କେନ୍ଦୁଝର,୨୨ା୨(ସ୍ବ.ପ୍ର.): କେନ୍ଦୁଝର ଜିଲାର ବାଟେଘାଟେ ଓ ହାଟବଜାରରେ ଏବେ ଗିଲିରି ଫୁଲର ଆସର ଦେଖିବାକୁ ମିଳୁଛି। ଏହି ଋତୁରେ ଗିଲିରି ଫୁଲ ଫୁଟେ। ଏହି ଫୁଲ ଫୁଟି ଜଙ୍ଗଲାଞ୍ଚଳ ତଥା ବାଡ଼ିବଗିଚାର ଶୋଭାବର୍ଦ୍ଧନ କରେ। ତେବେ ଅନେକେ ଏହି ଗିଲିରି ଫୁଲ କିଣି ଖାଦ୍ୟ ଭାବେ ବ୍ୟବହାର କରିଥାନ୍ତି। ପ୍ରାକୃତିକ ପରିବେଶରେ ଫୁଟୁଥିବା ଏହି ଫୁଲର ସ୍ବାଦ ନିଆରା ଓ ସ୍ବାସ୍ଥ୍ୟ ପକ୍ଷେ ହିତକର ମଧ୍ୟ। ଏଣୁ ଏହି ବନବାସୀଙ୍କ ଖାଦ୍ୟ ଏବେ ଗ୍ରାମ ଓ ସହରର ଘରେ ଘରେ ପହଞ୍ଚିଯାଇଛି। ଏପରିକି ଆସୁଥିବା ପର୍ଯ୍ୟଟକ ମାନେ ମଧ୍ୟ ଏହାକୁ କିଣି ଘରକୁ ନେଉଥିବା ଦେଖିବାକୁ ମିଳୁଛି। ଏହାକୁ କିଏ ଚାଉଳ ବଟା ବା ବେସନରେ ମିଶାଇ ଭଜା କରେ ତ କିଏ ଶାଗ ଭଳି ଭାଜି ଖାଇଥାନ୍ତି। ବନବାସୀମାନେ ଏହାକୁ ଗଛରୁ ତୋଳି ଆଣି ଭାଗ ୧୦ରୁ ୨୦ ଟଙ୍କାରେ ବିକି ଦୁଇ ପଇସା ଉପାର୍ଜନ କରି ତେଲଲୁଣ କିଣି ଚଳନ୍ତି। ବିଶେଷ କରି ବଣଜଙ୍ଗଲ ପୂର୍ଣ୍ଣ ବାଂଶପାଳ, ତେଲକୋଇ, ହରିଚନ୍ଦନପୁର ଆଦି ଅଞ୍ଚଳର ବଣଜଙ୍ଗଲରେ ଅଧିକ ମିଳିଥାଏ। ଅନ୍ୟ ବନଜାତ ଦ୍ରବ୍ୟ ଭଳି ଗିଲିରି ଫୁଲ ଆଜିକାଲି ବନବାସୀଙ୍କ ଜୀବିକା ନିର୍ବାହରେ ସହାୟକ ହୋଇପାରୁଥିବା ବେଳେ ଏହା ସୁସ୍ବାଦୁ ଏବଂ ସ୍ବାସ୍ଥ୍ୟ ପକ୍ଷେ ହିତକର ହୋଇଥାଏ ବୋଲି କବିରାଜ ବିଶାରଦ ହରେକୃଷ୍ଣ ମହାନ୍ତ କହିଛନ୍ତି।