କାମାକ୍ଷାନଗର, ୧୭।୯(ଡି.ଏନ୍.ଏ.) – ଢେଙ୍କାନାଳ ଜିଲା କାମାକ୍ଷାନଗର ଉପଖଣ୍ଡରେ ଥିବା ବିଭିନ୍ନ ଥାନା, ଫାଣ୍ଡିକୁ ମିଳିଥିବା ପୋଲିସ ଚେକ୍ପୋଷ୍ଟ ବ୍ୟବହାରରେ ଆସୁନାହିଁ। ଚେକ୍ପୋଷ୍ଟଗୁଡ଼ିକ ପରିତ୍ୟକ୍ତ ଅବସ୍ଥାରେ ଲଟାବୁଦାରେ ପଡ଼ି ନଷ୍ଟ ହେଉଛି।
ଜିଲାର ଆଦର୍ଶ ଥାନାର ମାନ୍ୟତା ପାଇଛି କାମାକ୍ଷାନଗର। ଏଥିସହ ଉପଖଣ୍ଡ ଅଧୀନରେ ଭୁବନ, କଙ୍କଡ଼ାହାଡ଼, ତୁମୁସିଙ୍ଗା, ପରଜଙ୍ଗ ଥାନା ଆସୁଛି। ଏହାକୁ ବାଦ୍ଦେଲେ ଆଇନଶୃଙ୍ଖଳା ପରିସ୍ଥିତି ଏଡ଼ାଇବାକୁ ସରାଙ୍ଗ, ଦଦରାଘାଟି, ସୁରପ୍ରତାପପୁର, ପଣ୍ଡୁଆ, ସାଆନ୍ଦା, ମହାବିରୋଡ଼ ଫାଣ୍ଡି କାର୍ଯ୍ୟ କରୁଛି। କଙ୍କଡ଼ାହାଡ଼, ତୁମୁସିଙ୍ଗା ବ୍ୟତୀତ ଅନ୍ୟସବୁ ଥାନା ୫୩ନଂ. ଜାତୀୟ ରାଜପଥ ପାର୍ଶ୍ୱରେ ଅବସ୍ଥିତ। ଦୁର୍ଘଟଣାପ୍ରବଣ ଅଞ୍ଚଳରେ ଗାଡ଼ିର ବେଗ କମାଇବା, ନିୟମିତ ତନଖି କାର୍ଯ୍ୟରେ ଚେକ୍ପୋଷ୍ଟଗୁଡ଼ିକ ବ୍ୟବହୃତ ହୋଇଥାଏ। ଉଭୟ ସରକାରୀ ଏବଂ ବେସରକାରୀ ସଂସ୍ଥା ସୌଜନ୍ୟରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ଚେକ୍ପୋଷ୍ଟଗୁଡ଼ିକୁ ପୋଲିସକୁ ଦିଆଯାଇଛି। ହେଲେ ଏହାର ଉଦ୍ଦେଶ୍ୟ ପୂରଣ ହେଉନାହିଁ। ଉପଖଣ୍ଡର ଅଧିକାଂଶ ଥାନା ଫାଣ୍ଡିରେ ଏସବୁକୁ ବ୍ୟବହାର ନ କରି ଏତେତେଣେ ପକାଇ ଦିଆଯାଉଛି।
ଏହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ଢେଙ୍କାନାଳ-କାମାକ୍ଷାନଗର ରାସ୍ତାର ପଣ୍ଡୁଆ କଲେଜ ନିକଟରେ। ପଣ୍ଡୁଆ ଫାଣ୍ଡିକୁ ପ୍ରଦାନ କରାଯାଇଥିବା ପୋଲିସ ଚେକ୍ପୋଷ୍ଟ ଦୟନୀୟ ଭାବେ ରାସ୍ତାକଡ଼ରେ ଗଡ଼ୁଛି। ସେହିପରି କାମାକ୍ଷାନଗର ଆଦର୍ଶ ଥାନା ସମ୍ମୁଖରେ ଗଦା ହୋଇ ରହିଛି ଟ୍ରାଫିକ୍ ନିୟନ୍ତ୍ରଣରେ ବ୍ୟବହୃତ ଏହି ଗୁରୁତ୍ୱପୂର୍ଣ୍ଣ ସାମଗ୍ରୀ। ସରକାର ଆପରାଧିକ କାର୍ଯ୍ୟକଳାପ ରୋକିବା ଦିଗରେ ବିପୁଳ ଅର୍ଥ ବିନିଯୋଗ କରୁଥିଲେ ମଧ୍ୟ ଏହାକୁ ପୋଲିସ ହେୟଜ୍ଞାନ କରୁଥିବାରୁ ଅସନ୍ତୋଷ ବଢ଼ିବାରେ ଲାଗିଛି। ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏ ନେଇ ଅତିରିକ୍ତ ଏସ୍ପି ହରେକୃଷ୍ଣ ପ୍ରଧାନ କୁହନ୍ତି, ସରକାରୀସୂତ୍ରରେ ଏବଂ କେତେକ ବେସରକାରୀ ସଂସ୍ଥାର ସୌଜନ୍ୟରୁ ପୋଲିସ ଚେକ୍ପୋଷ୍ଟଗୁଡ଼ିକ ମିଳିଛି। ସେଗୁଡ଼ିକୁ ଆବଶ୍ୟକସ୍ଥଳେ ବ୍ୟବହାର କରାଯାଏ। କେତେକ ନଷ୍ଟ ହୋଇଯାଇଛି। ସେଗୁଡ଼ିକ ହୁଏତ ପଡ଼ିଥାଇପାରେ। ଆଗାମୀ ଦିନରେ ଏଥିପ୍ରତି ଯତ୍ନବାନ ହେବାକୁ ନିର୍ଦ୍ଦେଶ ଦିଆଯିବ।