ବଡବିଲ, ୨୯।.୧୧ (ସ୍ବ.ପ୍ର.)-କେନ୍ଦୁଝର ଜିଲା ବଡବିଲ ସହରାଞ୍ଚଳ ଦେଇ ୪ ଲେନ ବିଶିଷ୍ଟ ୧୦ ନମ୍ବର ରାଜ୍ୟ ରାଜପଥର ନିର୍ମାଣ କାର୍ଯ୍ୟ ଅତିଶୀଘ୍ର ଶେଷ କରିବା ଓ ଖାଲଖମା ଗୁଡିକର ତୁରନ୍ତ ମରାମତି କରି ଦୁର୍ଘଟଣାକୁ ଏଡାଇବା ନିମନ୍ତେ ବ୍ୟବସ୍ଥା ଦାବି କରି ବଡବିଲ କଲେଜର ଛାତ୍ରୀଛାତ୍ର ଗୁରୁବାର ମଧ୍ୟାହ୍ନରେ ରାଜ୍ୟ ରାଜପଥକୁ ଓହ୍ଲାଇବା ସହ ରାସ୍ତା ଉପରେ ଛିଡା ହୋଇ ଏହାର ପ୍ରତିବାଦ କରିଛନ୍ତି। ତେବେ ଖବର ପାଇ ବଡବିଲ ଥାନା ପୋଲିସ ସେଠାରେ ପହଞ୍ଚି ଛାତ୍ରୀଛାତ୍ରଙ୍କୁ ବୁଝାଶୁଝା କରିଥିଲେ।
ମିଳିଥିବା ସୂଚନା ଅନୁଯାୟୀ, ବଡବିଲ-ଝାଡଖଣ୍ଡ ରାଜ୍ୟକୁ ସଂଯୋଗ କରୁଥିବା ବିବିଏନ(ବଣେଇ ବର୍ଡର-ବଡବିଲ-ନାଲଦା) ୧୦ ନମ୍ବର ରାଜ୍ୟ ରାଜପଥର ୨୯୯ନଂ ଭଦ୍ରାସାହିସ୍ଥିତରୁ ୩୦୫ନଂ ଡାକବଙ୍ଗଳା ପର୍ଯ୍ୟନ୍ତ ୬ କି.ମି. ଦୂରତ୍ୱ ରାସ୍ତା ନିର୍ମାଣ ନିମନ୍ତେ ୩୩କୋଟି ୫୫ ଲକ୍ଷ ଟଙ୍କା ମଞ୍ଜୁର ହୋଇଛି। ଏହି ରାସ୍ତା ନିର୍ମାଣ ନିମନ୍ତେ ଅନୁଗୋଳର ଏକ ଠିକାଦାର ସଂସ୍ଥା କାର୍ଯ୍ୟାଦେଶ ପାଇ ଥିଲାବେଳେ ରାସ୍ତା ନିର୍ମାଣର ସମୟ ଅବଧି ୨୦୧୮ ମସିହା ଜୁଲାଇ ୩୦ତାରିଖ ଠାରୁ ଆରମ୍ଭ ହୋଇ ୨୦୧୯ ମସିହା ଜୁଲାଇ ୨୯ତାରିଖରେ ସମ୍ପୂର୍ଣ୍ଣ କରିବା ନିମନ୍ତେ ଧାର୍ଯ୍ୟ ହୋଇଥିଲା। ହେଲେ ଉକ୍ତ କାର୍ଯ୍ୟକୁ ଅନ୍ୟଜଣେ ଠିକାଦାରଙ୍କୁ ଦିଆଯାଇଥିବା ବେଳେ ନିମ୍ନରାସ୍ତାର ରାସ୍ତା ନିର୍ମାଣ ଯୋଗୁ ଅନେକ ସ୍ଥାନରେ ପିଚୁ ଦବିଯାଇଥିବା ଜଣାପଡିଛି। ଏ ନେଇ ବଡବିଲ ଗୃହ ଓ ରାସ୍ତା ନିର୍ମାଣ ବିଭାଗ ସହକାରୀ ଯନ୍ତ୍ରୀ ବସନ୍ତ କୁମାର ଦାସଙ୍କୁ ପଚାରିଥିଲେ ହେଁ ରାସ୍ତା ଉପରେ ବିଦ୍ୟୁତ ଖୁଣ୍ଟ, ଗଛ କଟା ନେଇ ବିଳମ୍ବ ହୋଇଥିବାରୁ ରାସ୍ତା ନିର୍ମାଣ କାର୍ଯ୍ୟ ଶେଷ ହୋଇପାରି ନ ଥିବା କହିଥିଲେ। ନିମ୍ନମାନର କାର୍ଯ୍ୟ ଓ ପିଚୁ ଦବିବା ନେଇ ସହକାରୀ ଯନ୍ତ୍ରୀ ଦାସ କହିଛନ୍ତି ଯେ, ପିଚୁ ଦବିଗଲେ ପୁନର୍ବାର କଣ୍ଟ୍ରାକ୍ଟର ନିର୍ମାଣ କରିଦେବେ। ଗତ ସୋମବାର ଜଣେ ବ୍ୟକ୍ତି ବାଇକରୁ ପଡି ଗୁରୁତର ଅବସ୍ଥାରେ ଅନ୍ୟତ୍ର ସ୍ଥାନାନ୍ତର ହୋଇ ମୃତ୍ୟୁମୁଖରେ ପଡିଥିବା ଘଟଣା ଜାଣି ଛାତ୍ରୀଛାତ୍ର ଉକ୍ତ ରାସ୍ତାର ତୁରନ୍ତ ମରାମତି ନିମନ୍ତେ ଦାବି କରିଛନ୍ତି। ଏହାସହ ଛାତ୍ରଛାତ୍ର ଏହି ୪ ଲେନ ବିଶିଷ୍ଟ ରାସ୍ତାର ଉନ୍ନତମାନ ନିର୍ମାଣ ନିମନ୍ତେ ଜିଲା ମୁଖ୍ୟାଳୟରୁ ଜଣେ ସ୍ବତନ୍ତ୍ର ଯନ୍ତ୍ରୀଙ୍କୁ ନିୟୋଜିତ କରିବା ସହ ଖୁବ୍ ଶୀଘ୍ର କାର୍ଯ୍ୟକୁ ତ୍ୱରାନ୍ବିତ କରିବାକୁ ଦାବି କରିଛନ୍ତି।