ଶ୍ରୀହରିକୋଟା(ଆନ୍ଧ୍ରପ୍ରଦେଶ),୨୩ା୫: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ପକ୍ଷରୁ ଏଠାରେ ବୁଧବାର ରିସାଟ୍-୨ବି ଉପଗ୍ରହର ସଫଳ ଉତ୍କ୍ଷେପଣ କରାଯାଇଛି। ପୃଥିବୀ ପର୍ଯ୍ୟବେକ୍ଷଣକାରୀ ଏହି ଉପଗ୍ରହ ଲଞ୍ଚ୍ କରିବାରେ ଇସ୍ରୋ ଇତିହାସ ସୃଷ୍ଟି କରିଛି। ପୋଲାର ସାଟେଲାଇଟ୍ ଲଞ୍ଚ୍ ଭେଇକିଲ (ପିଏସ୍ଏଲ୍ଭି-ସି୪୬) ରକେଟ୍ରେ ସକାଳ ୫ଟା ୩୦ରେ ଅଗ୍ନି ସଂଯୋଗ କରାଯାଇଥିଲା। ଏଥିପାଇଁ ୨୫ଘଣ୍ଟା ପୂର୍ବରୁ ମଙ୍ଗଳବାର ଅବଗଣନା ଆରମ୍ଭ ହୋଇଥିଲା। ରାଡାର ଇମେଜିଂ ଆର୍ଥ ସାଟେଲାଇଟ୍କୁ ସତୀଶ ଧାବନ ସ୍ପେସ୍ ସେଣ୍ଟରର ଲଞ୍ଚ୍ପ୍ୟାଡ଼ରୁ ଉତ୍କ୍ଷେପଣ କରାଯାଇଥିଲା। ୬୧୫ କିଲୋଗ୍ରାମ୍ ବିଶିଷ୍ଟ ଉକ୍ତ ସାଟେଲାଇଟ୍କୁ ଉତ୍କ୍ଷେପଣର ୧୫ ମିନିଟ୍ ପରେ କକ୍ଷପଥରେ ଅବସ୍ଥାପିତ କରାଯାଇଛି। ପୃଥିବୀ ପୃଷ୍ଠରୁ ୫୫୫ କିଲୋମିଟର ଉଚ୍ଚରେ ଏହା ଅବସ୍ଥାପିତ ହୋଇଛି। ରିସାଟ୍-୨ବି (ରାଡାର ଇମେଜିଂ ସାଟେଲାଇଟ୍-୨ବି) ଦେଶର ନିରାପତ୍ତା ପାଇଁ ସତର୍କ ନଜର, କୃଷି, ବନ ସୁରକ୍ଷା, ବିପର୍ଯ୍ୟୟ ପରିଚାଳନା ଭଳି ବିଭିନ୍ନ କ୍ଷେତ୍ରରେ ସହାୟକ ହୋଇପାରିବ। ଆତଙ୍କବାଦୀ କାର୍ଯ୍ୟକଳାପ ସମ୍ପର୍କରେ ଏହା ଆବଶ୍ୟକ ତଥ୍ୟ ପ୍ରଦାନ କରିବାକୁ ସକ୍ଷମ ଥିବାରୁ ସୀମାନ୍ତରେ କଡ଼ା ନଜର ରଖାଯାଇପାରିବ ବୋଲି ଇସ୍ରୋ ଅଧ୍ୟକ୍ଷ କେ. ସିବନ ପ୍ରକାଶ କରିଛନ୍ତି।