ଲାଠୋର, ୧୧ା୯ (ଡି.ଏନ୍.ଏ): ବଲାଙ୍ଗୀର ଜିଲା ହରିଶଙ୍କର ରୋଡ଼ ରେଲ ଷ୍ଟେଶନ ରାସ୍ତାର ଅବସ୍ତା ବହୁତ ଖରାପ ଅଛେ। ଇ ରାସ୍ତା ଦେଇ ଯାଉଥିବାର ଜନସାଧାରନ, ଛାତ୍ରୀଛାତ୍ର ବଡ଼ଭାରି ସମସିଆର ସାମନା କରୁଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ବଛର କେତେ ହେଲା ରେଲ ଲାଇନ୍ ତିଆରି, ହରିଶଙ୍କର ରୋଡ଼ ରେଲ ଷ୍ଟେଶନର ଉନ୍ନତିକରନ କାମ୍ ଚାଲିଛେ। ଯେନ୍ଥିରଲାଗି ଇ ରାସ୍ତାରେ ବହୁତ୍ ଗାଡ଼ିମଟର ଯିବାର ଅଏବାର କରୁଛେ। ଲାଠୋର ବସ୍ଷ୍ଟାଣ୍ଡରୁ ଶ୍ରୀଦୁର୍ଗେଶ୍ୱରୀ ନୋଡାଲ ସ୍କୁଲକେ ଯାଇଥିବାର ଇ ରାସ୍ତା ଉପରେ ପରସ୍ତେ ମାଟି ପଡ଼ି ଅଁାଠେ କାଦୋ ହେଇଛେ। ହେଲେ ଯେନ୍ ଠିକାଦାର ଇ କାଯ୍ କରୁଛନ୍ ସେ ରାସ୍ତା ଉପରେ ଧିଆନ୍ ନାଇଁ ଦେଉଥିବାର ଲୋକ ଅଭିଯୋଗ କରିଛନ୍। ଯେନ୍ଥିରଲାଗି ଇ ରାସ୍ତା ଦେଇ ସ୍କୁଲକେ ଯାଉଥିବାର ଛାତ୍ରୀଛାତ୍ର ବଡ଼ଭାରି ସମସିଆର ସାମନା କରୁଛନ୍। ଅନେକ ସମିଆରେ କାଦୋପିଛଲ୍ରେ ଛୁଆମାନେ ହିଟିପଡ଼ି ଖଁଡ଼ିଆଡଁଡ଼ିଆ ହେଉଥିବାର ଦେଖ୍ବାକେ ମିଲୁଛେ। ଇ ବାବ୍ଦେ ଲାଠୋର ସରପଁଚ୍ ପ୍ରବିଣ ଅଗ୍ରଓ୍ବାଲ ବିଭାଗୀୟ ଠିକାଦାରକୁଁ ରାସ୍ତାରୁ ମାଟି ସଫାକରବାକେ ବାରବାର କହି ଥକିଗଲେନ। ହେଲେ କେହି ତାକର କଥା ନାଇଁ ଶୁନୁଥିବାର ସେ କହିଛନ୍। ଇ ରାସ୍ତାର ମରାମତି ସଂଗେ କାଦୋ ସଫା କରବାକେ ଅଂଚଲବାସୀ ଦାବି କରିଛନ୍।