ଭୁବନେଶ୍ୱର, ୨୯।୯(ବ୍ୟୁରୋ): ରେଳ ଷ୍ଟେଶନ ଓ ରେଳ ପରିସର ମଧ୍ୟରେ ଖୋଲାରେ ଶୌଚ ନ କରିବା ପାଇଁ ଆର୍ପିଏଫ୍ ଥାନା ପକ୍ଷରୁ ଭୁବନେଶ୍ୱର ମୁଖ୍ୟ ରେଳ ଷ୍ଟେଶନରେ ଏକ ସଚେତନତା କାର୍ଯ୍ୟକ୍ରମ କରାଯାଇଛି। ପରିବେଶ ଦୂଷିତ ନ କରି ସ୍ବଚ୍ଛ ଭାରତ ଗଠନରେ ସାମିଲ ହେବାକୁ ଯାତ୍ରୀ ତଥା ସାଧାରଣ ଜନତାଙ୍କୁ ସଚେତନ କରାଯାଇଥିଲା। ଷ୍ଟେଶନରେ ଉପଲବ୍ଧ ଶୌଚାଳୟ ବ୍ୟବହାର କରିବାକୁ ଯାତ୍ରୀମାନଙ୍କୁ ବୁଝାଯାଇଥିଲା। ଆର୍ପିଏଫ୍ ପକ୍ଷରୁ କୁହାଯାଇଛି ଯେ, ସାଧାରଣତଃ କିଛି ଲୋକ ଷ୍ଟେଶନ ପରିସର ଓ ରେଳ ଧାରଣାରେ ଶୌଚ କରିଥାନ୍ତି। ଏଥିପାଇଁ ରେଲ୍ଓ୍ବେ ଧାରା ୧୪୫ ଓ ଧାରା ୧୪୭ରେ ଦଣ୍ଡବିଧାନର ବ୍ୟବସ୍ଥା ରହିଛି ବୋଲି ଯାତ୍ରୀଙ୍କୁ ଅବଗତ କରାଯାଇଥିଲା। ସୂଚନାଯୋଗ୍ୟ, ଭୁବନେଶ୍ୱର ଷ୍ଟେଶନର ଶେଷମୁଣ୍ଡକୁ ଫାଳିକିଆ ବସ୍ତି ଲୋକେ ଧାରଣା ଓ ପରିସରରେ ଶୌଚ କରିଥାନ୍ତି। ତେବେ ଏସବୁ ସ୍ଥାନରେ ଶୌଚ ବନ୍ଦ କରିବା ସକାଶେ ଆର୍ପିଏଫ୍ ଏବେ ବସ୍ତି ନିକଟରେ ଏକ ଶେଡ୍ ନିର୍ମାଣ କରି ଦୁଇଜଣ କର୍ମଚାରୀଙ୍କୁ ନିୟୋଜିତ କରିଛି। ଏହାସତ୍ତ୍ୱେ ଷ୍ଟେଶନ ପରିସର ଓ ଧାରଣା ଅପରିଷ୍କାର କରୁଥିବା ଯାତ୍ରୀଙ୍କଠାରୁ ଜରିମାନା ଆଦାୟ କରାଯାଉଥିବା ସୂଚନା ଦିଆଯାଇଛି।