ମୁମ୍ବାଇ,୨୪-୩: ଭାରତୀୟ ରେଳପଥ ପକ୍ଷରୁ ଦେଶର ପ୍ରଥମ ପଡ୍ ହୋଟେଲ ବା କ୍ୟାପସୁଲ ରୁମ୍ ବିଶିଷ୍ଟ ହୋଟେଲ ମୁମ୍ବାଇରେ ସ୍ଥାପନ କରାଯିବ। ମୁମ୍ବାଇର ସେଣ୍ଟ୍ରାଲ ରେଲଓ୍ବେ ଷ୍ଟେଶନରେ ଏହି ହୋଟେଲ ଖୋଲିବାକୁ ଥିବା ବେଳେ ଏହା ଦ୍ୱାରା ଶୀଘ୍ର ଯାତ୍ରୀମାନେ ସୁଲଭ ଲଜିଂ ସୁବିଧା ଲାଭ କରିପାରିବେ। ଚଳିତ ବର୍ଷ ଡିସେମ୍ବର ସୁଦ୍ଧା ଏହାକୁ ଶୁଭାରମ୍ଭ କରାଯିବ ବୋଲି ରେଲଓ୍ବେ ପକ୍ଷରୁ ସୂଚନା ଦିଆଯାଇଛି। ମୁମ୍ବାଇ ସେଣ୍ଟ୍ରାଲରେ ପ୍ରଥମଫ୍ଲୋରରେ ରହିଥିବା ୨ ଅଣଶୀତତାପ ନିୟନ୍ତ୍ରିତ ପ୍ରତିକ୍ଷାରୁମ୍କୁ ଏଭଳି ପଡ୍ ରୁମ୍ରେ ପରିବର୍ତ୍ତନ କରାଯିବ। ଏଠାରେ ରାତିରେ ରହଣି ଲାଗି କ୍ଷୁଦ୍ର ଏବଂ ଅଲ୍ଟ୍ରା ମଡର୍ନ ରୁମ ସ୍ଥାପନ କରାଯିବ। ଦେଶରେ ଉପଲବ୍ଧ ହେଉଥିବା ରିଟାୟାରିଂ ରୁମ୍ଠାରୁ ଏହା ଶସ୍ତା ହେବ ବୋଲି କୁହାଯାଇଛି। ଏହିଭଳି ୩୦ ପଡ୍ ସ୍ଥାପନ ନେଇ ଆଇଆର୍ସିଟିସି ଯୋଜନା ରଖିଛି। ଯାତ୍ରୀଙ୍କୁ ଏଥିରେ ୧୨ ଘଣ୍ଟା ରହିବାର ସୁବିଧା ମିଳିବ। କ୍ୟାପସୁଲଗୁଡିକୁ କ୍ଲାସିକ ଏବଂ ସୁଟ୍ ଭଳି ୨ଟି ଭାଗରେ ବିଭକ୍ତ କରାଯାଇଛି। କ୍ଲାସିକ ପଡ୍ ଜଣେ ପାସେଞ୍ଜରଙ୍କୁ ରହିବା ସୁବିଧା ପ୍ରଦାନ କରିବାକୁ ଥିବା ବେଳେ ଲକର, ଚାର୍ଜିଂ ସକେଟ ଏବଂ ବ୍ୟାଗେଜ୍ ସ୍ପେଶ ରହିବ। ସେହିଭଳି ୨ ଜଣ ପାସେଞ୍ଜରଙ୍କ ଲାଗି ବଡ ବେଡ୍ ସୁବିଧା ସୁଟ୍ ପଡ୍ରେ ରହିବ। ଏଥିରେ ବ୍ୟକ୍ତିଗତ ଲକର, ଓ୍ବାଇଫାଇ ଭଳି ସୁବିଧା ରହିବ। ପଡ୍ ହୋଟେଲରେ ଲାଉଞ୍ଜ ଏରିଆ, କାଫେଟେରିଆ, ଚେଞ୍ଜିଂ ଏରିଆ, ଓ୍ବାଶରୁମ ମଧ୍ୟ ରହିବ। ଏଭଳି ହୋଟେଲ ସ୍ଥାପନ କରିବା ଲାଗି ରେଲଓ୍ବେ ୨୦୧୮ରେ ପ୍ରଥମେ ଯୋଜନା ହାତକୁ ନେଇଥିଲା।