ଓ୍ବାଶିଂଟନ,୭ା୫: କରୋନା ଭାଇରସ୍ ବିଷୟରେ ନୂଆ ନୂଆ ତଥ୍ୟ ହସ୍ତଗତ ହେଉଛି। ହେଲେ ଆମେରିକାର ଲସ୍ ଆଲାମୋସ୍ ନ୍ୟାଶନାଲ୍ ଲାବରେଟୋରି(ଏଲ୍ଏଏନ୍ଏଲ୍)ର ବୈଜ୍ଞାନିକମାନେ ଏକ ଚାଞ୍ଚଲ୍ୟକର ତଥ୍ୟ ପ୍ରଘଟ କରିଛନ୍ତି। ଅଦ୍ୟାବଧି ୨ ଲକ୍ଷ ୬୦ ହଜାର ଲୋକଙ୍କ ଜୀବନ ନେଇଥିବା ଏହି ଘାତକ ଭୂତାଣୁର ପରିବର୍ତ୍ତିତ ରୂପକୁ ସେମାନେ ଚିହ୍ନଟ କରିଛନ୍ତି, ଯାହାକି ସାରା ବିଶ୍ୱକୁ ବ୍ୟାପି ଚାଲିଛି। ମହାମାରୀ ଆରମ୍ଭରେ ଅର୍ଥାତ୍ ୨୦୧୯ରେ ଦେଖିବାକୁ ମିଳିଥିବା କରୋନା ଭୂତାଣୁଠାରୁ ଏହା ଅଧିକ ବିପଜ୍ଜନକ ଏବଂ ସଂକ୍ରାମକ ବୋଲି ସେମାନେ କହିଛନ୍ତି।
ଏଲ୍ଏଏନ୍ଏଲ୍ ହେଉଛି ଆମେରିକା ଏନର୍ଜି ଡିପାର୍ଟମେଣ୍ଟର ଜାତୀୟ ଲାବରେଟୋରି। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଆଣବିକ ଅସ୍ତ୍ରଶସ୍ତ୍ରର ପରିକଳ୍ପନା ପାଇଁ ଏହାକୁ ପ୍ରତିଷ୍ଠା କରାଯାଇଥିଲା। ଏହାର ବୈଜ୍ଞାନିକମାନେ ସେମାନଙ୍କ ଅନୁସନ୍ଧାନ ବିଷୟରେ ୩୩ ପୃଷ୍ଠାର ରିପୋର୍ଟ ଗତ ଗୁରୁବାର ପ୍ରକାଶ କରିଛନ୍ତି। କିନ୍ତୁ ତାହାର ସମୀକ୍ଷା କରାଯିବା ବାକି ରହିଛି। ଲସ୍ ଏଞ୍ଜେଲସ୍ ଟାଇମ୍ସ ଅନୁଯାୟୀ, ଫେବୃୟାରୀରେ ୟୁରୋପରେ ବ୍ୟାପିଥିବା କରୋନା ଭାଇରସ୍ ନୂଆ ପ୍ରକାରର ବୋଲି ଜଣାପଡ଼ିଥିଲା। ପରେ ତାହା ଆମେରିକାର ପୂର୍ବ ଉପକୂଳବର୍ତ୍ତୀ ଅଞ୍ଚଳରେ ପହଞ୍ଚତ୍ଥିଲା। ମାର୍ଚ୍ଚ ମଧ୍ୟଭାଗରେ ତାହା ସମଗ୍ର ବିଶ୍ୱରେ ବ୍ୟାପିଯାଇଥିଲା।
ରିପୋର୍ଟରେ କୁହାଯାଇଛି ଯେ, ଏହି ଭୂତାଣୁ ଶୀଘ୍ର ବ୍ୟାପିଥାଏ ଏବଂ ଥରେ ସଂକ୍ରମଣ ହେଲେ ଏହା ଦ୍ୱିତୀୟ ଥର ପାଇଁ ରୋଗୀଙ୍କୁ ଅଧିକ ବିପଜ୍ଜନକ ଭାବେ ଆକ୍ରମଣ କରିଥାଏ। କରୋନା ଭାଇରସ୍ର ବାହ୍ୟ ଅଂଶରେ ଥିବା ଶଙ୍କୁ ବା କିଳାଗୁଡ଼ିକର ଆକୃତି ପରିବର୍ତ୍ତନ ଦେଖିବାକୁ ମିଳୁଛି। ଉକ୍ତ ଶଙ୍କୁଗୁଡ଼ିକ ଭୂତାଣୁକୁ ମାନବ ଶ୍ୱାସପ୍ରଶ୍ୱାସ କୋଷଗୁଡ଼ିକରେ ପ୍ରବେଶ କରିବାକୁ ଦେଇଥାଏ। ଏହି ଭୂତାଣୁର ଅଧିକ ବିପଜ୍ଜନକ ଓ ସଂକ୍ରାମକ ରୂପ ବିଷୟରେ ତୁରନ୍ତ ସଜାଗ ହେବାର ଜରୁରୀ ଆବଶ୍ୟକତା ଥିବା ରିପୋର୍ଟ ପ୍ରସ୍ତୁତକାରୀମାନେ ଅନୁଭବ କରୁଛନ୍ତି। ଫଳରେ କରୋନା ନିରୋଧୀ ଟିକା ପ୍ରସ୍ତୁତିରେ ଲାଗିଥିବା ବୈଜ୍ଞାନିକମାନେ ଏଥିପ୍ରତି ଧ୍ୟାନଦେଇ କାର୍ଯ୍ୟ କରିପାରିବେ। ସାରା ବିଶ୍ୱର ୬ ହଜାରରୁ ଊର୍ଦ୍ଧ୍ୱ କରୋନା ଭୂତାଣୁଜନିତ ପରିଣାମକୁ ବୈଜ୍ଞାନିକମାନେ ଗଣନାତ୍ମକ ବିଶ୍ଲେଷଣ କରିବା ପରେ ଏହି ରିପୋର୍ଟ ପ୍ରସ୍ତୁତ କରିଛନ୍ତି। ଏହି ଅଧ୍ୟୟନରେ କାଲିଫର୍ନିଆର ଡ୍ୟୁକ୍ ୟୁନିଭର୍ସିଟି ଓ ବ୍ରିଟେନର ଶେଫିଲ୍ଡ ୟୁନିଭର୍ସିଟିରର ବୈଜ୍ଞାନିକମାନଙ୍କ ସହ ଏଲ୍ଏଏନ୍ଏଲ୍ ଟିମ୍ କରୋନା ଭୂତାଣୁରେ ୧୪ ପ୍ରକାର ପରିବର୍ତ୍ତନ ଚିହ୍ନଟ କରିଥିଲେ। ଏଲ୍ଏଏନ୍ଏଲ୍ ଟିମ୍ର ନେତୃତ୍ୱ ନେଉଥିବା ବୈଜ୍ଞାନିକ ବେଟେ କୋରବର୍ ତାଙ୍କ ଫେସ୍ବୁକ୍ ପୋଷ୍ଟରେ ଉଲ୍ଲେଖ କରିଛନ୍ତି ଯେ, ଭୂତାଣୁର ପରିବର୍ତ୍ତିତ ରୂପ ଅତି ଶୀଘ୍ର ପ୍ରକଟ ହେଉଥିବା ଆମେ ଦେଖିଛୁ, ଯାହାକି ଚିନ୍ତାଜନକ ବିଷୟ। ମାର୍ଚ୍ଚରେ ଏହା ପ୍ରବଳ ମହାମାରୀ ସାବ୍ୟସ୍ତ ହୋଇଛି।