କଲମ୍ବୋ,୨୦।୧୧: ଶ୍ରୀଲଙ୍କାର ନୂଆ ରାଷ୍ଟ୍ରପତି ଗୋଟବାୟା ରାଜପାକ୍ସେ ତାଙ୍କର ପ୍ରଥମ ବିଦେଶ ଗସ୍ତରେ ଭାରତକୁ ଆସିବେ ବୋଲି ଜଣାପଡିଛି। ଭାରତର ବର୍ହିିର୍ବ୍ୟାପାର ମନ୍ତ୍ରୀ ଏସ. ଜୟଶଙ୍କର ଶ୍ରୀଲଙ୍କା ଗସ୍ତ ସମୟରେ ଏଭଳି ନିଷ୍ପତି ନିଆଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଥମେ ରାଜପାକ୍ସେ ଭାରତ ଗସ୍ତରେ ଆସନ୍ତୁ ନିମନ୍ତ୍ରଣ କରିଥିଲେ। ଯାହାକୁ ମାନିନେଇଛନ୍ତି ଶ୍ରୀଲଙ୍କା ରାଷ୍ଟ୍ରପତି। ଆସନ୍ତା ୨୯ ତାରିଖରେ ସେ ଭାରତ ଆସିବେ ବୋଲି ସହମତି ପ୍ରକାଶ କରିଛନ୍ତି। ଏ ସମ୍ପର୍କରେ ଏସ. ଜୟଶଙ୍କର ଟୁଇଟ ଯୋଗେ ସୂଚନା ଦେଇଛନ୍ତି। ଏସଏଲପିପିର ରାଜପାକ୍ସେ ଶ୍ରୀଲଙ୍କ ରାଷ୍ଟ୍ରପତି ଭାବେ ନିକଟରେ ଶପଥ ନେବା କ୍ଷଣି ଭାରତର ବର୍ହିିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କର ତାଙ୍କୁ ସାକ୍ଷାତ କରିବା ପାଇଁ ଶ୍ରୀଲଙ୍କା ଗସ୍ତ କରିଥିଲେ। ସେଠାରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାର୍ତ୍ତା ରାଜପାକ୍ସେଙ୍କ ପାଖରେ ପହଞ୍ଚାଇଥିଲେ। ମୋଦି ତାଙ୍କୁ ଭାରତ ନିମନ୍ତ୍ରଣ କରିଥିବା କଥା ରାଜପାକ୍ସେ ଶୁଣିବା ପରେ ତୁରନ୍ତ ହଁ ଭରିଥିଲେ।