ଢେଙ୍କାନାଳ ଅଫିସ, ୨୯।୪ – ‘ମୁଁ ହେଉଛି ଯମରାଜ। ଆଜି ମଇଁଷି ଆଣିନି। ମୋ ସାଙ୍ଗରେ କରୋନା ଆଣିଛି। ଟିକେ ଫାଙ୍କା ପାଇଲେ କରୋନା ମାଡ଼ି ବସିବ।’ ମଙ୍ଗଳବାର ଏପରି ସତର୍କବାଣୀ ଶୁଣିବାକୁ ମିଳିଥିଲା ଢେଙ୍କାନାଳ ସହରରେ। ଲକ୍ଡାଉନ ନିୟମ ଭଙ୍ଗକରି ରାସ୍ତାରେ ବୁଲୁଥିବା ବଗୁଲିଆଙ୍କୁ ଯମରାଜ ଏବଂ କରୋନା ବେଶଧାରୀ କଳାକାର ଏଭଳି ଅଭିନବ ଢଙ୍ଗରେ ସତର୍କ କରାଇଥିଲେ। ନୋଭେଲ କରୋନା ଭାଇରସ୍ କବଳରୁ ସୁରକ୍ଷିତ ରହିବାକୁ ଢେଙ୍କାନାଳ ବିଜୁ ଜନତା ଦଳ ପକ୍ଷରୁ ଏପରି ଅଭିନବ କାର୍ଯ୍ୟକ୍ରମ ଆୟୋଜନ କରାଯାଇଥିବାବେଳେ ଏହାକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
ବିଧାୟକ ସୁଧୀର କୁମାର ସାମଲଙ୍କ ଉପସ୍ଥିତିରେ ଯମରାଜ ବେଶରେ ଦେବାଶିଷ ମିଶ୍ର ଏବଂ କରୋନା ବେଶରେ ବିନୋଦ ମହାନ୍ତି ସ୍ଥାନୀୟ ରଥଗଡ଼ାଠାରୁ ବାଜିଚୌକ ଯାଏ ଚାଲିଚାଲି ଜନସାଧାରଣଙ୍କୁ ସଚେତନ କରାଇଥିଲେ। କରୋନା ସଂକ୍ରମଣ ରୋକିବା ଲାଗି ମାସ୍କ ପିନ୍ଧିବା, ସାମାଜିକ ଦୂରତ୍ୱ ରକ୍ଷା କରିବା, ଜରୁରୀ କାର୍ଯ୍ୟ ନ ଥିଲେ ପଦାକୁ ନ ବାହାରିବା, ସାବୁନରେ ହାତକୁ ଭଲଭାବେ ଧୋଇବା, ଲକ୍ଡାଉନ୍ ନିୟମ କଡ଼ାକଡ଼ି ଭାବେ ପାଳନ କରିବା ପାଇଁ ସେମାନେ ନିବେଦନ କରିଥିଲେ। ସାମାନ୍ୟ ଭୁଲ୍ ପାଇଁ କରୋନା ସମସ୍ତଙ୍କୁ ଗ୍ରାସ କରିବ ବୋଲି କଳାକାରମାନେ ଚେତାବନୀ ଦେଇଥିଲେ। ବାଜିଚୌକ୍ରେ ଏହି କାର୍ଯ୍ୟକ୍ରମ ଉଦ୍ଯାପିତ ହୋଇଥିଲା। ଏହି ଅବସରରେ କରୋନା ଯୋଦ୍ଧା ଟାଉନ ଥାନାଧିକାରୀ ଜ୍ଞାନରଞ୍ଜନ ସାମଲଙ୍କ ସମେତ ଗଣମାଧ୍ୟମ ପ୍ରତିନିଧିଙ୍କୁ ସମ୍ବର୍ଦ୍ଧିତ କରାଯାଇଥିଲା। ବିଜେଡି ନେତା ନରୋତ୍ତମ ସାହୁ, ଇନ୍ଦ୍ରମଣି ବେହେରା, ସାଇଶ୍ରୀ ପଟ୍ଟନାୟକ, ସାଗରିକା ମିଶ୍ର, ଦେବୀ ପ୍ରସାଦ ଭୂତିଆ, ସୁରଜ ମହାପାତ୍ର, ଶ୍ରୀକାନ୍ତ ଧଳ, ନିରାକାର ରାଉତ, ଅବିନାଶ ଜେନା, ଶଶିକାନ୍ତ ମିଶ୍ର ପ୍ରମୁଖ ଉପସ୍ଥିତ ଥିଲେ। ଏହାପରେ ଜିଲା କାର୍ଯ୍ୟାଳୟରେ ଦୁଇ କଳାକାର ଅଭିନୟ ମାଧ୍ୟମରେ ଅଧିକାରୀ ଏବଂ କର୍ମଚାରୀଙ୍କୁ ସଚେତନ କରାଇଥିଲେ। ଜିଲାପାଳ ଭୂମେଶ ଚନ୍ଦ୍ର ବେହେରା, ଅତିରିକ୍ତ ଜିଲାପାଳ ଭବେଶ ନାୟକ, ପୌର ନିର୍ବାହୀ ଅଧିକାରୀ ଅତନୁ ସାମନ୍ତ ପ୍ରମୁଖ ଉପସ୍ଥିତ ଥିଲେ।