କୋରାପୁଟ,୧୦।୧୨(ସ୍ବ.ପ୍ର.): କୋରାପୁଟ ଜିଲା ରେଲୱେ ଜମି ହରା ସଂଘ ପକ୍ଷରୁ ମଙ୍ଗଳବାର ଆନ୍ଦୋଳନ ଆରମ୍ଭ ହୋଇଛି। କୋରାପୁଟ-କିରୋଣ୍ଡଲ, କୋରାପୁଟ-ରାୟଗଡ଼ା ଓ କୋରାପୁଟ- ବିଶାଖାପାଟଣା ରେଳ ଲାଇନ ଲାଗି ଜମିହରାଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରାଯାଇ ନ ଥିବା ପ୍ରତିବାଦରେ ଏହି ଆନ୍ଦୋଳନ ହୋଇଥିବା ଜଣାପଡ଼ିଛି। ତେବେ ସୁରକ୍ଷା ଦୃଷ୍ଟିରୁ କୋରାପୁଟ ରେଲୱେ ଷ୍ଟେଶନ ପରିସର ସମେତ ରେଲୱେ ଛକ ଅଞ୍ଚଳରେ ବ୍ୟାପକ ପୋଲିସ ମୁତୟନ କରାଯାଇଛି ।
ସୂଚନାନୁଯାୟୀ, ରେଳପଥ ନିର୍ମାଣ ଯଥା ରେଳପଥର ଦୋହରୀକରଣ ନିମନ୍ତେ ବହୁ ଲୋକଙ୍କ ଜମି ଯାଇଛି । ଜମି ବଦଳରେ ଜମିହରାଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରାଯାଇ ନ ଥିବା ଅଭିଯୋଗରେ ରେଲୱେ ଜମିହରା ସଂଘର ସଭାପତି ଜଳନ୍ଧର ଖିଲଙ୍କ ନେତୃତ୍ୱରେ ବହୁବାର ଜିଲାପାଳ ଓ ରେଲୱେ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ ଏଯାବତ୍ କୌଣସି ସମାଧାନ ହୋଇ ନାହିଁ। ଏ ନେଇ ସକାଳୁ ଜମିହରା ସଂଘ କୋରାପୁଟ ରେଲୱେ ଛକ ଓ ରେଲୱେ ଷ୍ଟେଶନ ନିକଟରେ ଧାରଣା ଦେଇଛି।