ଲଣ୍ଡନ, ୧୫।୫:କରୋନା ଭାଇରସ ସଂକ୍ରମଣ ପ୍ରଭାବରୁ ୨୦୨୦ ଫର୍ମୁଲାୱାନ ମୋଟରରେସିଂ ସିଜନ ଗୁରୁତର ପ୍ରଭାବିତ ହୋଇଥିବାବେଳେ ୨୦୨୧ ସିଜନ ପାଇଁ ପ୍ରକ୍ରିୟା ଆରମ୍ଭ ହୋଇଛି। ୨୦୨୦ରେ ରେନଲ୍ଟ ଟିମ୍ ପକ୍ଷରୁ ରେସ୍ କରିଥିବା ଡାନିଏଲ ରିକାର୍ଡୋ ଆଗାମୀ ସିଜନରେ ମ୍ୟାକଲରେନ ଡ୍ରାଇଭ୍ କରିବେ। ସେଠାରେ ସେ ସ୍ପେନର କାର୍ଲୋସ ସିଞ୍ଜ୍ଙ୍କ ସ୍ଥାନ ନେବେ। ଅଷ୍ଟ୍ରେଲିଆର ରିକାର୍ଡୋଙ୍କ ଟିମ୍ ପରିବର୍ତ୍ତନ ସମ୍ପର୍କରେ ଗୁରୁବାର ମ୍ୟାକଲରେନ ପକ୍ଷରୁ ସ୍ପଷ୍ଟ କରାଯାଇଛି। ଅନ୍ୟପକ୍ଷରେ ସିଞ୍ଜ୍ ୨୦୨୧ ସିଜନରେ ଫେରାରି ପକ୍ଷରୁ ପ୍ରତିନିଧିତ୍ୱ କରିବା ଏକପ୍ରକାର ନିଶ୍ଚିତ ହୋଇଛି। ଆଗାମୀ ସିଜନରେ ମ୍ୟାକଲରେନରେ ୩୦ ବର୍ଷୀୟ ରିକାର୍ଡୋଙ୍କ ପାର୍ଟନର ହେବେ ବ୍ରିଟିଶ୍ ଡ୍ରାଇଭର ଲାନ୍ଡୋ ନୋରିସ। ରିକାର୍ଡୋ ରେଡ୍ବୁଲ୍ ପକ୍ଷରୁ ୭ଟି ରେସ୍ ଜିତିବାର ରେକର୍ଡ ବହନ କରୁଛନ୍ତି।
ସିଞ୍ଜ୍ଙ୍କ ଯୋଗଦାନ ସମ୍ପର୍କରେ ଫେରାରି ପକ୍ଷରୁ ଏପର୍ଯ୍ୟନ୍ତ ବିଧିବଦ୍ଧ ଘୋଷଣା କରାଯାଇ ନ ଥିଲେ ହେଁ ସେବାଷ୍ଟିଆନ ଭେଟେଲଙ୍କ ସହିତ ଦୀର୍ଘ ୬ ବର୍ଷର ସମ୍ପର୍କ ଛିନ୍ନ ହୋଇଥିବା ପ୍ରକାଶ କରାଯାଇଛି। ଭେଟେଲଙ୍କ ସ୍ଥାନ ସିଞ୍ଜ୍ ନେବେ ବୋଲି ଆଲୋଚନା ହେଉଛି। ରିକାର୍ଡୋଙ୍କ ସହିତ ଦୀର୍ଘ ମିଆଦି ଭିତ୍ତିରେ ଚୁକ୍ତି ସ୍ବାକ୍ଷର ହୋଇଥିବା ମ୍ୟାକଲରେନ ପକ୍ଷରୁ ସ୍ପଷ୍ଟ କରାଯାଇଛି। ”ଡାନିଏଲଙ୍କ ସହିତ ଚୁକ୍ତି କରି ଆମେ ଦୀର୍ଘକାଳୀନ ଯୋଜନାରେ ଆଗକୁ ବଢ଼ିଛୁ। ଲାନ୍ଡୋ ଏବଂ ରିକାର୍ଡୋଙ୍କ ଉପସ୍ଥିତିରେ ଦଳ ମଜଭୁତ ହୋଇଛି“ ବୋଲି ମ୍ୟାକ୍ଲରେନ ରେସିଂ ସିଇଓ ଜ୍ୟାକ୍ ବ୍ରାଉନ୍ ପ୍ରକାଶ କରିଛନ୍ତି। ସିଞ୍ଜ୍ ପ୍ରକୃତରେ ଜଣେ ଟିମ୍ ପ୍ଲେୟର। ତାଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି ବ୍ରାଉନ। ଅନ୍ୟପକ୍ଷରେ ରିକାର୍ଡୋଙ୍କ ସହ ଚୁକ୍ତି ନବୀକରଣ ପାଇଁ ଉଦ୍ୟମ ହୋଇଥିଲା। ମାତ୍ର ଏହା ସଫଳ ହୋଇପାରି ନ ଥିଲା ବୋଲି ରେନଲ୍ଟ ପକ୍ଷରୁ କୁହାଯାଇଛି।
