ମାଡ୍ରିଡ୍, ୧୨ା୫ (ଏପି)-ସ୍ପାନିଶ ଲିଗ୍ର ସଦ୍ୟତମ କ୍ଲବ ଭାବେ ରିଅଲ ମାଡ୍ରିଡ୍ ବ୍ୟକ୍ତିଗତ ଟ୍ରେନିଂ ଆରମ୍ଭ କରିଛି। କରୋନାଭାଇରସ୍ ମହାମାରୀ ଯୋଗୁ ଦୁଇ ମାସ ଧରି ଲିଗ୍ ସସ୍ପେଣ୍ଡ ରହିବା ପରେ ଖେଳାଳିମାନେ ସେମାନଙ୍କ ଦଳର ଟ୍ରେନିଂ ସେଣ୍ଟରକୁ ଫେରିଛନ୍ତି। ଅଧିକାଂଶ କ୍ଲବ ଇତିମଧ୍ୟରେ ସେମାନଙ୍କ ଟ୍ରେନିଂ ଆରମ୍ଭ କରିସାରିଲେଣି। ବାର୍ସିଲୋନା ଶୁକ୍ରାବାର ଏବଂ ଆଟଲେଟିକୋ ମାଡ୍ରିଡ୍ ଶନିବାରଠାରୁ ଟ୍ରେନିଂ ଆରମ୍ଭ କରିସାରିଛନ୍ତି। କୋଭିଡ୍-୧୯ ଟେଷ୍ଟ ପରେ ଖେଳାଳିମାନଙ୍କୁ ଅଭ୍ୟାସ ପାଇଁ ଅନୁମତି ଦିଆଯାଇଛି। ପ୍ରଥମ ଓ ଦ୍ୱିତୀୟ ଡିଭିଜନ କ୍ଲବର ୫ ଜଣ ଖେଳାଳିଙ୍କର କରୋନା ପଜିଟିଭ୍ ଆସିଥିଲା। ଟେଷ୍ଟ ବେଳେ ୩ଜଣ ଷ୍ଟାଫ୍ ମେମ୍ବରଙ୍କର ମଧ୍ୟ ପଜିଟିଭ୍ ଆସିଛି। ଲିଗ୍ ଜୁନ୍ ୧୨ରୁ ଆରମ୍ଭ ହେବ ବୋଲି ସ୍ପାନିଶ ଲିଗ୍ ସଭାପତି ଜାଭିଏର୍ ଟେବାସ୍ ଆଶା ପ୍ରକଟ କରିଛନ୍ତି। ବ୍ୟକ୍ତିିଗତ ଟ୍ରେନିଂ ପରେ ରିଅଲ ମାଡ୍ରିଡ୍ ଖେଳାଳିମାନେ ଦୁଇଟି ରୋଟେଶନରେ ବିଭିନ୍ନ ପିଚ୍ରେ ଅଭ୍ୟାସ କରିବେ। ପ୍ରତିଟି ପିଚ୍ରେ ୬ଜଣ ଲେଖାଏ ଖେଳାଳିଙ୍କୁ ଅନୁମତି ରହିବ। ମାର୍ଚ୍ଚରେ ଡାହାଣ ପାଦରେ ଅସ୍ତ୍ରୋପଚାର ପରେ ବେଲଜିଆନ ଖେଳାଳି ଇଡେନ୍ ହାଜାଡର୍ସ ଫେରିଛନ୍ତି। ଥିବଟ୍ କୋର୍ଟୋଇସ୍, ଗାରେଥ୍ ବାଲେ ଓ ମାର୍ସିଲୋ ମଧ୍ୟ ଟ୍ରେନିଂ ନେଉଛନ୍ତି। କୋଚ୍ ଜିନେଜଡିନ୍ ଜିଡାନ୍ ମାସ୍କ ପରିଧାନ କରି ଖେଳାଳିମାନଙ୍କୁ ପରାମର୍ଶ ଦେଉଥିବା ଦେଖିବାକୁ ମିଳିଥିଲା। ମାଡ୍ରିଡ୍ ସୋମବାରଠରୁ ପୂରାମାତ୍ରାରେ ଟ୍ରେନିଂ ଆରମ୍ଭ କରିବ।