କଟକ ଅଫିସ,୨୪ା୪: କରୋନା ମହାମାରୀ ପାଇଁ ଜୁନ ୧୭ତାରିଖ ପର୍ଯ୍ୟନ୍ତ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିବ ବୋଲି ରାଜ୍ୟ ସରକାର ଘୋଷଣା କରିଛନ୍ତି। ଏହାକୁ ଦୃଷ୍ଟିରେ ରଖି ରେଭେନ୍ଶା ବିଶ୍ୱବିଦ୍ୟାଳୟ ପକ୍ଷରୁ ସ୍ବତନ୍ତ୍ର ପଦକ୍ଷେପ ନିଆଯାଇଥିଲା। ଅନ୍ଲାଇନରେ ହେଉଥିବା କ୍ଲାସର ପାଠପୁସ୍ତକ ବିଶ୍ୱବିଦ୍ୟାଳୟ ୱେବସାଇଟରୁ ଛାତ୍ରୀଛାତ୍ରମାନେ ପାଇପାରିବେ ବୋଲି କୁହାଯାଇଥିଲା। ଗତ କିଛିଦିନ ହେବ ବିଶ୍ୱବିଦ୍ୟାଳୟର ସମସ୍ତ ବିଭାଗ ପାଠ୍ୟପୁସ୍ତକ ୱେବସାଇଟରେ ଅପ୍ଲୋଡ୍ କରାଯାଇଛି। ଛାତ୍ରୀଛାତ୍ରମାନେ ଏଠାରୁ ସମସ୍ତ ପୁସ୍ତକ ପାଇପାରିବେ।
ସୂଚନା ଅନୁଯାୟୀ, ରେଭେନ୍ଶା ବିଶ୍ୱବିଦ୍ୟାଳୟର କୁଳପତି ପ୍ରଫେସର ଈଶାନ କୁମାର ପାତ୍ର କୋର୍ସ ସାରିବାକୁ ସମସ୍ତ ବିଭାଗର ଅଧ୍ୟାପକଙ୍କୁ ନିର୍ଦ୍ଦେଶ ଦେଇଥିଲେ। ଏଥିଲାଗି ଅନ୍ଲାଇନରେ ପାଠପଢା ଚାଲିଛି। ଅଧ୍ୟାପକମାନେ ଭିଡିଓ କନଫରେନ୍ସିଂ ମାଧ୍ୟମରେ କ୍ଲାସ ନେଉଛନ୍ତି। କ୍ଲାସ ଠିକ ଭାବେ ହେଉଛି କି ନାହିଁ ତଦାରଖ କରିବାକୁ ସମସ୍ତ ବିଭାଗର ମୁଖ୍ୟଙ୍କୁ କୁଳପତି ନିର୍ଦ୍ଦେଶ ଦେଇଛନ୍ତି। ତେବେ ବିଶ୍ୱବିଦ୍ୟାଳୟ ବନ୍ଦ ଥିବାରୁ ଛାତ୍ରୀଛାତ୍ରମାନେ ପାଠ୍ୟପୁସ୍ତକ ପାଇପାରୁନାହାନ୍ତି। ଏଥିଯୋଗୁ ସମସ୍ତ ଅଧ୍ୟାପକ ଯେଉଁ ବିଷୟରେ ପଢାଇଛନ୍ତି ତା’ର ପାଠ୍ୟପୁସ୍ତକ ବିଶ୍ୱବିଦ୍ୟାଳୟକୁ ଦେବା ପାଇଁ ନିର୍ଦ୍ଦେଶ ଦେଇଥିଲେ। ସମସ୍ତ ବିଭାଗର ଉଭୟ ସ୍ନାତକ ଏବଂ ସ୍ନାତକୋତ୍ତର ପାଠ୍ୟପୁସ୍ତକ ଏବେ ବିଶ୍ୱବିଦ୍ୟାଳୟ ୱେବସାଇଟରେ ମିଳୁଛି। ଛାତ୍ରୀଛାତ୍ର ବିଶ୍ୱିଦ୍ୟାଳୟର ଇ-ଗ୍ରନ୍ଥାଳୟକୁ ଯାଇ ପାଠ୍ୟପୁସ୍ତକ ପାଇପାରିବେ। ଆଗାମୀ ଦିନରେ ହେବାକୁ ଥିବା ପରୀକ୍ଷା ପାଇଁ ଛାତ୍ରୀଛାତ୍ରଙ୍କୁ ଏହି ପଦକ୍ଷେପ ସହାୟକ ହୋଇପାରିବ ବୋଲି କୁଳପତି ପାତ୍ର କହିଛନ୍ତି।