ଯୋଡ଼ା, ୯।୮(ଡି.ଏନ.ଏ.)-କେନ୍ଦୁଝର ଜିଲା ଯୋଡା ସହର ଦେଇ ଯାଇଥିବା ରାଜ୍ୟ ରାଜପଥ ନଂ ୨ ମୁଖ୍ୟ ରାସ୍ତାରେ ଟ୍ରକ, ଡମ୍ପର ଦ୍ୱାରା ପରିବହନ ହେଉଥିବା ଲୁହାପଥର ଗୋଲି ପିଲେଟ୍ ରାସ୍ତାରେ ପଡୁଥିବାରୁ ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି। ପୂର୍ବରୁ ଏପରି ଅଭିଯୋଗ ହୋଇଥିଲା। ଜିଲା ପ୍ରଶାସନ ତରଫରୁ କଡ଼ା ନିୟମ ମଧ୍ୟ ଗ୍ରହଣ କରାଯାଉଥିଲା। କିନ୍ତୁ ଏହି ନିୟମକୁ ଧୀରେ ଧୀରେ ସମସ୍ତେ ଅବମାନନା କରୁଥିବା ଦେଖାଦେଇଛି। ଯୋଡା ସହର ମଧ୍ୟ ଦେଇ ଯାଇଥିବା ଏହି ରାଜପଥର ବାଂଶପାଣି ଓଭରବ୍ରିଜ୍, ମଙ୍ଗଳାମନ୍ଦିର ଛକ ଓ ମହାବୀର ଛକ, ଧରଣୀଧର ଛକ,ଷ୍ଟେଟ୍ ବ୍ୟାଙ୍କ ଛକ, ଠାରେ ବିପୁଳ ପରିମାଣରେ ଏହି ଲୁହାପଥର ଗୋଲି(ପିଲେଟ୍) ଟ୍ରକରୁ ଖସି ପଡିଥିବାରୁ ଦୁଇ ଚକିଆ ଯାନ, ସାଇକେଲ୍ ଆରୋହୀ ଏପରିକି ପଥଚାରୀମାନେ ମଧ୍ୟ ଯାତାୟାତରେ ହଇରାଣ ହେଉଛନ୍ତି।
ଏକାଧିକ ଦୁଇ ଚକିଆ ଗାଡି ଉକ୍ତ ପିଲେଟ୍ରେ ଖସଡା ଖାଇ ଦୁର୍ଘଟଣାଗ୍ରସ୍ତ ହେଉଥିବା ଖବର ରହିଛି ା ପିଲେଟ୍ ଗୁଡିକୁ ସଂପୃକ୍ତ କମ୍ପାନୀ ପକ୍ଷରୁ ଝାଡୁ ମରାଯାଇ ରାସ୍ତା କଡରେ ଜମା କରି ରଖାଯାଉଥିବାରୁ ଅସୁବିଧା ହେଉଛି। ଅତୀତରେ ସହରରେ ଏହି ପିଲେଟ୍ ପଡିବା ଘଟଣାକୁ କେନ୍ଦ୍ର କରି ବିଭିନ୍ନ ସମୟରେ ରାସ୍ତା ରୋକୋ , ଜନଆନ୍ଦୋଳନ ହୋଇଥିଲା। ପ୍ରଶାସନ ପକ୍ଷରୁ ଏନେଇ କଡା ନିୟମ ଜାରି କରାଯାଇଥିଲା ା ଚମ୍ପୁଆ ଉପଜିଲାପାଳ ପାରୁଲ୍ ପଟାଓ୍ବାରୀ ସମ୍ପୃକ୍ତ ପରିବହନ ଠିକା ସଂସ୍ଥା ମାନଙ୍କ ଉପରେ କଟକଣା ଜାରି କରିଥିଲେ ା ପରିବହନ ବେଳେ ଘୋଡଣି ଲଗାଇବା ଏବଂ ଟ୍ରକରୁ ଯେପରି ପିଲେଟ୍ ଗୋଲି ନଖସିବ ସେଥିପାଇଁ ଆବଶ୍ୟକ ବ୍ୟବସ୍ଥା ଗ୍ରହଣ କରି ପରିବହନ କରିବା ପାଇଁ ନିର୍ଦ୍ଦେଶ କରାଯାଇଥିଲା। ହେଲେ ବର୍ତ୍ତମାନ ଏହା ପ୍ରଶାସନର ନଜର ଆଢୁଆଳରେ ରହୁଥିବାରୁ ପରିବହନ ଠିକା ସଂସ୍ଥା ମାନେ ବେପରୁଆ ଭାବେ ପିଲେଟ୍ ପରିବହନ କରୁଛନ୍ତି। ଯାହା ଫଳରେ ସାଧାରଣ ଲୋକେ ହଇରାଣ ହେଉଛନ୍ତି। ତେଣେ କିଛି ପିଲେଟ ପରିବହନକାରୀ ସଂସ୍ଥା ଅଞ୍ଚଳର କେତେକ ଗୁଣ୍ଡା ଶ୍ରେଣୀୟ ଲୋକଙ୍କୁ ନିଯୁକ୍ତି ଦେଇ ସାଧାରଣ ଲୋକଙ୍କର ପ୍ରତିବାଦର ସ୍ବରକୁ ଧମକ ଦେଇ ଦମନ କରୁଥିବା ଅଭିଯୋଗ ହୋଇଛି। ଏସମ୍ପର୍କରେ ଯୋଡାର ବରିଷ୍ଠ ନାଗରିକ ସୋମନାଥ ମହାନ୍ତି ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ପିଲେଟ୍ ଗୁଡିକ ବୃତ୍ତାକାର ହୋଇଥିବାରୁ ଗୋଡ ଖସିଯାଇ ବହୁ ଲୋକ ଆହତ ହେଉଛନ୍ତି। ପ୍ରଶାସନ ଏଥିପ୍ରତି ତୁରନ୍ତ ଦୃଷ୍ଟି ଦେବା ପାଇଁ ଯୋଡା ଅଞ୍ଚଳବାସୀ ଦାବି କରିଛନ୍ତି।