ରୂପେଲିର ଚିକିଛା ଲାଗି ଟଁକା ଅଭାବ୍: ଚିନ୍ତାରେ ଗରିବ୍ ମା’ବାପ୍
21 ଗୁଡ଼ଭେଲା, ୧୯ା୮(ଡି.ଏନ.ଏ.): ଲୁକ୍କୁ ମାହାଲିଆ ଚିକିଛା ସେବା ଯୁଗେଇ ଦେବାର ଲାଗି କେନ୍ଦ୍ର ଆର ରାଏଜ୍ ସରକାର ଭିନେ ଭିନେ ଯୋଜନା କାଯ୍କାରୀ କରୁଛନ୍। ହେଲେ ବଲାଙ୍ଗୀର ଜିଲା ଗୁଡ଼ଭେଲା ବ୍ଲକ ଅଧୀନ ଡୁଙ୍ଗିବାହାଲ ଗଁାର ୩ ବଛର ୯ ମାସର ଛୁଆ ରୂପେଲି ରଣାକଁର ଲାଗି ଇ ସବୁ ସରକାରୀ ଯୋଜନା ସତେ ଯେନ୍ତା ଉପହାସ କରୁଛେ।
ସୂଚନା ଅନ୍ସାରେ ଡୁଙ୍ଗିବାହାଲ ଗଁାର ମେଘନାଦ ରଣା ଆର କୁନୀତାକଁର ଝି’ ହେଉଛନ୍ ରୂପେଲି(୩)। ଝି’ ଜନମ୍ ହେଲା ଉତାରୁ ପରିବାରରେ ଖୁସିର ଲହର ଖେଲି ଯାଇଥିଲା। ହେଲେ ଇ ଖୁସିଟା ଦିନାକେତେ ଭିତରେ ସମ୍କର ମୁହୁଁରୁ ଉଭି ଗଲା। ଜନମ୍ ହେବାର ଦୁଇ ମାସ ଉତାରୁ ରୂପେଲିର ଦିହିପା ଖରାପ ହେଲା। ମା’ବାପ୍ ଝି’କେ ପହେଲା ଗୁଡ଼ଭେଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର, ପଛେ ଜିଲା ମୁଖିଆ ଡାକ୍ତରଖାନା ଆର ବୁର୍ଲାକେ ନେଇ ଚିକିଛା କରାଲେ, ହେଲେ କିଛି ଲାଭ୍ ନାଇଁ ହେଲା। ଇଆଡ଼େ ରୂପେଲିର ମୁଡ଼ ବଢ଼ୁଥିଲାବେଲେ ସେ ହିସାବେ ଗୋଡ଼ହାତ୍ ନାଇଁ ବଢ଼ବାର। ବଏସ୍ ବଢ଼ୁଥିଲେ ବି ସେ ଚାଲବୁଲ କି କଥାବାରତା ନାଇଁ କରିପାରବାର। ସବୁବେଲେ ସେ ମା’ରନେ ପାଇ ହେଇଛନ୍। ରୂପେଲିର ମୁଡ଼ର ଉଜନ ବଢ଼ବାରେ ଲାଗିଥିଲାବେଲେ ସେ ମୁଡ଼ ସିଧା କରି ରଖି ନାଇଁପାରବାର। ଇଆଡ଼ ଗରିବ୍ ବାପ୍ କୁଲି ମଜୁରି କରି ଦୁଇ ପଏସା ଆନ୍ଲେ ଯାଇ ଘରର ଚୁଲି ଜଲୁଛେ। ଏନ୍ତାଥି ଝି’ର ଉଚ ଚିକିଛା କଥା ମା’ବାପ୍ ଚିନ୍ତା କରି ନାଇଁପାରବାର। ମାଏକିନା କୁନୀତା, ଝି’ ରୂପେଲି ଆର ଦୁଇ ବଛର୍ର ପୁଓ ଲୁକେଶ୍ୱରକେ ନେଇ ମେଘନାଦକଁର ପରିବାର। ପରିବାରଟା ନିହାତି ଗରିବ୍ ହେଇଥିଲାବେଲେ ୫୦ ଡେସିମିଲ ଚାଷ୍ଜମି ରହିଛେ। କୁଲି ମଜୁରି କରି କୁଟୁମ୍ ପୁଷୁଛେଁ, ଝି’ର ଚିକିଛା ଲାଗି ବହୁତ୍ ଧାର ଉଧାର କରି ସାଇଲିନ, ହେଲେ ରୂପାଲିକେ କାଏଁ ରୋଗ୍ ହେଇଛେ ସେଟା ବି ଜନା ନାଇଁ ପଡ଼ବାର। ଇ ଅଭାବ ଅନାଟନ ଭିତରେ ଝି’ର ଉଚ ଚିକିଛା କରବାର ମୋର ପକ୍ଷେ ସମ୍ଭବ ନୁହେ ଆଗିଅଁା। ଯାହା ପାରଲି ଧାର ଉଧାର କରି ଚିକିଛା କଲି, ଏହେଦେ ରୂପାଲି ଖାଲି ଭଗବାନ ଭରସାରେ ଅଛେ ବଲି କହିଛନ୍ ମେଘନାଦ। ଇ ଦୁଖି ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ରୂପେଲିକେ ଚିକିଛା ସାହାଯ୍ ଯୁଗେଇ ଦେବାକେ ସାଧାରନରେ ଦାବି ହେଉଛେ।