ରାଇକିଆ,୨୬।୩(ଡି.ଏନ୍.ଏ.): ସାରା ଦେଶ କରୋନା ମୁକାବିଲା ଲାଗି ଲକ୍ଡାଉନ୍ ହେବା ପରେ କନ୍ଧମାଳ ଜିଲା ରାଇକିଆ ଅଞ୍ଚଳରେ ଦୋକାନ ବଜାର ସମ୍ପୂର୍ଣ୍ଣ ବନ୍ଦ ରହିଛି। କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିଛି । ପ୍ରତ୍ୟେକ ଦିନ ସକାଳ ୭ଟାରୁ ୧୧ଟା ପର୍ଯ୍ୟନ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିଛି । ଭିଡ଼ ଯେପରି ନ ହୁଏ ଏବଂ ଗ୍ରାହକ ଯେପରି ସାମାଜିକ ଦୂରତା ରକ୍ଷା କରିପାରିବେ ତାହାକୁ ଦୃଷ୍ଟିରେ ରଖି ବିଭିନ୍ନ ଦୋକାନ ସାମ୍ନାରେ ରେଖାଙ୍କିତ ଚିହ୍ନ କରାଯିବା ସହ ଗ୍ରାହକଙ୍କୁ ଏହି ନିୟମ ମାନିବାକୁ ଅନୁରୋଧ କରାଯାଉଛି । ଅନ୍ୟପକ୍ଷରେ କଳାବଜାର ଯେପରି ନ ହୁଏ ସେଥିପ୍ରତି ଧ୍ୟାନ ଦିଆଯାଉଛି । ଏ ନେଇ ରାଇକିଆ ବଣିକସଂଘ ପକ୍ଷରୁ ସତନ୍ତ୍ର ନିଷ୍ପତ୍ତି ନିଆଯାଇଛି । ଅତ୍ୟାବଶ୍ୟକ ସାମଗ୍ରୀ ଯେପରି ସୁବିଧାରେ ଲୋକେ ପାଇପାରିବେ ସେ ନେଇ ସଂଘ ପକ୍ଷରୁ ବୁଧବାର ରାଇକିଆ ଥାନା ଅଧିକାରୀଙ୍କ ସହ ଆଲୋଚନା କରାଯାଇଥିବା ରାଇକିଆ ବଣିକ ସଂଘ ସମ୍ପାଦକ ବିଜୟ ପଣ୍ଡା କହିଛନ୍ତି ।