କେସିଙ୍ଗା, ୨୨।୧: କଳାହାଣ୍ଡି ଜିଲାର ମୁଖ୍ୟଦ୍ୱାର ନିକଟରେ ରେଳ ଫାଟକ ରହିଛି। ଏହି ଫାଟକ ଦେଇ ୧୬ ନମ୍ବର ଜାତୀୟ ରାଜପଥ ଯାଇଛି। ଏହି ଫାଟକ ଦେଇ ଦିନରାତି ଟ୍ରେନ ଯିବାବେଳେ ପ୍ରାୟ ୧୬ ଘଣ୍ଟା ଗେଟ ବନ୍ଦ ରହୁଛି। ଫଳରେ ରାସ୍ତାରେ ଯାନବାହନ ଚଳାଚଳ ଦୀର୍ଘସମୟ ଧରି ବନ୍ଦ ରହୁଛି। କେସିଙ୍ଗା ରେଳ କ୍ରିୟାନୁଷ୍ଠାନ କମିଟି ପକ୍ଷରୁ ବୁଧବାର ରେଳ ଫାଟକ ନିକଟରେ ସକାଳ ୯ଟାରୁ ଗଣଧାରଣା ଦିଆଯାଇଛି। କେସିଙ୍ଗା ସହରର ସମସ୍ତ ଦୋକାନ ବଜାର ବନ୍ଦ ରହିଥିଲା। କେସିଙ୍ଗା ରେଳ କ୍ରିୟାନୁଷ୍ଠାନ କମିଟିର ସଭାପତି ଦେବେନ୍ଦ୍ର ଭୁଜବଳଙ୍କ ନେତୃତ୍ୱରେ ଗଣଧାରଣା ଅନୁଷ୍ଠିତ ହୋଇଥିଲା। ଅଣ୍ଡରବ୍ରିଜ ନିର୍ମାଣ ପାଇଁ ଏହି ଗଣଧାରଣା ଜାରି ରହିବ ବୋଲି ସଭାପତି ପ୍ରକାଶ କରିଥିଲେ। କେସିଙ୍ଗାଠାରୁ ଭବାନୀପାଟଣା ଯିବା ପାଇଁ ସମସ୍ତ ବସ୍, ଟ୍ରକ, ଦୁଇ ଚକିଆ ଯାନବାହନ ଚାଲୁ ରହିଥିଲା। କେସିଙ୍ଗା ସହରରେ ବୁଧବାର ବ୍ୟବସାୟିକ କ୍ଷେତ୍ରରେ କୋଟି କୋଟି ଟଙ୍କା କ୍ଷତି ଘଟିଛି। ଏହି ଗଣଧାରଣାରେ ପୂର୍ବତନ କେନ୍ଦ୍ର ମନ୍ତ୍ରୀ ଭକ୍ତଚରଣ ଦାସ ଯୋଗ ଦେଇଥିଲେ।