କଟକ ଅଫିସ,୨୦ା୭: ରେଭେନ୍ଶା ବିଶ୍ୱବିଦ୍ୟାଳୟରେ ଶୁକ୍ରବାର ଆଇଏସ୍ଟି ଓ ଆଇଟିଏମ୍ ବିଭାଗରେ ନାମଲେଖା ସମୟରେ ଅଭିଭାବକ ଏବଂ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ଦେଖାଯାଇଛି। ନିର୍ଦ୍ଧାରିତ ସିଟ୍ଠାରୁ ଅଧିକ ଛାତ୍ରୀଛାତ୍ରଙ୍କୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ନାମଲେଖା ନିମନ୍ତେ ନିମନ୍ତ୍ରଣ କରିଥିଲେ। ସିଟ୍ ପୂରଣ ହୋଇଯିବା ଯୋଗୁ ବହୁସଂଖ୍ୟକ ଛାତ୍ରୀଛାତ୍ର ଓ ସେମାନଙ୍କ ଅଭିଭାବକଙ୍କୁ ନିରାଶ ହେବାକୁ ପଡ଼ିଥିଲା। ଦୂରଦୂରାନ୍ତରୁ ଆସିଥିବା ଅଭିଭାବକମାନେ ନାମଲେଖା ପ୍ରକୋଷ୍ଠ ବାହାରେ ହୋହଲ୍ଲା କରିବା ଦେଖିବାକୁ ମିଳିଥିଲା।
ଶୁକ୍ରବାର ବିଶ୍ୱବିଦ୍ୟାଳୟରେ ଆଇଏସଟି ଓ ଆଇଟିଏମ୍ (ସେଲ୍ଫ ଫାଇନାନ୍ସିଂ) ବିଭାଗରେ ସାଧାରଣବର୍ଗ ଓ ସଂରକ୍ଷିତବର୍ଗଙ୍କୁ ମିଶାଇ ମୋଟ ୪୦୦ ସିଟରେ ନାମଲେଖା ଯାଇଥିଲା। ବିଶ୍ୱବିଦ୍ୟାଳୟ ପକ୍ଷରୁ ମୋଟ ୮୦୦ ଛାତ୍ରୀଛାତ୍ରଙ୍କୁ ନାମଲେଖା ପ୍ରକ୍ରିୟା ପାଇଁ ନିମନ୍ତ୍ରଣ ଦିଆଯାଇଥିଲା। କମ୍ ସମୟ ଭିତରେ ସାଧାରଣବର୍ଗଙ୍କ ପାଇଁ ଉଦ୍ଦିଷ୍ଟ ସମସ୍ତ ସିଟ୍ ପୂରଣ ହୋଇଯାଇଲା। ପରେ ସଂରକ୍ଷଣ ଭିତିରେ ଆଇଏସଟି ବିଭାଗରେ ୫୩ ଏବଂ ଆଇଟିଏମ୍ ବିଭାଗରେ ୮୭ଟି ସିଟ ବଳକା ରହିଥିଲା। ନାମଲେଖା ପାଇଁ ରାଜ୍ୟ ଏବଂ ରାଜ୍ୟ ବାହାରୁ ଅନେକ ଛାତ୍ରୀଛାତ୍ର ଓ ସେମାନଙ୍କ ସାଥିରେ ଅଭିଭାବକ ବିଶ୍ୱବିଦ୍ୟାଳୟ ଆସିଥିଲେ। ନାମଲେଖା ପାଇଁ ଅଳ୍ପ ସଂଖ୍ୟକ ସିଟ୍ ଥିବାବେଳେ ଏତେ ସଂଖ୍ୟକ ଛାତ୍ରୀଛାତ୍ରଙ୍କୁ କାହିଁକି ଡକାଯାଇଥିଲା ବୋଲି ଅଭିଭାବକ ପ୍ରଶ୍ନ କରିଛନ୍ତି। ବିଶ୍ୱବିଦ୍ୟାଳୟ ପକ୍ଷରୁ ନାମଲେଖା ଲାଗି ଆଇଏସ୍ଟି ଓ ଆଇଟିଏମ୍ ବିଷୟ ପାଇଁ ଯଥାକ୍ରମେ ୩୦ହଜାର ଓ ୩୫ହଜାର ଟଙ୍କାର ଡିମାଣ୍ଡ ଡ୍ରାଫ୍ଟ ଆଣିବା ପାଇଁ ନିର୍ଦ୍ଦେଶ ରହିଥିଲା। ତେଣୁ ନାମ ଲେଖାଇ ପାରି ନ ଥିବା ଛାତ୍ରୀଛାତ୍ରଙ୍କୁ ଏବେ ଉକ୍ତ ଡ୍ରାଫ୍ଟକୁ ବ୍ୟାଙ୍କ୍ରେ କ୍ୟାନ୍ସଲ କରିବାକୁ ପଡିବ। ନାମ ଲେଖାଇବା ପାଇଁ ଛାତ୍ରୀଛାତ୍ର ସକାଳୁ ସନ୍ଧ୍ୟାଯାଏ ଅପେକ୍ଷା କରି ନିରାଶ ହେବାକୁ ପଡିଥିଲା।