ଭଣ୍ଡାରିପୋଖରୀ, ୮।୩(ଡି.ଏନ.ଏ.)-ଭଣ୍ଡାରିପୋଖରୀ ବ୍ଲକ କୁରିଗଁା ପଞ୍ଚାୟତ ଅଧୀନ ୧୨ ନଂ. ୱାର୍ଡ ସୁନିଗ୍ରାମ ରାସ୍ତା ଅବସ୍ଥା ଶୋଚନୀୟ। ୧୦ ବର୍ଷ ତଳେ ଏହି ରାସ୍ତାରେ ମୋରମ ବିଛାଯାଇଥିଲା। ଏବେ ଶୋଚନୀୟ ହୋଇପଡ଼ିଥିବାରୁ ଗ୍ରାମବାସୀ ଯାତାୟାତରେ ହଇରାଣ ହେଉଛନ୍ତି। ଏ ସମ୍ପର୍କରେ ସେମାନେ ବିଭିନ୍ନ ସମୟରେ ସ୍ଥାନୀୟ ଜନପ୍ରତିନିଧିଙ୍କ ଦୃଷ୍ଟିଗୋଚର କରିଥିଲେ ମଧ୍ୟ କେହି ଗୁରୁତ୍ୱ ଦେଉ ନ ଥିବା ଅଭିଯୋଗ ହୋଇଛି। ଖାଲଖମା ରାସ୍ତାରେ ପଡ଼ି ଲୋକେ ଆହତ ହେଉଥିବା ନଜିର ରହିଛି। ଫଳରେ ଗ୍ରାମବାସୀ ନିଜେ ଖର୍ଚ୍ଚ କରି ରାସ୍ତା ତିଆରି ପାଇଁ ଅଣ୍ଟା ଭିଡ଼ିଛନ୍ତି। ଗୋଟିଏ ସପ୍ତାହରେ ଗ୍ରାମରେ ହନୁମାନ ପ୍ରତିଷ୍ଠା ଉତ୍ସବ ଏବଂ ଦୋଳପୂର୍ଣ୍ଣିମାରେ କୀର୍ତ୍ତନ ଥିବାରୁ କେତେକ ବ୍ୟକ୍ତି ଜେସିବି ଆଣି ମାଟି ଖେଳାଇ ବଜ୍ରିଗୁଣ୍ଡ ପକାଇ ରୋଲିଂ କରିବା ଆରମ୍ଭ କରିଛନ୍ତି। ଗ୍ରାମର ନିରାକାର ରାଉତଙ୍କ ନେତୃତ୍ୱରେ ବସନ୍ତ ସେନାପତି, ଦିବାକର ରାଉତ, ରତ୍ନାକର ରାଉତ, ବିଜୟ ରାଉତ, ସଦାଶିବ ରାଉତ, ନିରାକାର ପାତ୍ର, ରମାକାନ୍ତ ମହାନ୍ତି, ବଳରାମ ସାମଲ, ହରିହର ସାମଲ, ଧନେଶ୍ୱର ରାଉତ, ପୂର୍ଣ୍ଣଚନ୍ଦ୍ର ପାତ୍ର, କାହ୍ନୁ ସାମଲ, ମୁନା ରାଉତ ପ୍ରମୁଖ ରବିବାର ରାସ୍ତାକାମରେ ସାମିଲ ହୋଇଥିଲେ। ପ୍ରଶାସନ ଉକ୍ତ ରାସ୍ତାର ୩ ନମ୍ବର କେନାଲଠାରୁ ବାଇଗଡ଼ିଆ ଭାୟା ସୁନିକୁ କଂକ୍ରିଟ କରିବାକୁ ସେମାନେ ଦାବି କରିଛନ୍ତି।