ଭୁବନେଶ୍ୱର, ୨୬।୯(ବ୍ୟୁରୋ): ପୂର୍ବତଟ ରେଳପଥ ପକ୍ଷରୁ ବୁଧବାର ଖୋର୍ଦ୍ଧାରୋଡ ମଣ୍ଡଳ ପରିସୀମା ଅନ୍ତର୍ଗତ ଏମ୍ପିମାନଙ୍କ ସହ ବୈଠକ ଅନୁଷ୍ଠିତ ହୋଇଯାଇଛି। ଉପସ୍ଥିତ ଏମ୍ପିମାନେ ବୈଠକରେ ନିଜ ନିଜ କ୍ଷେତ୍ର ଭିତରେ ଆସୁଥିବା ରେଳପଥର ସମସ୍ୟା, ବିକାଶ ଓ ନୂତନ ପ୍ରକଳ୍ପ ବିଷୟରେ ଆଲୋଚନା ସହ ରେଳପଥକୁ ପ୍ରସ୍ତାବ ଦେଇଛନ୍ତି। ବୈଠକରେ କଟକ ଏମ୍ପି ଭର୍ତ୍ତୃହରି ମହତାବ, ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ଢେଙ୍କାନାଳ ଏମ୍ପି ମହେଶ ସାହୁ, ପୁରୀ ଏମ୍ପି ପିନାକୀ ମିଶ୍ର, କେନ୍ଦୁଝର ଏମ୍ପି ଚନ୍ଦ୍ରାଣୀ ମୁର୍ମୁ, ଭଦ୍ରକ ଏମ୍ପି ମଞ୍ଜୁଲତା ମଣ୍ଡଳ, ଆସ୍କା ଏମ୍ପି ପ୍ରମିଳା ବିଶୋଇ, ଯାଜପୁର ଏମ୍ପି ଶର୍ମିଷ୍ଠା ସେଠୀ ଏବଂ ଜଗତ୍ସିଂହପୁର ଏମ୍ପି ଡା. ରାଜଶ୍ରୀ ମଲ୍ଲିକ ଯୋଗଦେଇଥିଲେ। ପୂର୍ବତଟ ରେଳପଥର ମହାପ୍ରବନ୍ଧକ ବିଦ୍ୟା ଭୂଷଣ ଓ ଖୋର୍ଦ୍ଧାରୋଡ ମଣ୍ଡଳ ପ୍ରବନ୍ଧକ ଶଶିକାନ୍ତ ସିଂ ପ୍ରମୁଖ ଯୋଗଦେଇଥିଲେ। ଏମ୍ପିମାନେ ଦେଇଥିବା ପ୍ରସ୍ତାବଗୁଡିକ ଜୋନସ୍ତରୀୟ ବୈଠକରେ ବିଶ୍ଲେଷଣ କରାଯିବ। ସେଠାରୁ ଉନ୍ନୀତ ହେଲେ ପ୍ରସ୍ତାବଗୁଡିକୁ ରେଳ ବୋର୍ଡକୁ ସୁପାରିସ କରାଯିବ। ବୈଠକରେ ରେଲଓ୍ବେ ନେଟଓ୍ବର୍କର ଉନ୍ନତୀକରଣ, ଷ୍ଟେଶନଗୁଡିକରେ ଅତିରିକ୍ତ ସୁବିଧା ସହ ନିର୍ଦ୍ଦିଷ୍ଟ ଷ୍ଟେଶନଗୁଡିକରେ ଟ୍ରେନ ରହଣି ବିଷୟରେ ଆଲୋଚନା ହୋଇଛି। ଏହି ଅବସରରେ ପୂର୍ବତଟ ରେଳପଥର କାର୍ଯ୍ୟ ସମୀକ୍ଷା ମଧ୍ୟ କରାଯାଇଥିଲା।