁ ବେଶ ପସନ୍ଦ ଆସୁଛି। ତେବେ ଏବେ ରାନୁଙ୍କ ଜୀବନକାହାଣୀକୁ ନେଇ ଏକ ଚଳଚ୍ଚିତ୍ର ନିର୍ମାଣ ହେବାକୁ ଯାଉଛି। ନିର୍ମାତା ହୃଷିକେଶ ମଣ୍ଡଳ ଫିଲ୍ମକୁ ନିର୍ମାଣ କରିବାକୁ ଯୋଜନା କରୁଛନ୍ତି। ଏହାର ନାମ ରହିଛି ‘ ପ୍ଲାର୍ଟଫର୍ମ ସିଙ୍ଗର ରାନୁ ମଣ୍ଡଳ’। ଦକ୍ଷିଣ ଭାରତୀୟ ସିନେମାର ଲୋକପ୍ରିୟ ଅଭିନେତ୍ରୀ ସୁଦିପ୍ତା ଚକ୍ରବର୍ତ୍ତୀକୁ ଫିଲ୍ମପାଇଁ ଆପ୍ରୋଚ୍ କରାଯାଇଛି। ସେ ଯଦି ହଁ କୁହନ୍ତି ତେବେ ରାନୁଙ୍କ ଭୂମିକାରେ ତାଙ୍କୁ ଦେଖିବାକୁ ମିଳିବ। ଏପରିକି ରାନୁ ମଧ୍ୟ ଫିଲ୍ମରେ ଅତିଥି କଳାକାର ଭାବେ ଦେଖାଯାଇପାରନ୍ତି।
ଲୋକମାନେ ରାନୁଙ୍କ ବିଷୟରେ ଜାଣିବାକୁ ଚାହାନ୍ତି। ସୋସିଆଲ ମିଡିଆ ଯୋଗୁ ସେ ଆଜି ଷ୍ଟାର। ଫିଲ୍ମରେ ସୋସିଆଲ ମିଡିଆର ଶକ୍ତି କେତେ ତାହା ଦେଖିବାକୁ ମିଳିବ ବୋଲି ନିର୍ଦ୍ଦେଶକ ହୃଷିକେଶ କହିଛନ୍ତି।
ଚଳଚ୍ଚିତ୍ରରେ ରାନୁଙ୍କ ପିଲାଦିନଠାରୁ ଆରମ୍ଭ କରି ବଲିଉଡ୍ରେ ଗୀତ ଗାଇବା ପର୍ଯ୍ୟନ୍ତ ଯାତ୍ରାକୁ ଦେଖାଯିବ। କୋଲକାତା ସହ ବମ୍ବେରେ ମଧ୍ୟ ଫିଲ୍ମର ଶୁଟିଂ କରାଯିବ। ତେବେ ଏହାର ପ୍ରଯୋଜନା ଭାର ସମ୍ଭାଳିବେ ଶୁଭୋଜିତ ମଣ୍ଡଳ। ଫିଲ୍ମଟି ଆସନ୍ତା ବର୍ଷ ଫେବୃୟାରୀରେ ରିଲିଜ ହେବ।