କଟକ ଅଫିସ,୩।୪: ଅନ୍ଲାଇନରେ ଚାଲିଛି ପାଠପଢା। ଅଧ୍ୟାପକମାନେ ଭିଡିଓ କନ୍ଫରେନ୍ସିଂ ମାଧ୍ୟମରେ ଛାତ୍ରୀଛାତ୍ରଙ୍କର କ୍ଲାସ ନେଉଛନ୍ତି। ସାରା ଦେଶରେ ଲକ୍ଡାଉନ ପାଇଁ ସମସ୍ତ ଶିକ୍ଷାନୁଷ୍ଠାନରେ ଏପ୍ରିଲ ୧୫ ତାରିଖ ପର୍ଯ୍ୟନ୍ତ ପାଠପଢା ବନ୍ଦ ରହିଛି। ଏହାକୁ ଦୃଷ୍ଟିରେ ରଖି ରେଭେନ୍ଶା ବିଶ୍ୱବିଦ୍ୟାଳୟ ପକ୍ଷରୁ ସ୍ବତନ୍ତ୍ର ପଦକ୍ଷେପ ନିଆଯାଇଛି। ଲକ୍ଡାଉନ ସମୟରେ ଅଧ୍ୟାପକମାନେ ଭିଡିଓ କନଫରେନ୍ସିଂରେ ଛାତ୍ରୀଛାତ୍ରଙ୍କ କ୍ଲାସ ନେବା ପାଇଁ କୁଳପତି ପ୍ରଫେସର ଈଶାନ କୁମାର ପାତ୍ର ନିର୍ଦ୍ଦେଶ ଦେଇଛନ୍ତି। ଏଥିପାଇଁ ବିଶ୍ୱବିଦ୍ୟାଳୟର ସମସ୍ତ ବିଭାଗର ମୁଖ୍ୟଙ୍କୁ ଦାୟିତ୍ୱ ଦିଆଯାଇଛି। ଅଧ୍ୟାପକମାନେ କ୍ଲାସ ନେଉଛନ୍ତି କି ନାହିଁ ସେ ବିଷୟରେ ଅବଗତ କରାଇବା ସହ କୋର୍ସ ଶେଷ କରିବାକୁ ମଧ୍ୟ କୁଳପତି କହିଛନ୍ତି। ଏଥିପାଇଁ ‘ଜୁମ୍’ ନାମକ ଏକ ଆପ୍ ସହଯୋଗରେ ଏକ ସମୟରେ ଶହେରୁ ଉର୍ଦ୍ଧ୍ୱ ଛାତ୍ରୀଛାତ୍ରଙ୍କ କ୍ଲାସ ନିଆଯାଉଥିବା କୁଳପତି କହିଛନ୍ତି । ପ୍ରତିଦିନ ପୂର୍ବାହ୍ନ ୧୦ଟାରୁ କ୍ଲାସ ଆରମ୍ଭ ହେଉଛି ଏବଂ କେଉଁ ବିଷୟ ଉପରେ କ୍ଲାସ କରାଯାଉଛି ସେ ନେଇ ବିଶ୍ୱବିଦ୍ୟାଳୟକୁ ତଥ୍ୟ ଦେବାକୁ ସମସ୍ତ ଅଧ୍ୟାପକଙ୍କୁ ନିର୍ଦ୍ଦେଶ ଦିଆଯାଇଛି।
ୱେବ୍ସାଇଟରୁ ମିଳିବ ପାଠ୍ୟପୁସ୍ତକ
ରେଭେନ୍ଶା ବିଶ୍ୱବିଦ୍ୟାଳୟର ୱେବସାଇଟରେ ଛାତ୍ରୀଛାତ୍ରଙ୍କୁ ପାଠ୍ୟପୁସ୍ତକ ପାଇପାରିବେ। ଅନଲାଇନରେ ଯେଉଁ କ୍ଲାସ କରାଯିବ ତାହାର ପାଠ୍ୟପୁସ୍ତକ ବିଶ୍ୱବିଦ୍ୟାଳୟ ୱେବସାଇଟକୁ ଯାଇ ପଢିପାରିବେ ବୋଲି ବିଶ୍ୱବିଦ୍ୟାଳୟ ପକ୍ଷରୁ ସୂଚନା ଦିଆଯାଇଛି।