ବ୍ରହ୍ମପୁର ଅଫିସ, ୨୩।୮- ଗଞ୍ଜାମ ଜିଲା ବୈଦ୍ୟନାଥପୁର ଥାନା କୋର୍ଟପେଟା ଛକ ରାସ୍ତାକଡ଼ରେ ଶୁକ୍ରବାର ଜଣେ ମହିଳା ଶିଶୁକନ୍ୟା ପ୍ରସବ କରିଛନ୍ତି। ସେ ହେଲେ ଜରଡ଼ା ଥାନା ଅନ୍ତର୍ଗତ ସାମନ୍ତିଆପଲ୍ଲୀର କେ. ପାର୍ବତୀ(୨୫)। ଏବେ ଉଭୟ ମା ଓ ଶିଶୁ ସୁସ୍ଥ ଥିବା ଡାକ୍ତର କହିଛନ୍ତି।
ସୂଚନାନୁଯାୟୀ, ଶୁକ୍ରବାର ସକାଳେ ପାର୍ବତୀ ଗର୍ଭଯନ୍ତ୍ରଣା ଅନୁଭବ କରିଥିଲେ। ତେଣୁ ତାଙ୍କ ସ୍ବାମୀ, ପାର୍ବତୀ ଓ ୪ ବର୍ଷର ଶିଶୁ ଗାଁରୁ ଗାଡିରେ ଆସି ବ୍ରହ୍ମପୁରରେ ପହଞ୍ଚିଥିଲେ। କୋର୍ଟପେଟା ଛକରେ ସ୍ତ୍ରୀ ଓ ପୁଅକୁ ଛିଡ଼ାକରି ତାଙ୍କ ସ୍ବାମୀ ନିକଟରେ ଥିବା ବାଲାଜି ଡାଏଗ୍ନୋଷ୍ଟିକ୍ ସେଣ୍ଟରକୁ ଏକ ମେଡିକାଲ ରିପୋର୍ଟ ଆଣିବାକୁ ଯାଇଥିଲେ। ପାର୍ବତୀ ରାସ୍ତାକଡ଼ରେ ଠିଆ ହୋଇଥିବା ବେଳେ ହଠାତ୍ ତାଙ୍କର ଯନ୍ତ୍ରଣା ହୋଇଥିଲା ଏବଂ ସେ ତଳେ ବସି ପଡିଥିଲେ। ନିକଟରେ ଠିଆହୋଇଥିବା ମହିଳାମାନେ ସେଠାରେ ରୁଣ୍ଡହୋଇ ମହିଳାଙ୍କ ଚାରିପଟେ କପଡ଼ା ଘେରାଇ ଜଗି ରହିଥିଲେ। ପରେ ପାର୍ବତୀ ସେଠାରେ ଶିଶୁକନ୍ୟା ପ୍ରସବ କରିଥିଲେ। ଖବର ପ୍ରଚାରିତ ହେବା ପରେ ସ୍ଥାନୀୟ କେତେଜଣ ସ୍ବେଚ୍ଛାସେବୀ ସେଠାରେ ପହଞ୍ଚିି ୧୦୮ ଆମ୍ବୁଲାନ୍ସ ଯୋଗେ ମହିଳାଙ୍କୁ ଏମ୍କେସିଜି ମେଡିକାଲ ପଠାଇଥିବା ଜଣାପଡ଼ିଛି। ସେଠାରେ ତାଙ୍କର ଚିକିତ୍ସା ଚାଲିଛି।