ରୂପ୍ସା ଜଙ୍କଶନରେ ଫୁଟ୍ ଓଭରବ୍ରିଜ ନିର୍ମାଣ ତ୍ୱରାନ୍ବିତ:ଅନୁଧ୍ୟାନ କଲେ ଡିଆରଏମ୍
21 ରୂପ୍ସା, ୨୧।୭(ଡି.ଏନ.ଏ.)-ଦକ୍ଷିଣପୂର୍ବ ରେଳପଥ ଖଡ଼ଗପୁର ଡିଭିଜନ ଅନ୍ତର୍ଗତ ବାଲେଶ୍ୱର ଜିଲା ରୂପ୍ସା ରେଳ ଜଙ୍କଶନ ଓ ଷ୍ଟେଶନରେ ଚାଲିଥିବା ଫୁଟ ଓଭରବ୍ରିଜ ସମ୍ପ୍ରସାରଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଯାତ୍ରୀଙ୍କ ନିରାପତ୍ତା ଓ ଯାତାୟାତ ସୁବିଧାକୁ ଦୃଷ୍ଟିରେ ରଖି ୧ନଂ. ପ୍ଲାଟଫର୍ମକୁ ଥିବା ଫୁଟ୍ ଓଭରବ୍ରିଜ୍କୁ ସିଧା ୩ନଂ. ଓ ୪ନଂ. ପ୍ଲାଟଫର୍ମକୁ ସମ୍ପ୍ରସାରଣ କରିବା ଲାଗି ଆଞ୍ଚଳିକ ବିକାଶ ପରିଷଦ ଦାବି କରିଥିଲା। ତଦନୁଯାୟୀ ବର୍ଷକ ପୂର୍ବରୁ ନିର୍ମାଣ କାମ ଆରମ୍ଭ ହୋଇଥିଲା। ପରେ ମନ୍ଥର ଗତିରେ କାର୍ଯ୍ୟ ହେବାରୁ ବିକାଶ ପରିଷଦର କର୍ମକର୍ତ୍ତା ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଫଳରେ ନିର୍ମାଣ କାର୍ଯ୍ୟକୁ ତ୍ୱରାନ୍ବିତ ହୋଇଥିଲା। ଏହି ପରିପ୍ରେକ୍ଷୀରେ ଡିଭିିଜ୍ନାଲ ରେଳବାଇ ମ୍ୟାନେଜର ଏକ ସ୍ବତନ୍ତ୍ର ଟ୍ରେନ୍ ଯୋଗେ ଶନିବାର ଷ୍ଟେଶନରେ ପହଞ୍ଚି ନିର୍ମାଣ କାର୍ଯ୍ୟ ଅନୁଧ୍ୟାନ କରିଥିଲେ। ସିନିୟର ଡିଭିଜନାଲ ଅପରେଶନ ମ୍ୟାନେଜର, ସିନିୟର ଇଞ୍ଜିନିୟର, ସିକ୍ୟୁରିଟି କଣ୍ଟ୍ରୋଲ, ଡିଭିଜନାଲ ଇଞ୍ଜିନିୟର, ଆସିଷ୍ଟାଣ୍ଟ ଇଞ୍ଜିନିୟର ପ୍ରମୁଖ ଉପସ୍ଥିତ ଥିଲେ। ସେଠାରେ ୧ନଂ.ରୁ ୩ ଓ ୨ନଂ. ପ୍ଲାଟଫର୍ମକୁ କ୍ରେନ୍ ଯୋଗେ ଫୁଟ ଓଭରବ୍ରିଜ୍ ସଂଯୋଗ କରାଯାଇଥିଲା। ଏଥିଲାଗି ଡାଉନ ଲାଇନ୍ରେ ବିଦ୍ୟୁତ୍ ସରବରାହକୁ ବିଚ୍ଛିନ୍ନ କରାଯାଇଥିଲା। ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଡାଉନ ଲାଇନ୍ରେ ଟ୍ରେନ୍ ଚଳାଚଳ ବନ୍ଦ ରହିଥିଲା। ଡିଆରଏମ୍ ଓ ସିନିୟର ଡିଭିଜନାଲ ଇଞ୍ଜିନିୟରଙ୍କ ଅନୁଧ୍ୟାନ ବେଳେ ବିକାଶ ପରିଷଦର ସଭାପତି ଭଗବାନ ମହାପାତ୍ର, ସାଧାରଣ ସମ୍ପାଦକ ସୁଧାକର ଗିରି, କର୍ମକର୍ତ୍ତା ନିରଞ୍ଜନ ପଣ୍ଡାଶର୍ମା, ଜଗଦୀଶ ଚନ୍ଦ୍ର ପଟ୍ଟନାୟକ, ରବୀନ୍ଦ୍ର ବେହେରା, ଚକ୍ରଧର ଆଚାର୍ଯ୍ୟଙ୍କ ସମେତ ଷ୍ଟେଶନ ମ୍ୟାନେଜର ଏମ୍ ହାଁସଦା, ଶ୍ରୀପତି ରାଉତ, ଆରପିଏଫ୍ ସବ୍ଇନ୍ସପେକ୍ଟର ଭଗବାନ ସିଂହ ପ୍ରମୁଖ ଉପସ୍ଥିତ ଥିଲେ।