ଜୟପୁର: ରାସ୍ତା ଉପରେ ପଡ଼ିଛି ୧୦ ଟଙ୍କିଆ ନୋଟ୍। ଲକ୍ଡାଉନ ବେଳେ ଏମିତି ଏକ ଖବର ଶୁଣି ଲୋକେ ଭୟଭୀତ ହୋଇ ଯାଇଥିଲେ। ହୁଏତ ନୋଟ୍ ମାଧ୍ୟମରେ କେହି କରୋନା ଭାଇରସ୍ ସଂକ୍ରମଣ କରାଇବାକୁ ଚାହୁଁଥିବ ଭାବି ସତର୍କ ହୋଇଯାଇଥିଲେ। ଏମିତି ଏକ ଖବରକୁ ନେଇ ଏବେ ଚର୍ଚ୍ଚା ହେଉଛି ରାଜସ୍ଥାନର ଯୋଧପୁର ଅନ୍ତର୍ଗତ ଚୋପାସନୀ ହାଉସିଂ ବୋର୍ଡ ଥାନା ଅଞ୍ଚଳରେ। ସ୍ଥାନୀୟ ପୋଲିସ ଏଭଳି ଏକ ଖବର ବିଷୟରେ ଜାଣିବା ପରେ ଛାନ୍ଭିନ୍ ଆରମ୍ଭ କରିଛି। ପ୍ରକୃତ କଥା ହେଉଛି ଲୋକେ ହଠାତ୍ ଶୁଣିବାକୁ ପାଇଥିଲେ ଯେ, କିଛିଲୋକଙ୍କ ଘର ବାହାରେ ଥିବା ଚିଠି ବାକ୍ସ ଏବଂ ରାସ୍ତା ଉପରେ ୧୦ ଟଙ୍କିଆ ନୋଟ ସବୁ ପଡ଼ିଛି। ଏହି ଖବର ଶୁଣି ଲୋକେ ଭାବିଥିଲେ ଯେ, କେହିଜଣେ ସମ୍ପୃକ୍ତ ଅଞ୍ଚଳରେ କରୋନା ଭାଇରସ୍ ସଂକ୍ରମଣ କରାଇବା ପାଇଁ ଏପରି କରିଛି। ତେଣୁ ତୁରନ୍ତ ପୋଲିସକୁ ଖବର ଦେଇଥିଲେ। ତେଣୁ ପୋଲିସ ଘଟଣାସ୍ଥଳରେ ପହଞ୍ଚି ସତର୍କତାର ସହ ନୋଟଗୁଡ଼ିକୁ ଏକତ୍ର କରି ଜଳାଇଦେବାକୁ ଚେଷ୍ଟା କରିଥିଲା। କିନ୍ତୁ ନୋଟ ଜଳାଇବା ବେଳେ ଜଣାପଡ଼ିଥିଲା କି ସେସବୁ ନକଲି ନୋଟ୍ ଥିଲା। ତେବେ କିଏ ଏଭଳି କେଉଁ ଉଦ୍ଦେଶ୍ୟରେ କରିଥିଲା ସେନେଇ କିଛି ଜଣାପଡ଼ି ନାହିଁ। ଟଙ୍କା ଜଳାଇବାର ଏଭଳି ଭିଡିଓ ଏବଂ ତଥ୍ୟ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି।