ବ୍ରହ୍ମପୁର ଅଫିସ , ୪।୬ – ସରକାରୀ ରେଳବାଇ ଥାନା (ଜିଆର୍ପି) ଅନ୍ତର୍ଗତ ଗୋପାଳପୁର ଓଭର ବ୍ରିଜ ତଳ ଦେଇ ଯାଇଥିବା ରେଳଧରଣାରୁ ବୁଧବାର ରାତ୍ର ୧୧ଟା ବେଳେ ଜଣେ ମହିଳାଙ୍କ ମୃତଦେହ ପୋଲିସ ଉଦ୍ଧାର କରିଥିଲା । ମୃତ ମହିଳା ଜଣଙ୍କ ଗାଙ୍ଗପୁର ଥାନା ଅନ୍ତର୍ଗତ ଗୋଡ଼ିଆଳିର ମୂଳନିବାସୀ ଅନିଲ କୁମାର ପ୍ରଧାନଙ୍କ ସ୍ତ୍ରୀ ସୁଷମା ପ୍ରଧାନ (୫୪) ବୋଲି ପୋଲିସ କହିଛି । ଅନିଲ ପ୍ରଧାନ ଗଜପତି ଜିଲାରେ ପୋଲିସ ଡିଏସପି ଭାବେ କାର୍ଯ୍ୟରତ ରହିଥିବା ବେଳେ ବୈଦ୍ୟନାଥପୁର ଥାନା ଅନ୍ତର୍ଗତ ଖୋଡାସିଂ କଳିଙ୍ଗ ନଗରରେ ଘର ଭଡା ନେଇ ରହୁଥିଲେ ବୋଲି ପୋଲିସ ସୂଚନା ଦେଇଛି। ଜିଆରପି ପୋଲିସ ଗୁରୁବାର ଏମ୍କେସିଜି ମେଡିକାଲରେ ମହିଳାଙ୍କ ମୃତଦେହ ଜବତ କରି ୨୨/୨୦ ଅନୁସାରେ ଏକ ଅପମୃତ୍ୟୁ ମାମଲା ରୁଜୁ କରିଛି।
ସୂଚନା ଅନୁଯାୟୀ, ରେଳଧରଣାରେ ଜଣେ ମହିଳାଙ୍କ ମୃତଦେହ ପଡିଥିବା ପୋଲିସ ଖବର ପାଇ ଘଟଣା ସ୍ଥଳରେ ପହଞ୍ଚିଥିଲା। ଅନ୍ୟପଟେ ସ୍ତ୍ରୀ ସୁଷମା ଘରୁ ହଠାତ ନିଖୋଜ ହୋଇଯାଇଥିଲେ। ଅନିଲ ବହୁ ଖୋଜାଖୋଜି କରିବା ପରେ ଶେଷରେ ଖବର ପାଇ ସେ ମଧ୍ୟ ରେଳଧରଣା ନିକଟରେ ପହଞ୍ଚି ସ୍ତ୍ରୀଙ୍କ ମୃତଦେହ ଚିହ୍ନଟ କରିଥିଲେ ବୋଲି ଥାନାଧିକାରୀ ସୁକାନ୍ତ ଭୋଇ ସୂଚନା ଦେଇଛନ୍ତି । ପ୍ରାଥମିକ ତଦନ୍ତରୁ ମହିଳା ଜଣଙ୍କ ଏକ ଗୁଡ୍ସ ଟ୍ରେନ ଆଗକୁ ଆସି ଆତ୍ମହତ୍ୟା କରିଥିବା ସନ୍ଦେହ କରାଯାଉଛି ବୋଲି ସେ କହିଛନ୍ତ।