ବାହାନଗା, ୨୮ା୯(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ବରିପଦା ପଞ୍ଚାୟତ ତଳକରଞ୍ଜାବିନ୍ଧା ଗ୍ରାମର ୨ ନମ୍ବର ୱାର୍ଡର ମୁଖ୍ୟ ରାସ୍ତାରେ ଏବେ ବର୍ଷା ପାଣି ଲହଡି ଖେଳୁଛି। ଏହା ନିଷ୍କାସନ ହୋଇପାରୁ ନ ଥିବାରୁ ଗ୍ରାମବାସୀ ଶୁକ୍ରବାର ରାସ୍ତାରେ ଧାନଗଛ ରୋଇ ପ୍ରତିବାଦ ଜଣାଇଛନ୍ତି।
ଯାଗେଶ୍ୱରପଦାଠାରୁ ଉପରକରଞ୍ଜାବିନ୍ଧା ଗ୍ରାମ, ତଳକରଞ୍ଜାବିନ୍ଧା ଗ୍ରାମ ମଧ୍ୟ ଦେଇ ଗିଲିଦା ଛକ ପର୍ଯ୍ୟନ୍ତ ମୋଟ ୪ କି.ମି. ୩ଶହ ମିଟର ରାସ୍ତା ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନାରେ ନିର୍ମାଣ ହୋଇଛି। ତେବେ ୨ନମ୍ବର ୱାର୍ଡରେ ଆରମ୍ଭରୁ ୪୦ ମିଟର ରାସ୍ତା କାମ ନ ହୋଇ ପଡିରହିଛି। ସେହି ରାସ୍ତାରେ ପାଣି ଜମି ରହିବା ଫଳରେ ଲୋକମାନେ ବର୍ଷା ଦିନରେ ନାହିଁ ନ ଥିବା ହଇରାଣ ହେଉଛନ୍ତି। ୪୦ ମିଟର ରାସ୍ତାର କିଛି ଅଂଶ ଜବରଦଖଲ ହୋଇଥିବାରୁ ରାସ୍ତା ୧୨ ଫୁଟ ଚଉଡା ନ କରି ଠିକାଦାର ଛାଡି ଦେଇଛନ୍ତି। ଫଳରେ ସେହି ସ୍ଥାନରେ ରାସ୍ତା କାମ ହୋଇପାରିନାହିଁ। କାମ ହେବା ପୂର୍ବରୁ ଗ୍ରାମବାସୀ ଜିଲାପାଳ ଓ ବାହାନଗା ତହସିଲଦାରଙ୍କୁ ମାପକରି ସରକାରୀ ଜମି ବାହାର କରିବା ପାଇଁ ଅଭିଯୋଗ କରିଥିଲେ ମଧ୍ୟ ଏଥିପ୍ରତି ଗୁରୁତ୍ୱ ଦିଆଯାଇ ନ ଥିଲା। ଫଳରେ ରାସ୍ତା କାମ କରୁଥିବା ଠିକାଦାର ସଂସ୍ଥା ରାସ୍ତା ପାଇଁ ସ୍ଥାନ ଯେତିକି ଆବଶ୍ୟକ ନ ପାଇ ୪୦ ମିଟର ରାସ୍ତା କାମ ନ କରି ଛାଡି ଦେଇ ଆଗକୁ କରିବାରୁ ସେହି ସ୍ଥାନରେ ପାଣି ନିଷ୍କାସନ ହୋଇପାରୁନାହିଁ। ଫଳରେ ୨ନମ୍ବର ଓ ୩ ନମ୍ବର ୱାର୍ଡବାସୀ ଅସୁବିଧାର ସମ୍ମୁଖୀନ ହେଉଛନ୍ତି। ଏଥିପାଇଁ ଶୀଘ୍ର ଡ୍ରେନେଜ ବ୍ୟବସ୍ଥା କରିବା ପାଇଁ ଦାବି କରାଯିବା ସହିତ ୨ନମ୍ବର ୱାର୍ଡରେ ଜବରଦଖଲ ଉଚ୍ଛେଦ କରି ରାସ୍ତା ନିର୍ମାଣ କରିବା ପାଇଁ ଗ୍ରାମର ଭଗବାନ ଚରଣ ବେହେରା, ପ୍ରଭାକର ବେହେରା, ହରେନ୍ଦ୍ର ବେହେରା, ମାୟାଧର ବେହେରା, ଯୁଦ୍ଧିଷ୍ଟିର ବେହେରା,କୃଷ୍ଣ ଚନ୍ଦ୍ର ବେହେରା,ସୀତାମଣୀ ବେହେରା, ଭରତ ଚନ୍ଦ୍ର ବେହେରା, ମୁକ୍ତିକାନ୍ତ ବେହେରା, ଭାଗବତ ବନ୍ଧ, ବସନ୍ତ ବେହେରା, ଯଶୋଦାମଣି ବନ୍ଦ ପ୍ରମୁଖ ଦାବି କରିଛନ୍ତି।