ଏବେ ପଶ୍ଚିମବଙ୍ଗର ରାନୁ ମଣ୍ଡଳଙ୍କୁ ନେଇ ଥମୁନି ଚର୍ଚ୍ଚା। ରେଳ ଷ୍ଟେଶନରେ ଗୀତ ଗାଇ ପେଟ ପୋଷୁଥିବା ରାନୁଙ୍କ ଭାଗ୍ୟ ସମ୍ପୂର୍ଣ୍ଣ ବଦଳିଯାଇଛି। ସେ ଏବେ ସେଲିବ୍ରିଟି ପାଲଟି ଯାଇଛନ୍ତି। ନିକଟରେ ସେ ବଲିଉଡ୍ରେ ଗୀତ ଗାଇବା ପରେ ତାଙ୍କ ଜୀବନକୁ ନେଇ ଆହୁରି ଚର୍ଚ୍ଚା ଉଠିଛି। ଏକ ସଙ୍ଗୀତଭିତ୍ତିକ ରିଏଲିଟି ଶୋ’ ‘ସିଙ୍ଗିଙ୍ଗ୍ ସୁପରଷ୍ଟାର୍’ରେ ମୁଖ୍ୟ ଅତିଥି ଭାବେ ପହଞ୍ଚିଥିଲେ ରାନୁ। ରେଳ ଷ୍ଟେଶନରେ କାହିଁକି ଗୀତ ଗାଉଥିଲେ ବୋଲି ଶୋ’ର ହୋଷ୍ଟ୍ ଜୟ ଭାନୁଶାଳୀ ତାଙ୍କୁ ପଚାରିଥିଲେ। ରାନୁ ଏହାର ଉତ୍ତର ଦେବା ପୂର୍ବରୁ ଭାବପ୍ରବଣ ହୋଇଯାଇଥିଲେ। ମୋ ପାଖରେ ରହିବାକୁ ଘର ନ ଥିଲା କି ଖାଦ୍ୟ କିଣିବାକୁ ଟଙ୍କା ନ ଥିଲା। ରେଳ ଷ୍ଟେଶନରେ ଗୀତ ଗାଇଲେ ମୋତେ ଲୋକ ବିସ୍କୁଟ ଏବଂ କିଛି ଟଙ୍କା ଦେଇଯାଉଥିଲେ। ଏଥିରେ ମୋ ପେଟ ଭରି ଯାଉଥିଲା ବୋଲି ରାନୁ କହିଛନ୍ତି।
କିଛିଦିନ ତଳେ ଷ୍ଟେଶନରେ ଲତା ମଙ୍ଗେସ୍କରଙ୍କ ଗୀତ ‘ଏକ ପ୍ୟାର୍ କା ନଗମା’ ଗାଇ ଚର୍ଚ୍ଚାକୁ ଆସିଥିଲେ ରାନୁ। ସେ ଗାଇଥିବା ଗୀତର ଭିଡିଓ ସୋସିଆଲ ମିଡିଆରେ ନିଆଁ ଭଳି ବ୍ୟାପି ଯାଇଥିଲା। ରାନୁଙ୍କ କଣ୍ଠରୁ ଏହି ଗୀତ ଶୁଣି ଚାରିଆଡେ ତାଙ୍କର ପ୍ରଶଂସା କରାଯାଇଥିଲା। ଲୋକେ ତାଙ୍କୁ ମ୍ୟୁଜିକ ଇଣ୍ଡଷ୍ଟ୍ରୀର ଦ୍ବିତୀୟ ଲତା ଦିଦି ମିଳିଗଲେ ବୋଲି କହିଥିଲେ। ଏବେ ରାନୁଙ୍କୁ ଅନେକ ବଲିଉଡ୍ ଶୋ’ରେ ଗୀତ ଗାଇବା ଲାଗି ଅଫର ଆସୁଛି। ସେ ବଲିଉଡ୍ର ଜଣାଶୁଣା ସଙ୍ଗୀତ ନିର୍ଦ୍ଦେଶକ ତଥା କଣ୍ଠଶିଳ୍ପୀ ହିମେଶ ରେଶମିଆଙ୍କ ଆଗାମୀ ଚଳଚ୍ଚିତ୍ରରେ ‘ହାପି ହାର୍ଡି ହିର୍’ର ତେରି ମେରି କାହାଣୀ ଗୀତରେ କଣ୍ଠଦାନ କରିବାର ସୁଯୋଗ ପାଇଛନ୍ତି।