ଭୁବନେଶ୍ୱର,୨୦।୮(ବ୍ୟୁରୋ): ରଜାତୀୟ ଖାଦ୍ୟ ନିରାପତ୍ତା ଯୋଜନା ଏବଂ ରାଜ୍ୟ ଖାଦ୍ୟ ନିରାପତ୍ତା ସ୍କିମ୍ ହିତାଧିକାରୀମାନେ ଏଣିକି ରାଜ୍ୟର ଯେକୌଣସି ସାଧାରଣ ଖାଉଟି ବଣ୍ଟନ କେନ୍ଦ୍ର(ପିଡିଏସ୍)ରୁ ଚାଉଳ, ଗହମ ଓ କିରୋସିନ ନେଇପାରିବେ। ସେମାନଙ୍କୁ ଆଉ କେବଳ ଜଣେ ଡିଲର ଉପରେ ନିର୍ଭର କରିବାକୁ ପଡ଼ିବ ନାହିଁ କିମ୍ବା ରାଶନ ପାଇଁ ବାରମ୍ବାର ଦୌଡ଼ିବାକୁ ପଡ଼ିବ ନାହିଁ। ରାଶନ କାର୍ଡ ଦେଖାଇ ଯେକୌଣସି ଖାଉଟି କେନ୍ଦ୍ରରୁ ଖାଦ୍ୟ ସାମଗ୍ରୀ ନେଇପାରିବେ। ଆସନ୍ତା ସେପ୍ଟେମ୍ବର ପହିଲାରୁ ପାଇଲଟ ପ୍ରକଳ୍ପ ଭାବେ ଭୁବନେଶ୍ୱର ମହାନଗର ନିଗମ(ବିଏମ୍ସି)ରୁ ଏହି ସୁବିଧା ଆରମ୍ଭ ହେବ। ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ସଚିବ ଏନେଇ ଖୋର୍ଦ୍ଧା ଜିଲାପାଳଙ୍କୁ ଚିଠି ମାଧ୍ୟମରେ ଜଣାଇଦେଇଛନ୍ତି। ତେବେ ଏହି ସୁବିଧା ପାଇବା ପାଇଁ ରାଶନ କାର୍ଡ ହିତାଧିକାରୀଙ୍କୁ ଆଧାର କାର୍ଡ ଏବଂ ଫୋନ୍ ନମ୍ବର ଲିଙ୍କ୍ କରିବାକୁ ପଡ଼ିବ।
ଭୁବନେଶ୍ୱର ମହାନଗର ନିଗମରେ ଥିବା ୬୭ଟି ଓ୍ବାର୍ଡରେ ଏହି ପ୍ରକଳ୍ପ କାର୍ଯ୍ୟକାରୀ ହେବ। ଏହି ଅଞ୍ଚଳରେ ଥିବା ୧୨୭ଟି ସାଧାରଣ ଖାଉଟି ବଣ୍ଟନ କେନ୍ଦ୍ରକୁ ଆଇଆର୍ଆଇଏସ୍ ସ୍କାନର ମେଶିନ ମଧ୍ୟ ଯୋଗାଇ ଦିଆଯିବ। ଆଧାର କାର୍ଡର ଟିପଚିହ୍ନ ମ୍ୟାଚ୍ ନ କଲେ ଉକ୍ତ ମେଶିନ ଜରିଆରେ ଖାଉଟିଙ୍କୁ ଚିହ୍ନଟ କରାଯାଇପାରିବ। ଯେଉଁ ଖାଉଟିଙ୍କର ଆଧାର ସଂଯୋଗ ସମ୍ଭବ ହେବ ନାହିଁ ଅର୍ଥାତ୍ ରୋଗଗ୍ରସ୍ତ, ମାନସିକ ବିକାରଗ୍ରସ୍ତ, ବୃଦ୍ଧାବୃଦ୍ଧଙ୍କୁ ମାର୍କେଟିଂ ଇଣ୍ଟେଲିଜେନ୍ସ (ଏମ୍ଆଇ)ଙ୍କ ସାର୍ଟିଫିକେଟ ଆଧାରରେ ଖାଦ୍ୟ ସାମଗ୍ରୀ ଯୋଗାଇ ଦିଆଯିବ। ଏମ୍ଆଇ ଦେଇଥିବା ସାର୍ଟିଫିକେଟ ଠିକ୍ ଅଛି କି ନାହିଁ ତାହା ବର୍ଷକୁ ୪ ଥର ବିଭାଗୀୟ ସ୍କ୍ବାଡ ଦ୍ୱାରା ସ୍ବତନ୍ତ୍ର ଭାବେ ଯାଞ୍ଚ କରାଯିବ। ଜାଲିଆତି ହୋଇଥିବା ଧରାପଡ଼ିଲେ ସମ୍ପୃକ୍ତ ଏମ୍ଆଇଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପ୍ରଥମ ପର୍ଯ୍ୟାୟରେ ସହରାଞ୍ଚଳରେ ଏହି ବ୍ୟବସ୍ଥା କାର୍ଯ୍ୟକାରୀ ହେବ। ଏହାପରେ ଏହି ବ୍ୟବସ୍ଥା ସମଗ୍ର ରାଜ୍ୟରେ କାର୍ଯ୍ୟକାରୀ କରାଯିବ। ଆଇଆର୍ଆଇଏସ୍ ସ୍କାନର ବାବଦରେ କଣ୍ଟ୍ରୋଲ ଡିଲରଙ୍କୁ ୭୦୦୦ ଟଙ୍କା ରାଜ୍ୟ ସରକାର ଯୋଗାଇ ଦେବେ।
ସେପ୍ଟେମ୍ବର ପହିଲାରୁ ରାଶନ କାର୍ଡଧାରୀ ବିନା ଆଧାର ପଞ୍ଜୀକରଣରେ ଖାଦ୍ୟ ସାମଗ୍ରୀ ନେଇପାରିବେ ନାହିଁ। ଏ ପର୍ଯ୍ୟନ୍ତ ରାଜ୍ୟରେ ୯୬ ପ୍ରତିଶତ ପରିବାର ଆଧାର ପଞ୍ଜୀକରଣ କରିଛନ୍ତି। ଅବଶିଷ୍ଟ ଖୁବ୍ଶୀଘ୍ର ହେବ ବୋଲି ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।