କଟକ ଅଫିସ,୧୭।୫: ରେଡ୍ ଜୋନରେ ରହୁଥିବା ବିଦ୍ୟାର୍ଥୀଙ୍କୁ କ୍ୟାମ୍ପସ ଭିତରକୁ ପ୍ରବେଶ ମନା। ସ୍ଥିତି ଆୟତାଧିନ ନ ହେଲା ଯାଏଁ ସେମାନେ ବିଶ୍ୱବିଦ୍ୟାଳୟ ଭିତରକୁ ଆସିପାରିବେ ନାହିଁ। ଏଭଳି କାରଣ ଦର୍ଶାଇ ଜଣେ ବିଦ୍ୟାର୍ଥୀଙ୍କୁ ଫେରାଇ ଦେଇଛନ୍ତି ରେଭେନ୍ଶା ବିଶ୍ୱବିଦ୍ୟାଳୟ କର୍ତ୍ତୃପକ୍ଷ। ଶନିବାର ଏଭଳି ଘଟଣାକୁ ନେଇ ଛାତ୍ରୀଛାତ୍ର ମହଲରେ ଅସନ୍ତୋଷ ପ୍ରକାଶ ପାଇଛି।
ବିଦ୍ୟାର୍ଥୀ ଜଣଙ୍କ ବାଲେଶ୍ୱରର ବାସିନ୍ଦା। ସେ ରେଭେନ୍ଶା ବିଶ୍ୱବିଦ୍ୟାଳୟର ପଦାର୍ଥ ବିଜ୍ଞାନ ସ୍ନାତକ ପାଠ୍ୟକ୍ରମର ପ୍ରଥମ ବର୍ଷର ଛାତ୍ର ଓ ଇଷ୍ଟ ହଷ୍ଟେଲର ଅନ୍ତେବାସୀ। ପ୍ରଥମ ସେମିଷ୍ଟର ପରୀକ୍ଷା ଶେଷ ହୋଇଛି। ଲକ୍ଡାଉନ ଘୋଷଣା ପୂର୍ବରୁ ସେ ବ୍ୟକ୍ତିଗତ କାର୍ଯ୍ୟରେ ଘରକୁ ଯାଇଥିଲେ। ଘରେ ଥିବାବେଳେ ଜନତା କର୍ଫ୍ୟୁ ଜାରି ହୋଇଥିଲା। ପରେ ଯାତାୟତ ବ୍ୟବସ୍ଥା ବନ୍ଦ ହୋଇଥିଲା। ଛାତ୍ର ଜଣଙ୍କ ନ୍ୟାସନାଲ ଏଲିଜିବିଲିଟ କମ୍ ଏଣ୍ଟ୍ରାନ୍ସ ଟେଷ୍ଟ (ଏନ୍ଇଇଟି) ପାଇଁ ପ୍ରସ୍ତୁତି ଚଳାଇଛନ୍ତି। ଜୁଲାଇ ୨୬ରେ ପ୍ରବେଶିକା ପରୀକ୍ଷା ରହିଛି। ସେଥିପାଇଁ କିଛି ଆନୁସଙ୍ଗିକ ପୁସ୍ତକ ନେବା ପାଇଁ ସେ କଟକ ଆସିଥିଲେ। ହଷ୍ଟେଲ ରୁମ୍ରେ ରହିଯାଇଥିବା ପୁସ୍ତକ ନେବା ପାଇଁ ସେ ବାଲେଶ୍ୱର ଉପଜିଲାପାଳଙ୍କଠାରୁ ଅନୁମତି ଆଣିଥିଲେ ବୋଲି କହିଛନ୍ତି। କିନ୍ତୁ ବିଶ୍ୱବିଦ୍ୟାଳୟ ଫାଟକ ନିକଟରେ ସୁରକ୍ଷାକର୍ମୀ ତାଙ୍କୁ ଭିତରକୁ ଛାଡ଼ି ନ ଥିଲେ। ଛାତ୍ର ଜଣଙ୍କ ଏ ନେଇ କୁଳପତି ପ୍ରଫେସର ଇଶାନ କୁମାର ପାତ୍ରଙ୍କ ସହ ଯୋଗାଯୋଗ କରିଥିଲେ। ‘ତୁମେ ହଷ୍ଟେଲ ୱାର୍ଡେନଙ୍କ ସହ ଯୋଗାଯୋଗ କର’ ବୋଲି କୁଳପତି କହିଥିଲେ। ଇଷ୍ଟ ହଷ୍ଟେଲ ୱାର୍ଡେନ ଡ. ପୂର୍ଣ୍ଣେନ୍ଦୁ ପାଢ଼ୀଙ୍କୁ ଛାତ୍ର ଜଣଙ୍କ କଲ୍ କରିଥିଲେ ସୁଦ୍ଧା ସେ ରିସିଭି କରି ନ ଥିଲେ। କିଛି ସମୟ ପରେ ୱାର୍ଡେନ ଡ. ପାଢ଼ୀ ଫୋନ କରି କହିଥିଲେ- ତୁମେ ବାଲେଶ୍ୱରରୁ ଆସିଛ, ଏଣୁ ହଷ୍ଟେଲ ଭିତରକୁ ପ୍ରବେଶ ଅନୁମତି ଦିଆଯିବ ନାହିଁ। ହଷ୍ଟେଲ କେୟାର ଟେକରଙ୍କ ଜରିଆରେ ପୁସ୍ତକଗୁଡ଼ିକୁ ହଷ୍ଟେଲ ରୁମରୁ ଆଣିଦେବା ପାଇଁ ସେ ନିବେଦନ କରିଥିଲେ। ହେଲେ ନିରାଶ ହୋଇ ସନ୍ଧ୍ୟାରେ ତାଙ୍କୁ ବାଲେଶ୍ୱର ଫେରିବାକୁ ପଡ଼ିଥିଲା।
ଉଲ୍ଲେଖଯୋଗ୍ୟ, ଲକ୍ଡାଉନ ମଧ୍ୟବର୍ତ୍ତୀକାଳୀନ ସମୟରେ ବିଶ୍ୱବିଦ୍ୟାଳୟର କେତେକ ନିର୍ଦ୍ଦିଷ୍ଟ ଅଧ୍ୟାପକ ରେଡ ଜୋନ ଅଞ୍ଚଳରୁ ଆସିଛନ୍ତି। ପାଠପଢ଼ା ନ ହେଉଥିଲେ ସୁଦ୍ଧା ସେମାନେ ନିୟମିତ ବିଶ୍ୱବିଦ୍ୟାଳୟ କାର୍ଯ୍ୟରେ ଯୋଗ ଦେଉଥିବା ଦେଖିବାକୁ ମିଳୁଛି। ରେଡ୍ ଜୋନରୁ ଆସୁଥିବା ଅଧ୍ୟାପକଙ୍କ ପାଇଁ ନିୟମ ଖିଲାପ ହେଉଥିବା ବେଳେ ଛାତ୍ରୀଛାତ୍ରଙ୍କ କ୍ଷେତ୍ରରେ କଟକଣା ରହିବା ନେଇ କେତେକ ଛାତ୍ରୀଛାତ୍ର ଏହାର ନିନ୍ଦା କରିଛନ୍ତି। ଏ ସମ୍ପର୍କରେ କୁଳପତି ପ୍ରଫେସର ଇଶାନ କୁମାର ପାତ୍ରଙ୍କ ସହ ଯୋଗାଯୋଗ ପାଇଁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ନ ଥିଲା। ୱାର୍ଡେନ ଡ. ପାଢ଼ୀ ମତ ଦେଇଛନ୍ତି ଯେ, ଆମେ ତାଙ୍କୁ ନିରାଶ କରିନାହୁଁ । କିଛି ଦିନ ପରେ ଆସି ପୁସ୍ତକ ନେଇଯିବାକୁ କହିଛୁ।