ମୁମ୍ବାଇ,୮-୮: ଅର୍ଥନୀତିକୁ ପ୍ରୋତ୍ସାହିତ କରିବାକୁ ଯାଇ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ବୁଧବାର ରେପୋ ରେଟ୍ ୦.୩୫% ହ୍ରାସ କରିଛି। ମୁଦ୍ରାନୀତି କମିଟି(ଏମ୍ପିସି)ର ତିନିଦିନିଆ ବୈଠକ ଶେଷରେ କେନ୍ଦ୍ରୀୟ ବ୍ୟାଙ୍କ ପକ୍ଷରୁ ସୁଧ ହାର ହ୍ରାସ ସମ୍ପର୍କରେ ଘୋଷଣା କରାଯାଇଛି। ଫଳରେ ରେପୋ ରେଟ ୫.୭୫ରୁ ୫.୪୦ ପ୍ରତିଶତକୁ ଖସି ଆସିଛି। ଯାହା କି ୯ ବର୍ଷ ପରେ ସର୍ବନିମ୍ନ ସ୍ତର କୁହାଯାଉଛି। ଏଥିପୂର୍ବରୁ ୨୦୧୦ ଏପ୍ରିଲରେ ରେପୋ ରେଟ ୫.୨୫%ର ସର୍ବନିମ୍ନ ସ୍ତର ଛୁଇଁଥିଲା। କ୍ରମାଗତ ଚତୁର୍ଥଥର ଆର୍ବିଆଇ ରେପୋ ରେଟ୍ ହ୍ରାସ କରି ଇତିହାସ ରଚିଛି। ଏମ୍ପିସିର ୬ ସଦସ୍ୟଙ୍କ ମଧ୍ୟରୁ ୪ ଜଣ ରବୀନ୍ଦ୍ର ଢ଼ୋଲକିଆ,ଦେବବ୍ରତ ପାତ୍ର, ବିଭୁ ପ୍ରସାଦ ଏବଂ ଗଭର୍ନର ଶକ୍ତିକାନ୍ତ ଦାସ ୦.୩୫% ରେପୋ ରେଟ ହ୍ରାସକୁ ସମର୍ଥନ କରିଥିବା ବେଳେ ଅନ୍ୟ ଦୁଇଜଣ ଚେତନ ଘଟେ ଏବଂ ପାମୀ ଦୁଆ ୦.୨୫% କମାଇବାକୁ ଯୁକ୍ତି ଦର୍ଶାଇଥିଲେ। ଆର୍ବିଆଇ ପକ୍ଷରୁ ରିଭର୍ସ ରେପୋ ରେଟକୁ ୫.୧୫%କୁ ହ୍ରାସ କରାଯାଇଛି। ପୂର୍ବରୁ ଏହା ୫.୫୦ ପ୍ରତିଶତ ରହିଥିଲା। ସୂଚନାଥାଉ କି, ରିଜର୍ଭ ବ୍ୟାଙ୍କ ଚଳିତ ବର୍ଷ ଫେବୃୟାରୀ ୭, ଏପ୍ରିଲ ୪, ଜୁନ୍ ୬ରେ ତିନି ଥରରେ ୦.୨୫% ଲେଖାଏ ମୋଟ ୦.୭୫% ରେପୋ ରେଟ ହ୍ରାସ କରିସାରିଛି। ଗଭର୍ନର ଦାସ କହିଛନ୍ତି ଯେ, ରେପୋ ରେଟ୍ ୩୫ ବେସିସ୍ ପଏଣ୍ଟ ହ୍ରାସ ସନ୍ତୁଳିତ ଥିବା ମନେ ହେଉଛି। ବର୍ତ୍ତମାନ ପରିସ୍ଥିତିରେ ୨୫ ବେସିସ୍ ପଏଣ୍ଟ ହ୍ରାସ ଆବଶ୍ୟକତା ଠାରୁ କମ୍ ହେବ ବୋଲି ଅନୁଭବ ହୋଇଥିଲା। ସମସ୍ତ ସେକ୍ଟରକୁ ପର୍ଯ୍ୟାପ୍ତ ନଗଦ ଯୋଗାଇ ଦିଆଯିବ ବୋଲି ଉଲ୍ଲେଖ କରି ସେ କହିଛନ୍ତି ଯେ, ବର୍ତ୍ତମାନର ମାନ୍ଦାବସ୍ଥା ଢ଼ାଞ୍ଚାଗତ ନୁହେଁ ବରଂ ଏହା ଚକ୍ରିୟ ବୋଲି କୁହାଯାଇପାରେ।