ପାତ୍ରପୁର,୧୮ା୪(ଡି.ଏନ୍.ଏ.)- ପାତ୍ରପୁର ବ୍ଲକ ବରଙ୍ଗ ଗ୍ରାମରେ ରାଶନ କାର୍ଡ଼ଧାରୀଙ୍କୁ ଦାଇତ୍ୱରେ ଥିବା କିଛି କର୍ମଚାରୀ କାର୍ଡ଼ ପିଛା ୧୦୦୦ ଟଙ୍କା ବଦଳରେ ୯୦୦ ଟଙ୍କା ଦେଇଥିବା ଭିଡ଼ିଓ ଭାଇରାଲ ହୋଇଥିଲା। ଏନେଇ ଖବର ପ୍ରକାଶ ପରେ ବ୍ରହ୍ମପୁର ଉପଜିଲାପାଳ ପାତ୍ରପୁର ତହସିଲଦାର ଓ ବିଡ଼ିଓଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ। ତହସିଲଦାର ଡ଼. ଶ୍ରୀନିବାସ ବେହେରା ଓ ବିଡ଼ିଓ ପ୍ରକାଶ ଚନ୍ଦ୍ର ଦାସ ଶୁକ୍ରବାର ଓ ଶନିବାର ବରଙ୍ଗ ଗ୍ରାମରେ ପହଞ୍ଚତ୍ ତଦନ୍ତ କରି ଉପଜିଲାପାଳଙ୍କୁ ରିପୋର୍ଟ ପ୍ରଦାନ କରିଛନ୍ତି। ଗ୍ରାମରେ ମୋଟ ୪୦୦ ପରିବାରଙ୍କ ପାଖରେ ରାଶନକାର୍ଡ଼ ରହିଛି ା ସେହି ଅନୁପାତରେ ସହାୟତା ଦେବା ପାଇଁ ଅର୍ଥ ଆସିଥିଲା। ମାତ୍ର ଗ୍ରାମରେ ବୈଠକ ବସି ପ୍ରତି ରାଶନ କାର୍ଡ଼ରେ ୯୦୦ ଟଙ୍କା ଦେଇ ବଳକା ଅର୍ଥକୁ କାର୍ଡ ପାଇ ନ ଥିବା ୫୨ ପରିବାର ମଧ୍ୟରେ ବଣ୍ଟନ ପାଇଁ ନିଷ୍ପତି ହୋଇଥିଲା। ତେବେ ଭିଡ଼ିଓ ଭାଇରାଲ ପରେ ପୁଣି ଏକ ବୈଠକ ବସି ଗ୍ରାମ କୋଠ ଟଙ୍କାରୁ ୫୦ ହଜାର ବାହାର କରି ଶୁକ୍ରବାର ବଳକା ୫୨ ପରିବାର ମଧ୍ୟରେ ବଣ୍ଟନ କରାଯାଇଛି।