ବଅଁରପାଳ,୧ା୬(ଡି.ଏନ୍.ଏ.): ସୋମବାର ନାଲ୍କୋ ସ୍ମେଲଟର ଓ ସିପିପି ପ୍ଲାଣ୍ଟରେ ରେଲଓ୍ବେ ଅପରେଶନରେ କାର୍ଯ୍ୟ କରୁଥିବା ୧୫୦ରୁ ଊର୍ଦ୍ଧ୍ୱ ଶ୍ରମିକ ବିଭିନ୍ନ ଦାବି ନେଇ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି। ଫଳରେ ପ୍ଲାଣ୍ଟ୍୍କୁ ଟ୍ରେନ ଚଳାଚଳ ବାଧାପ୍ରାପ୍ତ ହୋଇଛି। ଏହି ଶ୍ରମିକମାନେ ଦୀର୍ଘ ୨ ବର୍ଷ ହେଲା ୟୁନିରାଲ ରେଲଓ୍ବେ ରୋଡ୍ କନ୍ଷ୍ଟ୍ରକ୍ସନର କାର୍ଯ୍ୟ କରୁଥିଲେ। ମାତ୍ର ଦୀର୍ଘଦିନ ହେଲା ଏହି କମ୍ପାନୀର କାର୍ଯ୍ୟକଳାପ ସମାପ୍ତ ହୋଇଥିବା ବେଳେ କୌଣସି ଶ୍ରମିକଙ୍କୁ ଏପର୍ଯ୍ୟନ୍ତ ପୂର୍ଣ୍ଣ ଦରମା ମିଳିନାହିଁ। ସେହିପରି ଦୀର୍ଘ ୪ ମାସ ହେଲା ଅନ୍ୟ ଏକ କମ୍ପାନୀ ଲିଫ୍ଟ ଆଣ୍ଡ୍ ସିପ୍ଟ କମ୍ପାନୀ ଏହାର କାର୍ଯ୍ୟାଦେଶ ପାଇଛି। ମାତ୍ର କମ୍ପାନୀ ପକ୍ଷରୁ ସୁରକ୍ଷା ସରଞ୍ଜାମ ନିଯୁକ୍ତି ପତ୍ର ବାବଦକୁ ୨ ଶହ ଟଙ୍କା ଲେଖାଏ କୌଣସି ଶ୍ରମିକଙ୍କୁ ପ୍ରଦାନ କରାଯାଇନାହିଁ। ତେଣୁ ଏସବୁ ସୁବିଧା ଯୋଗାଇ ଦେବା ପାଇଁ ଶ୍ରମିକମାନେ ଆନ୍ଦୋଳନ କରିଥିବା କହିଛନ୍ତି। ଏହି ଆନ୍ଦୋଳନରେ ପ୍ରଶାନ୍ତ ରାଉତ, ପ୍ରିୟବ୍ରତ କୁମାର, ଦୀପକ ବିଶ୍ୱାଳ, ପ୍ରହ୍ଲାଦ ସାହୁ, ସୌଭାଗ୍ୟ ନାୟକ ପ୍ରମୁଖଙ୍କ ସମେତ ବହୁ ଶ୍ରମିକ ସାମିଲ ଥିଲେ।