ଏରସମା, ୨୦।୩ (ସ୍ବ.ପ୍ର.): ୨୦ରୁ କମ୍ ପିଲା ଥିବା ସ୍କୁଲକୁ ବନ୍ଦ କରାଯାଇ ପାଖ ସ୍କୁଲରେ ମିଶ୍ରଣ କରାଯିବାକୁ ସରକାରୀ ନିର୍ଦ୍ଦେଶ ରହିଛି। ଏହି ନିର୍ଦ୍ଦେଶକ୍ରମେ ଏରସମା ବ୍ଲକ ଅଧୀନ ନୂଆଡିହିସ୍ଥିତ ପଞ୍ଚାୟତ ରୁପାଖଣ୍ଡି ପ୍ରାଥମିକ ସ୍କୁଲକୁ ନିକଟସ୍ଥ ନୁଆଡିହି ପଞ୍ଚାୟତ ଉପ୍ରା ବିଦ୍ୟାଳୟରେ ମିଶ୍ରଣ କରାଯିବାକୁ ନିଷ୍ପତ୍ତି ହୋଇଛି। ଏହାକୁ ବିରୋଧ କରି ଗୁରୁବାର ସ୍କୁଲ ପରିଚାଳନା କମିଟି ଓ ଗ୍ରାମବାସୀ ଜିଲାପାଳ ଓ ବ୍ଲକ ଶିକ୍ଷା ଅଧିକାରୀଙ୍କୁ ଅଭିଯୋଗ କରିଛନ୍ତି।
ଅଭିଯୋଗ ମୁତାବକ, ରୁପାଖଣ୍ଡି ପ୍ରାଥମିକ ସ୍କୁଲରେ ୧ମରୁ ୫ମ ପର୍ଯ୍ୟନ୍ତ ୨୧ ଛାତ୍ରୀଛାତ୍ର ଅଧ୍ୟୟନ କରୁଥିଲେ। ମାତ୍ର ଜଣେ ଛାତ୍ରଙ୍କ ଅଭିଭାବକଙ୍କୁ ଉକ୍ତ ସ୍କୁଲର ପ୍ରଧାନ ଶିକ୍ଷୟିତ୍ରୀ ଓ ସିଆର୍ସିସି ଟିସି ଦେଇ ସ୍କୁଲ ମିଶ୍ରଣ କରିବାକୁ ଉଦ୍ୟମ କରୁଛନ୍ତି ବୋଲି ପରିଚାଳନା କମିଟି ସଦସ୍ୟ ଓ ଗ୍ରାମବାସୀ ଅଭିଯୋଗ କରିଛନ୍ତି। ଏ ସମ୍ପର୍କରେ ସିଆର୍ସିସି ରାଜେନ୍ଦ୍ର କୁମାର ସାହୁଙ୍କୁ ପଚାରିବାରେ ସମ୍ପୃକ୍ତ ଅଭିଭାବକ ନିଜ ଇଚ୍ଛାରେ ସ୍କୁଲରୁ ଟିସି ନେଇଥିବା କହିଛନ୍ତି। ଦାୟିତ୍ୱରେ ଥିବା ଅତିରିକ୍ତ ବ୍ଲକ ଶିକ୍ଷାଧିକାରୀ ଗୋଲେଖ ଚନ୍ଦ୍ର ପ୍ରଧାନଙ୍କୁ ପଚାରିବାରେ ଶୁକ୍ରବାର ଉଭୟ ପକ୍ଷଙ୍କୁ ଡକାଯାଇଛି। ଆଲୋଚନା କରାଯିବା ପରେ ବିଚାର କରାଯିବ ବୋଲି ସୂଚନା ଦେଇଛନ୍ତି। ଏସ୍ଏମ୍ସିର ଚେୟାରମ୍ୟାନ ମନୋଜ ବିଶ୍ୱାଳଙ୍କୁ ପଚାରିବାରେ ଅଭିଭାବକଙ୍କ ଅନିଚ୍ଛା ସତ୍ତ୍ୱେ ସିଆରସିସିଙ୍କ ନିର୍ଦ୍ଦେଶକ୍ରମେ ଉଦ୍ଦେଶ୍ୟମୂଳକ ଭାବେ ତାଙ୍କୁ ଟିସି ଦିଆଯାଇଥିବା କହିଛନ୍ତି।