ଭୁବନେଶ୍ୱର,୧୩।୯(ବ୍ୟୁରୋ): ଫନୀରେ ଉଜୁଡି ପଡିଥିବା ଭୁବନେଶ୍ୱର ରେଳ ଷ୍ଟେଶନ ଧୀରେ ଧୀରେ ସଜାଡି ହେଉଥିବାବେଳେ ପୁଣି ସୌନ୍ଦର୍ଯ୍ୟପୂର୍ଣ୍ଣ ଭାବେ ଗଢ଼ିବାକୁ ଲାଗିପଡିଛି କର୍ତ୍ତୃପକ୍ଷ। ବର୍ତ୍ତମାନ ନୂଆ ରୂପରେ ନଜର ଆସିବ ଷ୍ଟେଶନ ପରିସର। ଷ୍ଟେଶନରେ ଭିତରେ ପାଦ ରଖୁ ରଖୁ ଯାତ୍ରୀ ଦେଖିବାକୁ ପାଇବେ ଓଡ଼ିଶାର ଐତିହ୍ୟ, କଳା ଓ ସଂସ୍କୃତି। ମନ୍ଦିରମାଳିନୀ ସହର, ସାହିତ୍ୟ, ଲୋକ କଳା, ସବୁଜ ବନାନୀ ଆଦି ଥ୍ରୀ-ଡି ପେଣ୍ଟିଂରେ ଚିତ୍ର ହୋଇଥିବାର ଦେଖିବେ। ଏହାସହ ଲିଙ୍ଗରାଜ ମନ୍ଦିର, ମୁକ୍ତେଶ୍ୱର ଦେଉଳ, ନନ୍ଦନକାନନ ଓ ଧଉଳି ଶାନ୍ତିସ୍ତୂପ ଅଙ୍କା ଯିବାର ଯୋଜନା ରହିଛି। କାନାରା-ଏଚ୍ଏସ୍ବିସି-ଓବିସି-ଏଲଆଇସି-ରେଡିଓ ମିର୍ଚିର ଉଦ୍ୟମରେ ଏହି ଚିତ୍ର ଅଙ୍କା ଯାଉଛି। ଭାରତ ସରକାରଙ୍କ କ୍ଲିନ-ଇଣ୍ଡିଆ ଯୋଜନାର ଏହା ଅଂଶବିଶେଷ ବୋଲି ସୂଚନା ମିଳିଛି। ଭୁବନେଶ୍ୱର ପୂର୍ବରୁ ମୁମ୍ବାଇ, ଅହମ୍ମଦାବାଦ, ଦିଲ୍ଲୀ, ପୁଣେର ଷ୍ଟେଶନଗୁଡିକରେ ମଧ୍ୟ ଏଭଳି ଚିତ୍ର ଅଙ୍କା ସରିଛି। ଗୁରୁବାରଠାରୁ ଭୁବନେଶ୍ୱର ମୁଖ୍ୟ ଷ୍ଟେଶନରେ ଏହି କାର୍ଯ୍ୟ ଆରମ୍ଭ ହୋଇଛି। ପୁରା ଷ୍ଟେଶନ ୫ ଦିନ ଭିତରେ କାମ ସରିଯିବ ବୋଲି ନେଇଥିବା ସଂସ୍ଥାର ମୁଖ୍ୟ କହିଛନ୍ତି। ସୂଚନାଯୋଗ୍ୟ ଏହି ଯୋଜନାକୁ ‘ମି ଫର୍ ମାଇ ସିଟି’ କୁହାଯାଉଛି।