ନୂଆଦିଲ୍ଲୀ,୨୨।୫ : କରୋନା ମାମଲା ଥମୁ ନ ଥିବାରୁ ବର୍ତ୍ତମାନ ସାରା ଦେଶରେ ରେଳସେବା ସମ୍ପୂର୍ଣ୍ଣ ଭାବେ ସ୍ବାଭାବିକ ହୋଇପାରି ନାହିଁ। ୧୫ ଯୋଡ଼ା ସ୍ବତନ୍ତ୍ର ଟ୍ରେନ ସହ ପ୍ରବାସୀଙ୍କୁ ଫେରାଇ ଆଣିବା ଲାଗି ଶ୍ରମିକ ସ୍ବତନ୍ତ୍ର ଟ୍ରେନ୍ ଏବେ ଚଳାଚଳ କରୁଛି। ବର୍ତ୍ତମାନ ସୁଦ୍ଧା ରେଲଓ୍ବେର ଟିକେଟ କାଉଣ୍ଟରଗୁଡ଼ିକରେ ଟିକେଟ କାଟିବା ବ୍ୟବସ୍ଥା କରାଯାଇନାହିଁ। ଲୋକମାନେ ଆଇଆର୍ସିଟିସି ଓ୍ବେବ୍ସାଇଟକୁ ଯାଇ ଟିକେଟ କ୍ରୟ କରୁଛନ୍ତି। ଏହି ସମସ୍ୟାକୁ ଧ୍ୟାନରେ ରଖି ଶୀଘ୍ର କାଉଣ୍ଟରରେ ଟିକେଟ ଯୋଗାଣ ବ୍ୟବସ୍ଥା କରିବାକୁ ରେଲଓ୍ବେ ଯୋଜନା ରଖିଛି। ଶୁକ୍ରବାର ସୁଦ୍ଧା ୧.୭୦ ଲକ୍ଷ କମନ ସର୍ଭିସ ସେଣ୍ଟରରେ ଦ୍ୱାରା ଲୋକଙ୍କୁ ଟିକେଟ କରିବା ସୁବିଧା ଦିଆଯିବ। ଆଗାମୀ ୨ରୁ ୩ ଦିନରେ ରେଲଓ୍ବେର ଟିକେଟ କାଉଣ୍ଟରଗୁଡିକ ମଧ୍ୟ ଏହି ଯୋଜନାରେ ଯୋଡି ହେବେ। ଜୁନ୍ ପହିଲାରୁ ୨୦୦ ଅଣଏସି ଟ୍ରେନ୍ ଚଳାଇବା ଲାଗି ରେଳ ମନ୍ତ୍ରଣାଳୟ ଯୋଜନା ରଖିଛି। ଏଥିଲାଗି ଗୁରୁବାରଠାରୁ ଟିକେଟ ବୁକିଂ ଆରମ୍ଭ ହୋଇଛି। ଅଢେଇ ଘଣ୍ଟାରେ ୪ରୁ ୫ ଲକ୍ଷ ଟିକେଟ ବୁକିଂ ହୋଇଥିବା ରେଳମନ୍ତ୍ରୀ ପୀୟୂଷ ଗୋୟଲ ସୂଚନା ଦେଇଛନ୍ତି। ପୂର୍ବ ଏବଂ ଉତ୍ତର ପୂର୍ବାଞ୍ଚଳ ଭାଗକୁ ଟ୍ରେନ୍ ଏଥିରେ ସାମିଲ ନାହିଁ। ଜୁନ୍ରୁ ଅଧିକ ଟ୍ରେନ୍ ଯୋଡ଼ିବା ଲାଗି ରେଲଓ୍ବେ ଆଶାବାଦୀ ରହିଛି।