ତାଳଚେର,୮ା୮(ନି.ପ୍ର.) ରୋଗୀଙ୍କ ଜୀବନ ରକ୍ଷାରେ ଆମ୍ବୁଲାନ୍ସର ଭୂମିକା ଗୁରୁତ୍ୱପୂର୍ଣ୍ଣ। ହେଲେ ଏନ୍ଟିପିସି ପରିଚାଳନାଧୀନ ତାଳଚେର ଥର୍ମାଲ (ଟିଟିପିଏସ୍) ହସ୍ପିଟାଲ କର୍ତ୍ତୃପକ୍ଷ ଆମ୍ବୁଲାନ୍ସରେ ବର୍ଜ୍ୟବସ୍ତୁ ପରିବହନ କରୁଛନ୍ତି। ଏପରି ଘଟଣା ଜଣାପଡ଼ିବା ପରେ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସ୍ବେଚ୍ଛାସେବୀ ସଙ୍ଗଠନ ଦି ନ୍ୟୁ ହରାଇଜନ ପକ୍ଷରୁ ବୁଧବାର ବର୍ଜ୍ୟବସ୍ତୁ ନେଇ ଯାଉଥିବା ଆମ୍ବୁଲାନ୍ସକୁ ଅଟକାଇ ତାଳଚେର ଥାନା ଜିମାରେ ଦିଆଯିବା ସହ ଏ ନେଇ ଏକ ଏତଲା ମଧ୍ୟ ଦିଆଯାଇଛି।
ସଙ୍ଗଠନ ପକ୍ଷରୁ ଅଭିଯୋଗ କରାଯାଇଛି ଯେ, ଟିଟିପିଏସ୍ ଡାକ୍ତରଖାନାରେ ଥିବା ଏକ ଆମ୍ବୁଲାନ୍ସ (ନଂ. ଓଡି ୩୫-୭୩୦୬)ରେ ବର୍ଜ୍ୟବସ୍ତୁ (ବ୍ୟବହୃତ ସିରିଞ୍ଜ, ତୁଳା, ସାଲାଇନ ବୋତଲ, ଗଜ) ପରିବହନ କରାଯାଉଥିଲା। ଏହା ଜଣାପଡ଼ିବା ପରେ ସଙ୍ଗଠନର ସଦସ୍ୟମାନେ ଥର୍ମାଲ ଆନନ୍ଦବଜାର ଠାରେ ଗାଡ଼ିକୁ ଅଟକାଇ ଥିଲେ। ଡୋର୍ ଖୋଲିବା ପରେ ଗାଡି ଭିତରେ ଡଷ୍ଟବିନରେ ବର୍ଜ୍ୟବସ୍ତୁ ଭର୍ତ୍ତି ରହିଥିବା ଦେଖିବାକୁ ମିଳିଥିଲା। ଏହାକୁ କଣିହାଁ ଡାକ୍ତରଖାନା ପରିସରରେ ଥିବା ୱେଷ୍ଟ ମ୍ୟାନେଜମେଣ୍ଟକୁ ନିଆଯାଉଥିବା ଆମ୍ବୁଲାନ୍ସ ଚାଳକ କହିବା ପରେ ସ୍ଥାନୀୟ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଗୁରୁତର ରୋଗୀଙ୍କୁ ଡାକ୍ତରଖାନା ନେବାକୁ ଆମ୍ବୁଲାନ୍ସ ମିଳୁ ନ ଥିବା ବେଳେ ଏଥିରେ ବର୍ଜ୍ୟବସ୍ତୁ ପରି ସଂକ୍ରମିତ ସାମଗ୍ରୀ ନିଆଯିବା ଅତ୍ୟନ୍ତ ଉଦ୍ବେଗର ବିଷୟ। ଏହାଦ୍ୱାରା ରୋଗୀଙ୍କ କ୍ଷେତ୍ରରେ ସଂକ୍ରମଣ ଆଶଙ୍କା ବୃଦ୍ଧି ପାଇବ। ସେମାନଙ୍କ ଜୀବନ ପ୍ରତି ବିପଦ ସୃଷ୍ଟି ହେବ। ଏହା ଜାଣି ବି ଡାକ୍ତରଖାନା ପକ୍ଷରୁ ଏପରି କାର୍ଯ୍ୟ କରାଯାଇଥିବାରୁ ଗାଡ଼ିକୁ ଥାନା ଜିମା ଦିଆଯାଇଛି। ତୁରନ୍ତ ଡାକ୍ତରଖାନା କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସଙ୍ଗଠନ ପକ୍ଷରୁ ଦାବି କରାଯାଇଛି। ଅଭିଯୋଗ ପାଇବା ପରେ ତାଳଚେର ଥାନା ଆଇଆଇସି ସୌଭାଗ୍ୟ ଚନ୍ଦ୍ର ସ୍ବାଇଁ ତୁରନ୍ତ ଉପଜିଲାପାଳ ଓ ଏସ୍ଡିପିଙ୍କୁ ଘଟଣା ସମ୍ପର୍କରେ ଅବଗତ କରିଥିଲେ। ଏଥିସହ ହସ୍ପିଟାଲ କର୍ତ୍ତୃପକ୍ଷଙ୍କୁ ଥାନାକୁ ଡକାଇଥିଲେ। ଆଗାମୀ ଦିନରେ ଏପରି କାର୍ଯ୍ୟର ପୁନରାବୃତ୍ତି ହେବ ନାହିଁ ବୋଲି ଡାକ୍ତରଖାନା କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିବା ଆଇଆଇସି ସୂଚନା ଦେଇଛନ୍ତି। ଏ ସମ୍ପର୍କରେ ଟିଟିପିଏସ୍ ସିଏମ୍ଓ ରଞ୍ଜିତା ସାହୁ କହିଛନ୍ତି, ଆମ୍ବୁଲାନ୍ସରେ ବର୍ଜ୍ୟବସ୍ତୁ ନିଆଯାଉ ଥିଲା। ଗାଡି ନ ଥିବାରୁ କେବେ କେବେ ଆମ୍ବୁଲାନ୍ସକୁ ଏଥିପାଇଁ ବ୍ୟବହାର କରାଯାଇଥାଏ। ଟିଟିପିଏସ୍ ଡିଜିଏମ୍ ସମୀତ ଦେ କହିଛନ୍ତି, ଆମ୍ବୁଲାନ୍ସ ଥାନାରେ କ’ଣ ପାଇଁ ଅଛି ତାହା ଜାଣିନାହିଁ। ସିଏମ୍ଓଙ୍କୁ ପଚାରିବା ପରେ ଜଣାପଡିବ ବୋଲି ସେ ପ୍ରକାଶ କରିଛନ୍ତି।