କୋଲକାତା, ୭ା୬ (ପି.ଟି.)- ଖେଳ ପଡ଼ିଆରେ ଆକ୍ରମଣାତ୍ମକ ଆଚରଣ ଯୋଗୁ ଅନେକ ଥର ଅଡୁଆରେ ପଡ଼ିଛନ୍ତି ଦକ୍ଷିଣଆଫ୍ରିକା ସ୍ପିଡ୍ଷ୍ଟର କାଭିସୋ ରାବାଡ଼ା। ଏଥିପାଇଁ ଅନେକେ ତାଙ୍କୁ କ୍ଷଣକୋପୀ ବୋଲି ମଧ୍ୟ କହିଥାନ୍ତି। କିନ୍ତୁ ପ୍ରକୃତରେ ତାହା ନୁହଁନ୍ତି ବୋଲି ଏହି ପେସ୍ ବୋଲର କହିଛନ୍ତି। ଜଣେ ବୋଲର ହୋଇଥିବାରୁ ଏହା ଏକ ପ୍ରକାର ମାନିସକ ଉତ୍ତେଜନା ବୋଲି ସେ କହିଛନ୍ତି। ୨୪ ମାସ ମଧ୍ୟରେ ଚତୁର୍ଥ ଥର ଡିମେରିଟ୍ ପଏଣ୍ଟ ପାଇବା ଦ୍ୱାରା ୨୫ବର୍ଷୀୟ ରାବାଡ଼ା ଚଳିତ ବର୍ଷ ପ୍ରଥମଭାଗରେ ଇଂଲଣ୍ଡ ବିପକ୍ଷ ଅନ୍ତିମ ଟେଷ୍ଟ ମ୍ୟାଚରୁ ସସ୍ପେଣ୍ଡ ହୋଇଥିଲେ। ତୃତୀୟ ଟେଷ୍ଟ ମ୍ୟାଚ୍ରେ ଭ୍ରମଣକାରୀ ଅଧିନାୟକ ଜୋ ରୁଟ୍ଙ୍କ ଉଇକେଟ ନେବା ପରେ ତାଙ୍କ ନିକଟକୁ ଯାଇ ନିଜର ଖୁସି ଜାହିର କରିଥିଲେ। ଏଥିପାଇଁ ତାଙ୍କୁ ୪ର୍ଥ ଡିମେରିଟ୍ ପଏଣ୍ଟ ମିଳିଥିଲା। ଶୁକ୍ରବାର ସେ ତାଙ୍କ ଆଇପିଏଲ୍ ଫ୍ରାଞ୍ଚାଇଜ୍ ଦିଲ୍ଲୀ କ୍ୟାପିଟାଲ୍ସ ସହିତ ଇନଷ୍ଟାଗ୍ରାମ୍ରେ ଚ୍ୟାଟିଂ କରିବା ସମୟରେ ରାବାଡ଼ା କହିଛନ୍ତି, ଯଦି ସ୍ଲେଜିଂକୁ କ୍ରିକେଟ ଖେଳର ଏକ ଅଂଶବିଶେଷ ବୋଲି କୁହାଯାଉଛି ତେବେ ଜଣେ ଫାଷ୍ଟ ବୋଲର ଏକ ଗୁରୁତ୍ୱପୂର୍ଣ୍ଣ ଉଇକେଟ ହାସଲ କଲାପରେ ଖୁସିରେ ପ୍ରତିକ୍ରିୟା କରିବା ସ୍ବାଭାବିକ। ରାବାଡ଼ା ସସ୍ପେଣ୍ଡ ହେବାରୁ ଦକ୍ଷିଣ ଆଫ୍ରିକା ଅନ୍ତିମ ଟେଷ୍ଟରେ ପରାଜିତ ହେବା ସହ ସିରିଜ ୧-୩ରେ ହାରିଯାଇଥିଲା। ଦକ୍ଷିଣ ଆଫ୍ରିକୀୟ ପେସ୍ ବୋଲର ପୂର୍ବରୁ ତାଙ୍କର ଦୁଇଟି ମେରିଟ୍ ପଏଣ୍ଟ ୨୦୧୮ରେ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜରୁ ପାଇଥିଲେ। ଡେଭିଡ ଓ୍ବାର୍ନରଙ୍କୁ ଲକ୍ଷ୍ୟ କରି ସେ ତାଚ୍ଛଲ୍ୟ କରି ହସିଥିଲେ ଏବଂ ଷ୍ଟିଭ୍ ସ୍ମିଥ୍ଙ୍କ କାନ୍ଧକୁ କାନ୍ଧ ଘସି ହୋଇଥିଲେ। ସେହିବର୍ଷ ତୃତୀୟ ଘଟଣାଟିରେ ସେ ଏକ ଅନ୍ତର୍ଜାତୀୟ ଦିନିକିଆରେ ଭାରତର ଶିଖର ଧାଓ୍ବନଙ୍କୁ ଆଉଟ କରିବା ପରେ ତାଙ୍କୁ ଚିଡ଼ାଇବା ଭଳି କଥା କହିଥିଲେ।
