ରାୟଗଡ଼ା ଅଫିସ,୨୬।୩: ଛତିଶଗଡ଼ର ୧୮ ତୀର୍ଥଯାତ୍ରୀ ଗତ ୧୨ ତାରିଖରେ ଛତିଶଗଡ଼ର ମାହାସାମୁଦ୍ର ଜିଲାର ନାନ୍ଦଗାଓଁରୁ ତୀର୍ଥ ଯାତ୍ରା ଆରମ୍ଭ କରିଥିଲେ। ୨୨ ତାରିଖରେ ସେମାନଙ୍କ ଫେରିବା ପାଇଁ ଟିକେଟ ମଧ୍ୟ ହୋଇଥିଲା। ହେଲେ ବିଶ୍ୱବ୍ୟାପୀ କାୟା ବିସ୍ତାର କରିଥିବା ମହାମାରୀ କରୋନା ମୁକାବିଲା ପାଇଁ କେନ୍ଦ୍ର ସରକାର ସମଗ୍ର ଦେଶକୁ ଲକ୍ଡାଉନ୍ ଘୋଷଣା କରିଛନ୍ତି। ଫଳରେ ସମସ୍ତ ବସ୍ ଗାଡ଼ି ଏବଂ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଥିବାରୁ ଫସି ରହିଛନ୍ତି। ୧୮ ତୀର୍ଥଯାତ୍ରୀ ଯେଉଁମାନେ ଗୁରୁବାର ଆନ୍ଧ୍ର ସୀମା ପାର ହୋଇ ଓଡ଼ିଶାର ରାୟଗଡ଼ାର ଓଭର ବ୍ରିଜ ନିକଟରେ ଥିବା ବେଳେ ପୋଲିସ ଦେଖିବା ସହ ଉପରସ୍ଥ ଅଧିକାରୀଙ୍କୁ ଖବର ଦେଇଛି। ଏମାନେ ତିରୁପତି, କନ୍ୟାକୁମାରୀ, ମଦୁରାଇ ବିଭିନ୍ନ ତୀର୍ଥ ସ୍ଥାନ ଭ୍ରମଣରେ ବାହାରିଥିଲେ। ଆନ୍ଧ୍ର ପୋଲିସ ତାଙ୍କୁ ଏକ ଗାଡ଼ି କରି ଓଡ଼ିଶା ସୀମାର ରାୟଗଡ଼ାରେ ଛାଡ଼ିଥିବା ତୀର୍ଥଯାତ୍ରୀମାନେ କହିଛନ୍ତି। ବର୍ତ୍ତମାନ ସେମାନେ କୁଆଡ଼େ ଯିବେ କେମିତି ରହିବେ ସେନେଇ ଚିନ୍ତାରେ ପଡ଼ିଛନ୍ତି। ଏନେଇ ଗଣମାଧ୍ୟମ ପ୍ରତିନିଧିମାନେ ଏସ୍ପି, ତହସିଲଦାର ଏବଂ ବିଭିନ୍ନ ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ। ଦିନତମାମ ଭୋକରେ ଥିବାରୁ କିଛି ସମାଜସେବୀ ସେମାନଙ୍କ ପାଇଁ ଖାଦ୍ୟ ବ୍ୟବସ୍ଥା କରାଇଥିଲେ। ଏନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ମହାମାରୀ ବିଶେଷଜ୍ଞ ଡ. କଲ୍ଲୋଳ ଦାସ ତୀର୍ଥଯାତ୍ରୀମାନଙ୍କ ସ୍ବାସ୍ଥ୍ୟ ପରୀକ୍ଷା କରାଇଛନ୍ତି। ପରେ ସେମାନଙ୍କୁ ଆଇସୋଲେଶନ୍ରେ ରଖାଯିବ ନା ପଠାଯିବ ସେ ନେଇ ପ୍ରଶାସନ ସ୍ଥିର କରିବ ବୋଲି ଜଣାପଡ଼ିଛି।