ନୂଆଦିଲ୍ଲୀ,୨୭।୭: ଦିନକୁ ଦିନ ପ୍ଲାଷ୍ଟିକର ବ୍ୟବହାର ବଢିଥିବା ବେଳେ ଏହାକୁ ନେଇ ପରିବେଶ ପ୍ରଦୂଷଣର ମାତ୍ରା ମଧ୍ୟ ବଢିବାରେ ଲାଗିଛି। ଏହି ଅସୁବିଧାରୁ ମୁକ୍ତି ପାଇବା ପାଇଁ ପ୍ରାୟ ସବୁ ଦେଶ ଏବେଠାରୁ କାମ ଆରମ୍ଭ କରି ସାରିଲେଣି। ଭାରତ ମଧ୍ୟ ଏ ଦିଗରେ ପଛରେ ନାହିଁ। ଏବେ ଭାରତୀୟ ରେଲଓ୍ବେ ଯାତ୍ରୀମାନଙ୍କ ଦ୍ୱାରା ବ୍ୟବହାର କରାଯାଇଥିବା ପ୍ଲାଷ୍ଟିକ ବୋତଲ ନେଇ ଏହା ବଦଳରେ ୫ ଟଙ୍କା ଦେବ ବୋଲି ସୂଚନା ମିଳିଛି। ଅବଶ୍ୟ ଏହା ପୂର୍ବ-ମଧ୍ୟ ରେଲଓ୍ବେରେ କାର୍ଯ୍ୟକାରୀ ହୋଇଯାଇଥିବା ଜଣାପଡିଛି। ଚାରୋଟି ମୁଖ୍ୟ ଷ୍ଟେଶନରେ ଏହା ଆରମ୍ଭ କରାଯାଇଛି। ପାଟନା ଜଙ୍କଶନ, ରାଜେନ୍ଦ୍ରନଗର, ପାଟନା ସାହିବ ଓ ଦାନାପୁରରେ ଏବେ ପ୍ଲାଷ୍ଟିକ ବୋତଲ ବଦଳରେ ଯାତ୍ରୀଙ୍କୁ ମିଳୁଛି ୫ ଟଙ୍କା। ଭେଣ୍ଡିଂ ମେଶିନ ମାଧ୍ୟମରେ ରେଲଓ୍ବେ ଏହାକୁ କିଣୁଥିବା ବେଳେ ଯାତ୍ରୀମାନେ ମଧ୍ୟ ଆଗ୍ରହର ସହ ବ୍ୟବହୃତ ପ୍ଲାଷ୍ଟିକ ବୋତଲ ଦେଉଥିବା କୁହାଯାଉଛି। ଏହି ପ୍ଲାଷ୍ଟିକ ବୋତଲରୁ ରେଲଓ୍ବେ ଟି-ସାର୍ଟ ଓ ଟୋପି ତିଆରି କରିବ ବୋଲି ଜଣାପଡିଛି। ରେଲଓ୍ବେର ଏଭଳି ପଦକ୍ଷେପ ଫଳରେ ପରିବେଶ ପ୍ରଦୂଷଣକୁ ରୋକାଯାଇ ପାରିବ ବୋଲି କୁହାଯାଉଛି।