ଢେଙ୍କାନାଳ ଅଫିସ, ୨୭।୪: ଲକ୍ଡାଉନ୍ ନିୟମ କଡ଼ାକଡ଼ି କରାଯିବା ପରେ ବିଶ୍ୱପ୍ରସିଦ୍ଧ ମହିମାଧର୍ମ ପୀଠ ଯୋରନ୍ଦାରେ ରହୁଥିବା ସାଧୁସନ୍ନ୍ୟାସୀଙ୍କ ସମସ୍ୟା ବଢ଼ିଛି। ସାଧାରଣ ଜୀବନଯାତ୍ରା ପ୍ରଭାବିତ ହୋଇଥିବାରୁ ଅତ୍ୟାବଶ୍ୟକ ସାମଗ୍ରୀ ପହଞ୍ଚତ୍ବାରେ ଅସୁବିଧା ସୃଷ୍ଟି ହୋଇଛି। ଏହାର ସମାଧାନ ଲାଗି ଉଦ୍ୟମ କରିଛନ୍ତି ବିଧାୟକ ସୁଧୀର କୁମାର ସାମଲ। ରବିବାର ବିଧାୟକ ଯୋରନ୍ଦାରେ ପହଞ୍ଚତ୍ ମହିମା ସନ୍ନ୍ୟାସୀଙ୍କୁ ଅତ୍ୟାବଶ୍ୟକ ସାମଗ୍ରୀ ସାଙ୍ଗକୁ ମାସ୍କ ପ୍ରଦାନ କରିଛନ୍ତି। ମହିମାଧର୍ମର ପ୍ରଚାରରେ ନିଜକୁ ସମର୍ପିତ କରିଥିବା ସାଧୁସନ୍ନ୍ୟାସୀମାନଙ୍କୁ ରାଶନକାର୍ଡ ତାଲିକାଭୁକ୍ତ କରିବାକୁ ଯଥାସମ୍ଭବ ଉଦ୍ୟମ ଜାରି ରହିଛି। ଏ ସମ୍ପର୍କରେ ଜିଲାପାଳ ଏବଂ ପିଡିଙ୍କ ସହ ଆଲୋଚନା କରିଥିବା ବିଧାୟକ ସୂଚନା ଦେଇଛନ୍ତି।
ବିଧାୟକ ପ୍ରଥମେ ମହିମାଗାଦିସ୍ଥିତ ସତ୍ୟ ଧର୍ମଧାମ ମହିମା ସମାଜର ଆଶ୍ରମକୁ ଯାଇ ସେଠାରେ ବିଭିନ୍ନ ବିଷୟରେ ଆଲୋଚନା କରିଥିଲେ। ପରେ ସାଧୁଙ୍କ ସୁବିଧା ଲାଗି ଜରୁରୀ ସାମଗ୍ରୀ ଓ ମାସ୍କ ପ୍ରଦାନ କରିଥିଲେ। ଆଲୋଚନା ସମୟରେ ଧର୍ମଧାମ ମହିମା ସମାଜର ସମ୍ପାଦକ ନିତ୍ୟାନନ୍ଦ ବାବା, ସୁବ୍ରତ ବାବା, ଦୀନବନ୍ଧୁ ବାବା, ଭଣ୍ଡାର ରକ୍ଷକ ବିଜୟ ଦାସ ପ୍ରମୁଖ ଉପସ୍ଥିତ ଥିଲେ ା ଏହାପରେ ବିଧାୟକ କୌପୀନଧାରୀ ମହିମା ସମାଜ ଆଶ୍ରମକୁ ଯାଇ ଆବଶ୍ୟକ ସାମଗ୍ରୀ ବଣ୍ଟନ କରିଥିଲେ। ବତି ମନ୍ଦିର ପରିସରରେ ବରିଷ୍ଠ ସନ୍ନ୍ୟାସୀ ଅବିନାଶୀ ବାବାଙ୍କ ସହ ଆଲୋଚନା କରିଥିଲେ। ଏହି ଅବସରରେ ପୀଠ ବାହାରେ ସେ ମହିମା ସାଧୁଙ୍କ ସହ ପ୍ରଦୀପ ପ୍ରଜ୍ୱଳନ କରି ମହାମାରୀ କରୋନାରୁ ବିଶ୍ୱବାସୀଙ୍କୁ ରକ୍ଷା କରିବା ପାଇଁ ପ୍ରାର୍ଥନା କରିଥିଲେ। କାର୍ଯ୍ୟକ୍ରମରେ ଜିଲା ବିଜେଡି କୃଷକ ମୋର୍ଚ୍ଚା ସଭାପତି ନରୋତ୍ତମ ସାହୁ, ଯୋରନ୍ଦା ସରପଞ୍ଚ ପ୍ରଶାନ୍ତ କୁମାର ରାଉତ, ବିଧାୟକଙ୍କ ପ୍ରତିନିଧି ଦେବାଶିଷ ମିଶ୍ର, ନିରାକାର ରାଉତ, ସନ୍ତୋଷ ବିଶ୍ୱାଳ, ପ୍ରଦୀପ ରାଉତ, ବିଶ୍ୱନାଥ ଜେନା ପ୍ରମୁଖ ଉପସ୍ଥିତ ଥିଲେ ା