ମାଡ୍ରିଡ୍,୨ା୩- ବିଶ୍ୱ ଫୁଟବଲର ସବୁଠୁ ଗୁରୁତ୍ୱପୂର୍ଣ୍ଣ କ୍ଲବ ମ୍ୟାଚ୍ ଏଲ କ୍ଲାସିକୋରେ ରିୟଲ ମାଡ୍ରିଡ୍ ବିଜୟୀ ହୋଇଛି। ମାଡ୍ରିଡ୍ ୨-୦ ଗୋଲରେ ତା’ର ଚିରପ୍ରତିଦ୍ୱନ୍ଦ୍ୱୀ ବାର୍ସିଲୋନାକୁ ହରାଇ ଦେଇଛି। କ୍ରିଷ୍ଟିଆନୋ ରୋନାଲ୍ଡୋଙ୍କ ବିନା ମାଡ୍ରିଡ୍ ଦଳ ପ୍ରଥମର ଥର ପାଇଁ କ୍ଲାସିକୋ ମ୍ୟାଚ୍ ଜିତିଛି। ବ୍ରାଜିଲିଆନ ଯୁବ ଖେଳାଳି ଭିତନିସିଅସ ଜୁନିୟର (୭୧ତମ ମିନିଟ୍) ପ୍ରଥମ ଗୋଲ ଦେଇଥିଲେ। ମ୍ୟାଚ୍ର ଅତିରିକ୍ତ ସମୟରେ ମାରିଆନୋ (୯୦+୨ତମ) ମାଡ୍ରିଡ୍ ପାଇଁ ଦ୍ୱିତୀୟ ଗୋଲ ସ୍କୋର କରି ବିଜୟ ସୁନିଶ୍ଚିତ କରିଥିଲେ। ବାର୍ସିଲୋନା ଖେଳାଳିମାନେ ବହୁ ସୁବର୍ଣ୍ଣ ସୁଯୋଗ ହାତଛଡ଼ା କରିଥିଲେ। ଏପରି କି ଦଳର ଷ୍ଟାର ଗ୍ରିଜମେନ ଓ ମେସି ମଧ୍ୟ ଗୋଲ ପୋଷ୍ଟ ସାମ୍ନାରୁ ଶଟ୍ ମିସ କରିଥିଲେ। ଏହି ମ୍ୟାଚ୍ ବେଳେ ପୂର୍ବତନ ମାଡ୍ରିଡ୍ ତଥା ବର୍ତ୍ତମାନ ଜୁଭେଣ୍ଟସ ଖେଳାଳି ରୋନାଲ୍ଡୋ ଷ୍ଟାଡିୟମରେ ଉପସ୍ଥିତ ଥିଲେ। ଏହି ବିଜୟ ଯୋଗୁ ଲିଓନେଲ ମେସିଙ୍କ ବାର୍ସିଲୋନାକୁ ହଟାଇ ରିୟଲ ମାଡ୍ରିଡ୍ ଲା ଲିଗା ଲିଗ୍ର ପଏଣ୍ଟ ଟେବୁଲର ଶୀର୍ଷ ସ୍ଥାନ ହାସଲ କରିଛି। ୨୬ ମ୍ୟାଚ୍ ଖେଳିଥିବା ମାଡ୍ରିଡ୍ ଦଳ ଏବେ ସର୍ବାଧିକ ୫୬ ପଏଣ୍ଟ ଶୀର୍ଷରେ ଥିବାବେଳେ ମାତ୍ର ଏକ ପଏଣ୍ଟ ପଛରେ ଥିବା ବାର୍ସିଲୋନା ଦ୍ୱିତୀୟ ସ୍ଥାନରେ ରହିଛି।