ଦିଗପହଣ୍ଡି,୬ା୧୧(ଡି.ଏନ.ଏ.)-ଦିଗପହଣ୍ଡି ବ୍ଲକ ଅଧୀନ ବିଭିନ୍ନ ଗ୍ରାମାଞ୍ଚଳରେ ରାଶନ କାର୍ଡରୁ ବହୁ ପରିବାର ସଦସ୍ୟଙ୍କ ନାଁ କଟିଯାଇଛି। ଏଥିପାଇଁ ସେମାନଙ୍କୁ ୨ ମାସ ହେଲା ଚାଉଳ ମିଳୁନାହିଁ। ଏହାର ପ୍ରତିବାଦରେ ମଙ୍ଗଳବାର ଭାଜପା ଦିଗପହଣ୍ଡି ମଣ୍ଡଳ କମିଟି ପକ୍ଷରୁ ସ୍ଥାନୀୟ ବ୍ଲକ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। କିନ୍ତୁ ପଦସ୍ଥ ଅଧିକାରୀଙ୍କ ମଧ୍ୟରୁ କେହି ଆଲୋଚନା ପାଇଁ ନ ଆସିବାରୁ ଜାତୀୟ ଖାଦ୍ୟ ସୁରକ୍ଷା ଯୋଜନାରୁ ବାଦ ପଡ଼ିଥିବା ଗୌଡଗାଁ ପଞ୍ଚାୟତର ବହୁ ହିତାଧିକାରୀ ଓ ଦଳୀୟ କର୍ମୀମାନେ ବ୍ଲକ କାର୍ଯ୍ୟାଳୟକୁ ଧସେଇ ପଶିଥିଲେ। ଉପସ୍ଥିତ ବ୍ଲକ ଯୋଗାଣ ଅଧିକାରୀ ସୌଭାଗ୍ୟ କୁମାର ନାୟକଙ୍କୁ ଦୀର୍ଘ ସମୟ ଧରି ଘେରାଉ କରିଥିଲେ। ବ୍ଲକ ସହକାରୀ ଯନ୍ତ୍ରୀ ଇଂ.ଗଙ୍ଗାଧର ଲେଙ୍କା ଓ ଅନ୍ୟାନ୍ୟ କର୍ମଚାରୀ ସେଠାରେ ପହଞ୍ଚତ୍ ଦଳୀୟ ନେତୃବୃନ୍ଦ ପରେଶ ଚନ୍ଦ୍ର ରଥ, ମନୋଜ କୁମାର ପଣ୍ଡା, ଶ୍ରୀକାନ୍ତ ପାଢ଼ୀ ପ୍ରମୁଖଙ୍କୁ ବୁଝାଶୁଝା କରି ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେବାପରେ ପରିସ୍ଥିତି ଶାନ୍ତ ପଡିଥିଲା। ଏ ନେଇ ବିିଡିଓଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଥିଲା।
ଏ ସମ୍ପର୍କରେ ବ୍ଲକ ଯୋଗାଣ ଅଧିକାରୀଙ୍କୁ ପଚାରିବାରୁ ରାଶନକାର୍ଡ ସହ ଆଧାର କାର୍ଡ ସଂଯୋଗ କରାଯାଇ ନ ଥିବାରୁ କାର୍ଡରୁ ହିତାଧକାରୀଙ୍କ ନାଁ କଟିଯାଇଛି। କେବଳ ଗୌଡଗାଁ ପଞ୍ଚାୟତ ନୁହେଁ ବ୍ଲକର ପ୍ରାୟ ୬ ହଜାର ହିତାଧିକାରୀଙ୍କ ନାଁ କଟିିିଯାଇଛି। ବ୍ଲକ ଓ ଏନ୍ଏସି ଅଞ୍ଚଳର ୨୮୨୬୯ ପରିବାରକୁ ରାଶନ କାର୍ଡ ପ୍ରଦାନ କରାଯାଇଛି। ପରିବାରର ଜଣ ପିଛା ୫ କେଜି ଚାଉଳ ଦିଆଯାଉଛି। ସେହିପରି ୩୮୮୫ ହିତାଧିକାରୀଙ୍କୁ ଅନ୍ତୋଦୟ କାର୍ଡରେ ୩୫ କେଜି ଚାଉଳ ଦିିଆଯାଉଛି। ୱାନ କାର୍ଡ ୱାନ ନେଶନ ନୂତନ ନିୟମ ଅନୁଯାୟୀ ରାଶନ କାର୍ଡରେ ଆଧାର କାର୍ଡ ସଂଯୋଗକୁ ବାଧ୍ୟତାମୂଳକ କରାଯାଇଥିବା ସେ କହିଛନ୍ତି।