କଟକ ରୋଡ,୧୦।୯(ଡି.ଏନ୍.ଏ.) : ଭୁବନେଶ୍ୱର ରେଲଓ୍ବ ଷ୍ଟେଶନ ନିକଟରୁ ରେଲଓ୍ବେ ପ୍ରୋଟେକ୍ସନ ଫୋର୍ସ(ଆରପିଏଫ) ସୋମବାର ୪ ବସ୍ତା ଭାଙ୍ଗ ଜବତ କରିଛି। ପରେ ଏହାକୁ ଭୁବନେଶ୍ୱର ଅବକାରୀ ମୋବାଇଲ ସ୍କ୍ବାଡ୍କୁ ହସ୍ତାନ୍ତର କରିଛି। ଜବତ ଭାଙ୍ଗର ଓଜନ ୨ କୁଇଣ୍ଟାଲ ହୋଇଥିବା ବେଳେ ଏହାର ଆନୁମାନିକ ମୂଲ୍ୟ ପ୍ରାୟ ୪ଲକ୍ଷ ଟଙ୍କା ହେବ ବୋଲି ମୋବାଇଲ ସ୍କ୍ବାଡ୍ ଇନ୍ସପେକ୍ଟର ପ୍ରଭାତ କୁମାର ସେଠୀ କହିଛନ୍ତି।
ସୂଚନା ଅନୁଯାୟୀ, ରେଲଓ୍ବେ ଷ୍ଟେଶନ ୬ନଂ. ପ୍ଲାଟଫର୍ମର କିଛି ଦୂରରେ ଥିବା କଳ୍ପନା ଓଭରବ୍ରିଜ ତଳେ ଆରପିଏଫ୍ କର୍ମଚାରୀ ସୋମବାର ଭୋର ପ୍ରାୟ ସାଢେ ୫ଟା ରେ ପାଟ୍ରୋଲିଂ କରୁଥିବା ବେଳେ ରେଳଧାରଣା ପାର୍ଶ୍ୱରେ ୪ଟି ବସ୍ତା ପଡିଥିବା ଦେଖିବାକୁ ପାଇଥିଲେ। ପରେ ଏହା ଆରପିଏଫ ପୋଷ୍ଟକୁ ଅଣାଯାଇ ଖୋଲାଯିବା ପରେ ସେଥିରେ ଭାଙ୍ଗ ଥିବା ଜଣାପଡିଥିଲା। ଭାଙ୍ଗ ଷ୍ଟେଶନ ନିକଟରୁ ଜବତ ସମୟରେ କେହି ନିଶା ସାମଗ୍ରୀର ଦାବିଦାର ନ ମିଳିବା ଫଳରେ କେହି ଅଭିଯୁକ୍ତ ଏହାକୁ ଟ୍ରେନରୁ ଫୋପାଡିଦେଇଥିବା ପ୍ରାଥମିକ ଅନୁସନ୍ଧାନରୁ ଜଣାପଡିଛି। କିଛିଦିନ ପୂର୍ବରୁ ଢେଙ୍କାନାଳ ରେଲଓ୍ବେ ଷ୍ଟେଶନ ନିକଟରେ ୩ବସ୍ତା ଗଞ୍ଜେଇ ଟ୍ରେନରୁ ପକାଯାଇଥିଲା। ଅନୁଗୋଳର ବଇଣ୍ଡା ଅଞ୍ଚଳରୁ ବିଭିନ୍ନ ନିଶାସାମଗ୍ରୀ ଟ୍ରେନରେ ଚାଲାଣ ହେଉଥିବା ଆରପିଏଫ ଇନ୍ସପେକ୍ଟର କାଳୁ ସେଠୀ କହିଛନ୍ତି। ଭାଙ୍ଗ ମିଳିଥିବା ସ୍ଥାନ ନିକଟବର୍ତ୍ତୀ ଅଞ୍ଚଳରେ ଏକାଧିକ ବସ୍ତି ରହିଥିବା ବେଳେ ଉକ୍ତ ସ୍ଥାନକୁ କେହି ଭାଙ୍ଗ ଚାଲାଣ କରିଥାଇପାରନ୍ତି ବୋଲି ଆରପିଏଫ ଓ ଅବକାରୀ ବିଭାଗ ସନ୍ଦେହ ପ୍ରକାଶ କରିଛନ୍ତି। ଅନ୍ୟପକ୍ଷରେ ଏହି ଘଟଣାର ଅଭିଯୁକ୍ତଙ୍କୁ ଧରିବା ପାଇଁ ଉଦ୍ୟମ ଜାରି ରହିଛି। ଏ ନେଇ ଆରପିଏଫରେ ମାମଲା ନଂ. ୫-୧୧/୦୪/୦୧(୦୯)/୧୯ ରୁଜୁ ହୋଇଛି। ଅବକାରୀ ବିଭାଗରେ ମଧ୍ୟ ଏକ ମାମଲା (ନଂ.୭୯/୧୯-୨୦)ରୁଜୁ ହୋଇଛି।