ନୂଆଦିଲ୍ଲୀ,୨୪।୫: ଦେଶର ପ୍ରମୁଖ ବାଣିଜି୍ୟକ ଗ୍ରୁପ୍ ରିଲାଏନ୍ସ ଇଣ୍ଡଷ୍ଟ୍ରିଜ୍ ତା’ର ରିଟେଲର୍ସ ସେବାକୁ ଅଧିକ ଲୋକାଭିମୁଖୀ କରିବାକୁ ମନ ବଳାଇଛି। କମ୍ପାନୀର ଡିଜିଟାଲ ପ୍ଲାଟ୍ଫର୍ମ ଜିଓ ସେବା ମାଧ୍ୟମରେ ଏହି ରିଟେଲର୍ସ (ଗ୍ରସେରି) ସେବାକୁ ଏକ ସ୍ବତନ୍ତ୍ର ଆପ୍ ‘ଜିଓ ମାର୍ଟ’ ମାଧ୍ୟମରେ ଲୋକଙ୍କ ନିକଟତର ହେବା ପାଇଁ କମ୍ପାନୀ ଲକ୍ଷ୍ୟ ରଖିଛି। କମ୍ପାନୀ ଗତ ୧ମାସ ତଳେ ରିଲାଏନ୍ସ ରିଟେଲର୍ସ ସେବାରେ ଏହି ଅତ୍ୟାଧୁନିକ ଆପ୍ ‘ଜିଓ ମାର୍ଟ’ ସେବାକୁ ଗ୍ରହଣ କରିଥିଲା। ଏହି ସେବାକୁ କମ୍ପାନୀ ପରୀକ୍ଷାମୂଳକ ଭାବରେ ମୁମ୍ବାଇ ସହରର ପ୍ରମୁଖ ଅଞ୍ଚଳ ନଭି ମୁମ୍ବାଇ, ଠାଣେ ଏବଂ କଲ୍ୟାଣ ଆଦି ସହରରେ ଆରମ୍ଭ କରିଥିଲା। ଏହିସବୁ ସହରର ଗ୍ରାହକମାନେ ନିଜ ନିଜର ହ୍ବାଟ୍ସଆପ୍ ନମ୍ବର ମାଧ୍ୟମରେ ଆବଶ୍ୟକ ସାମଗ୍ରୀର ଅର୍ଡର କରି ବହୁ ସହଜ ଓ ସୁବିଧାରେ ବିଭିନ୍ନ ପ୍ରକାର ସାମଗ୍ରୀ ମଗାଇପାରିଲେ। କମ୍ପାନୀର ଏହି ପରୀକ୍ଷଣ ସଫଳ ହେବା ଫଳରେ ଏହାକୁ ସାରା ଦେଶରେ ଲାଗୁ କରିବା ପାଇଁ ରିଲାଏନ୍ସ ରିଟେଲର୍ସ’ର ସିଇଓ ଦାମ୍ଦର ମଲ୍ଲ ଶନିବାର ଗଣମାଧ୍ୟମକୁ ଏହି ସୂଚନା ଦେଇଛନ୍ତି । ସେ ଆହୁରି କହିଛନ୍ତି ଯେ ଏହି ଆପ୍କୁ ଗ୍ରାହକମାନେ ସିଧାସଳଖ କମ୍ପାନୀ ଓ୍ବେବ୍ସାଇଟରୁ ଡାଉନ୍ଲୋଡ୍ କରିପାରିବେ। ଜିଓ ଫୋନ ଓ କମ୍ପାନୀ ଓ୍ବେବ୍ସାଇଟରୁ ଜିଓ ମାର୍ଟ ଡଟ କମ୍ ( jiomart.com )। ଏହି ଆପ୍ରେ ସମସ୍ତ ପ୍ରକାର ଗ୍ରସେରି, ଫଳମୂଳ, ପନିପରିବା,ପର୍ସନାଲ କେୟାର, ହୋମ୍ କେୟାର, ବେବି କେୟାର ଏହିଭଳି ଅନେକ ସାମଗ୍ରୀ ଉପଲବ୍ଧ ହେଉଛି। ରିଲାଏନ୍ସ ଗ୍ରୁପ୍ର ରିଲାଏନ୍ସ ଫ୍ରେସ୍ ଓ ରିଲାଏନ୍ସ ମାର୍ଟରେ ମଧ୍ୟ ଏହି ସେବା ଓ ସୁବିଧା ତା’ର ଗ୍ରାହକମାନଙ୍କ ଲାଗୁ କରାଯିବ। ଗ୍ରାହକଙ୍କର ଅର୍ଡର ଅନୁସାରେ କମ୍ପାନୀ ଏହି ହୋମ୍ ଡେଲିଭରି ସେବା ଯୋଗାଇବ, କିନ୍ତୁ ଅର୍ଡରର ସାମଗ୍ରୀ ୭୫୦ରୁ ଊର୍ଦ୍ଧ୍ୱ ହେବା ଆବଶ୍ୟକ। ତା’ସହିତ ଡେଲିଭରି ପାଇଁ ଅତିରିକ୍ତ ୨୫ଟଙ୍କା ଗ୍ରାହକ କମ୍ପାନୀଙ୍କୁ ଦେବାକୁ ପଡିବ ବୋଲି କମ୍ପାନୀ ପକ୍ଷରୁ କୁହାଯାଇଛି।