ନୂଆଦିଲ୍ଲୀ,୧୧ା୨(ପି.ଟି.): ଆନ୍ଦୋଳନ କରିବା ଅଧିକାର ଜନସାଧାରଣଙ୍କର ରହିଛି। ତେବେ ଆନ୍ଦୋଳନ ନାଁରେ ସର୍ବସାଧାରଣ ସ୍ଥାନ ଓ ରାସ୍ତାକୁ ଅବରୋଧ କରାଯାଇପାରିବ ନାହିଁ ବୋଲି ସୁପ୍ରିମକୋର୍ଟ ସୋମବାର କହିଛନ୍ତି। ଗତବର୍ଷ ଡିସେମ୍ବର ୧୫ରୁ ଦିଲ୍ଲୀର ଶାହିନବାଗ୍ରେ ନାଗରିକତ୍ୱ ସଂଶୋଧନ ଆଇନ (ସିଏଏ) ବିରୋଧରେ ଆନ୍ଦୋଳନ ଚଳାଇଥିବା ବିକ୍ଷୋଭକାରୀ ସର୍ବସାଧାରଣ ରାସ୍ତା ଅବରୋଧ କରି ଅନ୍ୟମାନଙ୍କୁ ଅସୁବିଧାରେ ପକାଇପାରିବେ ନାହିଁ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ଶାହିନବାଗ୍ରୁ ବିକ୍ଷୋଭକାରୀଙ୍କୁ ହଟାଇ କାଳିନ୍ଦୀ କୁଞ୍ଜ-ଶାହିନବାଗ ରାସ୍ତାକୁ ଯାନ ଚଳାଚଳ ପାଇଁ ମୁକ୍ତ କରିବା ଲାଗି ଆବେଦନ ହୋଇଥିଲା। ଏନେଇ ଅଦାଲତ କେନ୍ଦ୍ର ଓ ଦିଲ୍ଲୀ ସରକାରଙ୍କୁ ଜବାବ ମାଗିଛନ୍ତି। ମାମଲାର ପରବର୍ତ୍ତୀ ଶୁଣାଣି ୧୭କୁ ଧାର୍ଯ୍ୟ କରାଯାଇଛି।
ସର୍ବସାଧାରଣ ସ୍ଥାନରେ ଅନିର୍ଦ୍ଦିଷ୍ଟ କାଳ ପାଇଁ ଆନ୍ଦୋଳନ ଚାଲିପାରିବ ନାହିଁ। ଯଦି ଆପଣମାନଙ୍କର ଆନ୍ଦୋଳନ କରିବାର ଅଛି ତେବେ ଏଥିପାଇଁ ଉଦ୍ଦିଷ୍ଟ ସ୍ଥାନରେ କରିବାକୁ ଖଣ୍ଡପୀଠ କହିଛନ୍ତି। ଶାହିନବାଗ୍ ଆନ୍ଦୋଳନ ବିରୋଧରେ ଦାଏର ପିଟିଶନର ଶୁଣାଣି ଦିଲ୍ଲୀ ନିର୍ବାଚନ ପରେ ହେବ ବୋଲି ଗତ ୭ ତାରିଖରେ ସର୍ବୋଚ୍ଚ ଅଦାଲତ କହିଥିଲେ।
ସେହିପରି ଆନ୍ଦୋଳନସ୍ଥଳରେ ୪ ମାସର ଶିଶୁ ମୃତ୍ୟୁକୁ ନେଇ ଅଦାଲତ ଉଦ୍ବେଗ ପ୍ରକାଶ କରିଛନ୍ତି। ଏନେଇ ଅଦାଲତ କେନ୍ଦ୍ର ଓ ଦିଲ୍ଲୀ ସରକାରଙ୍କୁ ନୋଟିସ ଜାରି କରିଛନ୍ତି। ଆନ୍ଦୋଳନରେ ୪ ମାସର ଶିଶୁ ଭାଗନେଇପାରିବ କି ବୋଲି ସୁପ୍ରିମକୋର୍ଟ ପ୍ରଶ୍ନ କରିବା ସହ କେତେକ ମହିଳା ଆଇନଜୀବୀଙ୍କୁ ଚେତାବନୀ ଦେଇଛନ୍ତି। ସିଏଏ ବିରୋଧୀ ଆନ୍ଦୋଳନରେ ଭାଗ ନେଇଥିବା ପିଲାମାନଙ୍କୁ ଆତଙ୍କବାଦୀ, ଦେଶଦ୍ରୋହୀ ଓ ପାକିସ୍ତାନୀ ବୋଲି କୁହାଯାଉଥିବା ମହିଳା ଆଇନଜୀବୀ ବିସ୍ଫୋରକ ଅଭିଯୋଗ କରିଥିଲେ। ମାଆମାନଙ୍କ ସହ ପିଲାମାନେ ଆନ୍ଦୋଳନସ୍ଥଳରେ ଉପସ୍ଥିତ ଥିଲେ ବୋଲି ଆଇନଜୀବୀ ମତ ରଖିଥିଲେ।
ଶିଶୁ ମୃତ୍ୟୁକୁ ନେଇ ଜାତୀୟ ସାହସିକତା ପୁରସ୍କାର ବିଜେତା ୧୨ ବର୍ଷର ବାଳକ ଗୁଣରତନ ସଦାବର୍ତ୍ତେ ପ୍ରଧାନ ବିଚାରପତି ଏସ୍.ଏ. ବୋବ୍ଡେଙ୍କୁ ପତ୍ର ଲେଖିଥିଲେ। ଶିଶୁ ମୃତ୍ୟୁର ତଦନ୍ତ ପାଇଁ ନିର୍ଦ୍ଦେଶ ଦେବାକୁ ସେ ଅନୁରୋଧ କରିଥିଲେ। ୪ ମାସର ଶିଶୁ ମହମ୍ମଦ ଜହାନ ତା ମାଆବାପାଙ୍କ ସହ ପ୍ରତିଦିନ ବିକ୍ଷୋଭସ୍ଥଳକୁ ଆସୁଥିଲେ। ଅତ୍ୟଧିକ ଥଣ୍ଡା ଯୋଗୁ ଜାନୁୟାରୀ ୩୦ରେ ତାଙ୍କର ମୃତ୍ୟୁ ଘଟିଥିଲା। ମାମଲାର ଶୁଣାଣି ବେଳେ ଆଇନଜୀବୀମାନେ ବିସ୍ଫୋରକ ବୟାନ ନ ଦେବାକୁ ପ୍ରଧାନ ବିଚାରପତି ଜଷ୍ଟିସ୍ ବୋବ୍ଡେ, ବିଚାରପତି ଜଷ୍ଟିସ ବି.ଆର୍. ଗଭାଇ ଏବଂ ସୂର୍ଯ୍ୟକାନ୍ତଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି।