ନୂଆଦିଲ୍ଲୀ,୨୯।୧୧-ବର୍ତ୍ତମାନ ସାରା ଦେଶରେ ରହିଥିବା ୪୦୦ ରେଳ ଷ୍ଟେଶନରେ ମାଟି ପାତ୍ରରେ ଚା ବିକ୍ରି ବ୍ୟବସ୍ଥା କରାଯାଇଛି। ଆଗାମୀ ଦିନରେ ସବୁ ଷ୍ଟେଶନରେ ଏଭଳି ସୁବିଧା କରିବା ଉପରେ ସରକାର ବର୍ତ୍ତମାନ ଯୋଜନା କରୁଛନ୍ତି। ରାଜସ୍ଥାନରେ ରେଲଓ୍ବେର ଏକ ପ୍ରକଳ୍ପ ଉଦଘାଟନ କରି ରେଳମନ୍ତ୍ରୀ ପୀୟୂଷ ଗୋୟଲ ଏହା କହିଛନ୍ତି। ମାଟିପାତ୍ର ଚା ବିକ୍ରି ହେବା ଯୋଗୁ ଏହା ପରିବେଶ ଉପଯୋଗୀ ହୋଇପାରିଛି। ଏହା ପ୍ଲାଷ୍ଟିକ ବ୍ୟବହାର କମାଇଥିବା ସେ ମତ ଦେଇଛନ୍ତି। ପ୍ଲାଷ୍ଟିକ ମୁକ୍ତ ଭାରତ ଗଠନ ଦିଗରେ ଏଭଳି ପଦକ୍ଷେପ କାର୍ଯ୍ୟକାରୀ କରାଯାଉଛି। ଏହାକୁ ବିଚାର କରି ସାରା ଦେଶରେ ରହିଥିବା ରେଳ ଷ୍ଟେଶନଗୁଡିକରେ ମାଟି ପାତ୍ରରେ ଚା ବିକ୍ରି ନେଇ ଯୋଜନା ରଖାଯାଇଥିବା ସେ ସ୍ପଷ୍ଟ କରିଛନ୍ତି। ସେ ପୁଣି କହିଛନ୍ତି ଯେ, ରେଲଓ୍ବେର ବିକାଶ ଲାଗି ସରକାର ବିଭିନ୍ନ ଯୋଜନା ହାତକୁ ନେଉଛନ୍ତି। ସାରା ଦେଶରେ ରେଳ ଲାଇନ ବିଦ୍ୟୁତୀକରଣ ହେଲେ ପରିବେଶ ସୁରକ୍ଷା ଏବଂ ଇନ୍ଧନ, ଅର୍ଥ ଏବଂ ସଞ୍ଚୟ ଦିଗରେ ଏହା ଯୋଗଦାନ ରଖିବ। କୃଷିଜାତ ସାମଗ୍ରୀର ପରିବହନ ଦିଗରେ ମଧ୍ୟ ରେଲଓ୍ବେର କାର୍ଯ୍ୟ ଉପରେ ସେ ଗୁରୁତ୍ୱାରୋପ କରିଛନ୍ତି।
